ያይቆብ ኤሳዌራ ጋሄተ
1 ያይቆብ ቁ ግድ ፄልያ ዎደ ኤሳዌይ ባ ኦይዱ ፄቱ አሳራ የይሳ በእስ። ሄሳ ግሾ፥ ናይታ ልያስ፥ ራሄልስነ ናምኡ አይለታስ ሻክ እሚስ። 2 አይለታነ ኤንታ ናይታ ስንን፥ ልያነ እ ናይታ ኤንታ ጌዶን፥ ራሄሎነ ዮሰፋ ዉርሰን ዎስ። 3 ሽን እ ባዉ ስን አድ ባ እሻኮ ማትሸ ሳአ ጋክ ጋክ ላፑንቶሆ ዝግስ።
4 ሽን ኤሳዌይ እያራ ጋሄታናዉ ዎፅ ይድ እያ ቆያ ቆምድ ዬርስ። ናምአይካ ዬክዶሶና። 5 ኤሳዌይ ቁ ግድ ፄልድ ማጫሳታነ ናይታ በእድ፥ "ሀ ኔራ ደኤይሳት ኦናንቴ?" ያግድ ኦይችስ።
ያይቆብ፥ "ታ ጎዳዉ፥ ሀይሳቲ ፆሳይ ነ አይልያስ ባ ኬሀተን እምዳ ናይታ" ያግስ። 6 አይለት ባንታ ናይታራ ሺቅድ እያዉ ዝግዶሶና። 7 ካልድ ልያራነ እ ናይታራ ይድ ዝግዶሶና። ዉርሰን ዮሰፋራነ ራሄልራ ይድ ዝግዶሶና።
8 ኤሳዌይ፥ "ሀ ስንን ብሸ ታራ ጋሄትዳ ዉደይ ኡባይ አይቤ?" ያግድ ኦይችስ።
ያይቆብ፥ "ታ ጎዳዉ፥ ሄስ ታኒ ነ ስንን ሳባ ደማናዉ የድዳይሳታ" ያግስ።
9 ሽን ኤሳዌይ፥ "ታ እሻዉ፥ ታዉ ግድያ ሻሎይ ደኤስ፥ ነባይ ነዉ ግዶ" ያግስ።
10 ያይቆብ፥ "ሀያና፥ ሀእ ታኒ ነ ስንን ሳባ ደምዳባ ግድኮ፥ ሀ ታኒ እመይሳ ኤካ። ኔኒ ታና ሞካ ኤክዳ ግሾ፥ ታ ነ ሶምኡዋ በኤይስ ፆሳ ሶምኦ በኤይሳ መላ። 11 ታኒ ነዉ ኤህዳ ሀ እሞታ ኤካ። ፆሳይ ታዉ ኬህ እምዳ ግሾ ኩምስ" ያግስ። ያይቆብ ዎስድ አጎና እፅዳ ግሾ፥ ኤሳዌይ እያ እሞታ ኤክስ።
12 ኤሳዌይ፥ "አነ የ፥ ታኒ ኔራ እስፈ ባና" ያግስ።
13 ሽን ያይቆብ፥ "ታ ጎዳዉ፥ ናይት ሹጎ ግደይሳ ኤራሳ። ቃስ ታኒ ጋሎ ማራታ ንያ ዶርሳታነ ሚዛ ናጋናዉ ኮሼስ። አሳይ ኤንታ ሀር አቶሽን፥ እስ ጋላስ ምን ላግኮ፥ መሄ ኡባይ ሀይቃና። 14 ሄሳ ግሾ፥ ታ ጎዳዉ፥ ነ አይለታፐ ስንታዳ ባ። ታኒ ሳይረን ታ ጎዳ ጋካናስ፥ ታ ስንን ደእያ መህያነ ናይታ ሄመ መላ ሎዳን ካላዳ ታ ጎዳ ታኒ ኤዶመን ጋካና" ያግስ።
15 ኤሳዌይ፥ "ያንኮ፥ ታኒ ታ አሳፐ ጉራ ነዉ አሾ" ያግስ።
ሽን ያይቆብ፥ "ኮሸና፤ ታኒ ታ ጎዳ ስንን ሳበትዳይስ ታዉ ግዳና" ያግስ።
16 ሄሳ ግሾ፥ ኤሳዌይ ሄ ጋላስ ኦገን ዎድ ሳይረ ስምስ። 17 ሽን ያይቆብ ሱኮታ ብስ። ያን ባዉ ኬ ኬፅስ፥ ባ መሄታስ ሻቃራ ሻቃርስ። ሄሳ ግሾ፥ ሄ በሳ ሱኮታ (ኩያ ዎይኮ ጋባ) ግድ ሱንስ።
18 ያይቆብ ማሰጰፆመፐ ስሚድ ካናነ ቢታን ደእያ ሴከማ ካታማ ሳሮን ጋክስ። እ ሄ ካታማስ ስን ባጋራ ዱንካነ ቶክድ ኡትስ። 19 ባ ዱንካንያ ቶክዲ ኡትዳ ጋድያ ሴከማ አዋ ሀሞራ ናይታፐ እስ ፄቱ ብራ ሳንትመን ሻምስ። 20 ያን ያርሾ በሲ ጊግስድ፥ "ጎዳ፥ እስራኤለ ፆሳ" ግድ ሱንስ።