ይሳቃነ አብመለከ
1 ሄ ቢታን ካሰ አብራሃመ ዎደ ከይዳ ኮሻፐ ሀራ ኮሽ ከይስ። ያንን፥ ይሳቅ ፍልስፄመ ካዋ አብመለከኮ ገራራ ብስ። 2 ጎዳይ ይሳቃስ ቆንጭድ "ግብፀ ቢታ ዱገ ቦፓ፥ ታኒ ነዉ ኦድዳ ቢታን ደአ። 3 ሀ ቢታን ጉ ዎድያ ጋምኣሻ፥ ታኒ ኔራ ግዳና፥ ነና አንጃና። ሀ ቢታ ኡባ ታኒ ነዉነ ነ ሼሻስ እማና። ታኒ ነ አዋ አብራሃመስ ጫቅዳ ጫቁዋ ፖላና። 4 ነ ሼሻ ሳሎ ፆልንቶዳ ዳርሳና፥ ሀ ቢታ ኡባ ታኒ ኤንታዉ እማና። ሳአ ካዎተት ኡባይ ነ ሼሻ ባጋራ አንጀታና። 5 ሄስካ፥ አብራሃመይ ታ ቃላ ስእድ፥ ታ አዋጆታ፥ ታ ኪታታነ ታ ህገታ ናግዳ ግሾሳ" ያግስ። 6 ሄሳ ግሾ፥ ይሳቅ ገራራን ደእስ።
7 ሄ ቢታ አሳይ እርብቃባ ደንድ፥ "ሀና ነዉ አይቤ?" ግድ ይሳቃ ኦይችዶሶና።
እ፥ "ሀና ታዉ ምቾ" ያግስ። ሄሳ እ ግዳይ፥ እርብቃ ዳሮ ማላ ሎኦ ግድያ ግሾ፥ "እያ ታ ማቾ ጊኮ፥ ሀ አሳይ እ ጋሶን ታና ዎና" ያግ ቆፕድ ባብስ።
8 ይሳቅ ያን ዳሮ ዎደ ደእዳፐ ጉየ፥ ፍልስፄመ ካዎይ አብመለከይ ማስኮተራ ዱገ ፄልያደ፥ ይሳቅ ባ ማቸ እርብቃራ ካእሽን በእስ። 9 ሄሳ ግሾ፥ አብመለከይ ይሳቃ ፄግስድ፥ "ሄኮ፥ እያ ነ ማቾ፤ ኔኒ አይስ እያ ታ ምቾ ጋዲ?" ግድ ኦይችስ።
ይሳቅ፥ "እያ ታ ማቾ ጊኮ፥ አሳይ ታና እ ጋሶን ዎና ጋዳ ጋስ" ያግስ።
10 አብመለከይ፥ "ሀይስ ኔኒ ኑ ቦላ ኦዳባይ አይቤ? ታ አሳፐ እስ አስ ነ ማቸራ አቅስ ሽን አትስ፥ ኔኒ ኑ ቦላ ጎመ ኤሀዳሳ ሽን" ያግስ። 11 ሄሳ ግሾ፥ አብመለከይ ባ አሳ፥ "ሀ ኡራ ዎይኮ እያ ማችዉ ቦችያ ኦንካ ቱማ ሀይቃና" ያግድ ኪትስ።
12 ይሳቅ ሄ ቢታን ካ ዘርድ፥ ጎዳይ እያ አንጅዳ ግሾ ሄ ላይን ፄቱ ኩሸ ኤክስ። 13 እ ዱረተን ኤረታና ጋካናስ ዳሮ ዱረትሸ ብስ። 14 ይሳቃስ ዶርሳ ዉደይ፥ ሚዛ ዉደይነ አይለት አድ ዳርዳ ግሾ፥ ፍልስፄመ አሳት እያ ቃናትዶሶና። 15 ሄሳ ግሾ፥ እያ አዋ አብራሃመ ዎደ እያ አዋ አይለት ቦክዳ ሃ ኦላ ኡባ ፍልስፄመት ቢታ ኡሽድ ኩንዶሶና።
16 ሄ ዎደ አብመለከይ ይሳቃኮ፥ "ኔኒ ኑፐ አዳ ምንዳ ግሾ ኑ ማታፐ ባ" ያግስ። 17 ይሳቅ ሄሳፈ ደንድድ፥ ገራራ ዛንጋራ ብድ ዱንካነ ቶክድ ያን ደእስ። 18 ይሳቅ ባ አዋ አብራሃመ ዎደ ቦከትዳ ሃ ኦላታ፥ አብራሃመይ ሀይቅዳፐ ጉየ፥ ፍልስፄመት ኩንዳይሳታ ዛር ቦክ ከስድ፥ እያ አዋይ ሱንዳ ሱንን ፄግስ።
