1 ሄሳፈ ጉየ፥ ፆሳይ አብራሃመ ፓጭስ፤ እ እያ፥ "አብራሃመ" ያግድ ፄግስ።

እ፥ "ዬ" ግድ ኮይስ።

2 ፆሳይ፥ "ኔኒ ዶስያ ነ እስ ናአ ይሳቃ ኤካዳ፥ ሞርያ ቢታ ባ። ያን ታኒ ነና በሲያ እስ ደረ ቦላ እያ ፁሳ ያርሾ ኦዳ ታዉ ያርሻ" ያግስ።

3 ዎንተ ጋላስ አብራሃመይ ጉራ ደንድድ፥ ባ ሀርያ ጫንስ። ባ አይለታፐ ናምአታነ ባ ናአ ይሳቃ ባራ ኤክድ፥ ፁሳ ያርሹዋስ ግድያ ም ቀር ኤክድ፥ ፆሲ እያ በሲያ በሲ ባናዉ ደንድስ። 4 ሄን ጋላስ አብራሃመይ ቁ ግድ፥ ሄ በሳ ሃሆራ በእስ። 5 አብራሃመይ ባ አይለታ፥ "ህንተ ሀርያራ ሀይሳን ደእሽተ። ታራ ታ ናኣራ ያ ብድ ፆሰ ጎይንድ፥ ህንተኮ ስማና" ያግስ።

6 አብራሃመይ ያርሹዋ ም ደንድ፥ ባ ናአ ይሳቃ ቶስስ። እ ባዉ ታማነ ማሸ ኦይክስ። ኤንቲ ናምአይ እስፈ ብሽን፤ 7 ይሳቅ ባ አዋ አብራሃመ፥ "ታ አዋዉ" ያግስ።

አብራሃመይ፥ "ዬ፥ ታ ናአዉ" ያግስ።

ይሳቅ፥ "ታማይነ ምይ ሀይስሽ፤ ሽን ፁሳ ያርሾ ኡርገ ዶርሳይ አዉኔ?" ያግስ።

8 ያትን አብራሃመይ፥ "ታ ናአዉ፥ ፁሳ ያርሾ ኡርገ ዶርሳ ፆሳይ ባዉ እማና" ያግስ። ያግን ኤንቲ ናምአይ እስፈ ብዶሶና።

9 ኤንቲ ፆሳይ እያዉ ኦድዳ በሳ ጋክዳ ዎደ፥ አብራሃመይ ያን ያርሾ በሲ ጊግስድ፥ ም ሂፅስ። ባ ናአ ይሳቃ ቃችድ፥ ሄ ም ቦላ ዝንእስስ። 10 አብራሃመይ ባ ናአ ሹካናዉ ባ ኩሽያ የድድ ማሸ ኤክስ። 11 ሽን ጎዳ ኪታንቾይ ሳሎፐ፥ "አብራሃመ፥ አብራሃመ" ያግድ ፄግስ። እ፥ "ዬ" ያግድ ኮይስ።

12 ኪታንቾይ፥ "ናአ ቦላ ነ ኩሽያ ዎፋ፤ እያ አይብባካ ኦፋ። ኔኒ ነ እስ ናኣ ታና ድጎና ግሾ፥ ኔኒ ፆሳስ ያየይሳ ታኒ ኤራይስ" ያግስ።

13 አብራሃመይ ቁ ግድ ፄልስ፤ ሄኮ ካጨይ ቱራን ቃፀትዳ እስ ዶርስ ደኤይሳ በእስ። አብራሃመይ ብድ ሄ ዶርሳ ኤክድ፥ ባ ናአ በሳን ፁሳ ያርሾ ኦድ ያርሽስ። 14 ሄሳ ግሾ፥ አብራሃመይ፥ "ጎዳይ እማና" ግድ ሄ በሳ ሱንስ። ሀች ጋካናስ ሄስ፥ "ጎዳ ዙማ ቦላ እመታና" ጌተቴስ።

15 ጎዳ ኪታንቾይ ሳሉዋፐ ናምአን አብራሃመ ፄግድ፥ 16 "ታኒ ጎዳይ፥ ሀይሳዳ ጋዳ ታኒ ታ ሁጰን ነዉ ጫቃይስ፤ ኔኒ ሀይሳ ኦዳ ግሾነ ነ እስ ናኣ ታና ድጎና ግሾ፥ 17 ታኒ ነና ቱማ አንጃና። ነ ዘረ ታኒ ሳሎ ፆልንቶ መላነ አባ ጋፃን ደእያ ሻፈ መላ ኦና። ነ ዘረት ባንታ ሞርከታ ካታማታ ላታና። 18 ኔኒ ታዉ ኪተትዳ ግሾ፥ ሀ ሳአ ካዎተት ኡባይ ነ ዘረ ባጋራ አንጀታና" ያግስ።

19 ሄሳፈ ጉየ፥ አብራሃመይ ባ አይለታኮ ጉየ ስምን፥ ኤንቲ ኡባይ እስፈ ደንድድ ባርሳበ ብዶሶና። አብራሃመይ ባርሳበን ደእስ።

20 ሄሳፈ ጉየ፥ አብራሃመስ፥ "ምልካ ነ እሻ ናኮራስ ናይታ የላሱ፤ 21 ኤንትካ ባይራይ ኡፃ፤ ኡፃ እሻት ቡዛ፥ 22 አራመ አዋ ቃሜላ፥ ከሳዳ፥ ሃዞ፥ ፕልዳሻ፥ ይድላፋነ ባቱኤላ ጌተቶሶና" ያግስ።

23 ሀ ሆስፑን ናይታ ምልካ አብራሃመ እሻ ናኮራስ የላሱ። ባቱኤል እርብቃ የልስ። 24 ረኡማ ጌተትያ እያ ናምአን ማጫስያ ቃስ ፀባ፥ ጋሃማ፥ ታሀሳነ ማካ የላሱ።