19 ይሳቃ አይለት ሄ ዛንጋራን ሃ ኦላ ቦክድ ያን ሎኦ ፑልቶ ሃ ደምዶሶና። 20 ሽን ገራራ ሄንንቾት ይሳቃ ሄንንቾታራ፥ "ሃይ ኑባ" ያግድ ኦየትዶሶና። ኤንቲ ፓላመትዳ ግሾ፥ ይሳቅ ሄ ሃ ኦላ "ኤሴቃ"26:20 ኤሴቃ ጉሳይ እብራወ ዶናን ፓላማ ጉሱ። ግድ ሱንስ።
21 ሄሳፈ ጉየ፥ ኤንቲ ሀራ ሃ ኦላ ቦክዶሶና። ሽን ኤንቲ ሄ ሃ ኦላ ጌዶንካ ኦየትዶሶና። ሄሳ ግሾ፥ ይሳቅ ሄ ሃ ኦላ "ሲፅና"26:21 ሲፅና ጉሳይ እብራወ ዶናን ሞርከተ ጉሱ። ግድ ሱንስ። 22 ሄሳፈ ጉ ስን ሺቅድ ሀራ ሃ ኦላ ቦክስስ። እያ ጋሶን ኦንካ ኦየትቦና ግሾ፥ "ፆሳይ ሀእ ኑስ ዳልግስስ ኑኒ ሀ ቢታን ዳራና" ግድ ሄ በሳ ረሆቦታ26:22 እብራወ ዶናን ሀ ቃላ ብርሸይ ዳልጋ በሲ ጉሱ። ግድ ሱንስ።
23 ሄሳፈ ደንድድ ፑደ በርሳበ ከይስ። 24 ሄ ብዳ ጋላስ ቃማ ጎዳይ እያዉ ቆንጭድ፥ "ታኒ ነ አዋ አብራሃመ ፆሳ፥ ታኒ ኔራ ደእያ ግሾ፥ ባቦፋ። ታ አይልያ አብራሃመ ግሾ ታኒ ነና አንጃና፥ ነ ሼሻካ ዳርሳና" ያግስ። 25 ይሳቅ ያን ያርሾ በሲ ጊግስድ ጎዳ ሱን ፄግስ። ያን እ ባ ዱንካንያ ቶክስ፥ እያ አይለት ያን ሃ ኦላ ቦክዶሶና።
26 ሄሳፈ ጉየ፥ አብመለከይ ባና ዞርያ አሁዛነ ቶራ ሞጮና ፍኮላ ኤክድ፥ ገራራፐ ይሳቃኮ ይስ። 27 ይሳቅ ኤንታኮ፥ "ህንተ ካሰ ታና እፅድ፥ ህንተ ቢታፈ ከስ የድቤከቲ? ሀእ ታኮ አይ ኤካናዉ ይደቲ?" ያግስ።
28 ኤንቲ፥ "ጎዳይ ኔራ ደኤይሳ ኑኒ ጌሽ ኤርዳ። ሄሳ ግሾ፥ ሳሮተ ጫቆይ ኑ ግዶንነ ነ ግዶን ዳናዉ ኮሼስ። 29 ኑኒ ነና ቦችቦኮ፥ ነዉ ኬሀተ ፃላላ ኦድ፥ ነና ሳሮተን ሞይዝድ የድዳ። ሄሳዳካ ኔኒ ኑ ቦላ ኢታባ ኦና መላ፥ አነ ኔራ ጫቆስ። ቱማካ ሀእ ነና ጎዳይ አንጅስ" ያግዶሶና። 30 ሄ ዎደ ይሳቅ ኤንታዉ ግብራ ጊግስን ምዶሶና፥ ኡይዶሶና። 31 ዎንተ ጋላስ ዎንታ ጉራ ደንድድ ኤንቲ እሶይ እሱዋራ ጫቅዶሶና። ይሳቅ ኤንታ ሞይዝን፥ ኤንቲ ሳሮ ሻከትድ ብዶሶና።
32 ሄ ጋላስ ይሳቃ አይለት ይድ፥ "ኑኒ ሃ ደምዳ" ያግድ ባንታ ቦክዳ ሃ ኦላባ እያዉ ኦድዶሶና። 33 እ ሄ ሃ ኦላ ሳበ (ጫቆ) ግድ ሱንስ። ሄሳ ግሾ፥ ሄ ካታማ ሱንይ ሀች ጋካናስ በርሳበ (ጫቆ ሃ ኦላ) ጌተቴስ።
34 ኤሳዌስ ላይ ኦይታማ ግድዳ ዎደ ህተ አድያ ብኤራ ናእዉ ዮድቶነ ህተ አድያ ኤሎና ናእዉ ባሰማቶ ማችስ። 35 ኤንቲ ይሳቃነ እርብቃ አዛንሸ ደእዶሶና።