Gênesis 50

1 ዮሰፍ ባ አዋ አሀ ቦላ ኩንድድ፥ ዬርሸ እያዉ ዬክስ። 2 ሄሳፈ ጉየ፥ ዮሰፍ ለ ሺሽያ ባ ኦሳንቾታ፥ ባ አዋ እስራኤለ አሀ ሽቶ ትይድ መልሳና መላ ኪትስ። ኤንቲ ትይድ መልስዶሶና። 3 ሽቶ ትሻ ዎጋይ ኦይታሙ ጋላስ ኩመ ኤኬስ። ግብፀ አሳት እያዉ ላፑን ታሙ ጋላስ ዬክዶሶና።

4 ዬሆ ጋላሳት አዳ ዎደ፥ ዮሰፍ ግብፀ ካዋ ኦሳንቾታ፥ "ታኒ ህንተ ስንን ሳባ ደምዳባ ግድኮ፥ ታዉ ካዋስ ሀይሳዳ ያግድ ኦድተ። 5 ‘ታ አዋይ ታና እስ ጫቆ ጫቅስስ። ታኒ ሀይቃናዉ ማታስ። ታኒ ታ ሁጰን ካናነ ቢታን ቦክዳ ጎንጎሎ ዱፉዋን ታና ሞጋ’ ያግስ። ሄሳ ግሾ፥ ‘ሀእ ታኒ ያ ባዳ ታ አዋ ሞጋዳ ስማና መላ ታና የዳርክ’ ያግተ" ያግስ።

6 ያትን ካዎይ፥ "እ ነና ጫቅስዳይሳዳ ባዳ ነ አዋ ሞጋ" ያግስ።

7 ያትን ዮሰፍ ባ አዋ ሞጋናዉ ብስ። ካዋ ሞርናት ኡባይ፥ ካዋ ኬንነ ግብፀን ደእያ ግታ አሳት ኡባይ ዮሰፋ ካልድ ብዶሶና። 8 ዮሰፋ ሶ አሳ ኡባይ፥ እያ እሻትነ እያ አዋ ሶ አሳት ዮሰፋራ ብዶሶና። ኤንታ ዮጋ ናይት፥ ኤንታ ዶርሳት፥ ኤንታ ዴሻትነ ኤንታ ሚዛ ዉድያ ፃላል ጌሳመን አትስ። 9 ፓራ ጋረትነ ቶጋት እያራ ብዶሶና። እያ ካልድ ብዳ አሳይ ዳሮ።

10 ኤንቲ ዮርዳኖሰ ሻፋ ማታን ደእያ አፃደ ጌተትያ ዉዱማ ጋክድ፥ ባንታ ቃላ ቁ ኦድ፥ ዘሌልድ ዬክዶሶና። ያን ዮሰፍ ባ አዋ ዬሁዋን ላፑን ጋላስ ኡትስ። 11 ሄ ቢታን ደእያ ካናነ አሳት አፃደ ዉዱማን ሄ ዬሁዋ በእዳ ዎደ፥ "ግብፀት አይብ ይባታ ዬሆ ዬኮና?" ያግዶሶና። ሄሳ ግሾ፥ ዮርዳኖሰ ማታን ደእያ ሄ በሳይ አቤል-ምፅራማ (ግብፀታ ዬሆ) ጌተትስ።

12 ያይቆባ ናይት ኤንታ አዋይ ኤንታ ኪትዳይሳዳ ኦዶሶና። 13 ኤንቲ እያ አሀ ካናነ ቢታ ኤፍድ፥ ማምረፐ ኡሻቻ ባጋን ደእያ ማክፌላ ጎንጎሉዋን ሞግዶሶና። ሄስካ፥ አብራሃመይ ህተ አድያ ኤፍሮናፐ ሞጎስ ሻምዳ ጋድያ። 14 ዮሰፍ ባ አዋ ሞግዳፐ ጉየ፥ ባ እሻታራነ እያ አዋ ሞጋናዉ እያራ ብዳ ሀራ አሳታ ኡባታራ ግብፀ ስምስ።

15 ባንታ አዋይ ሀይቅዳፐ ጉየ፥ ዮሰፋ እሻት ባንታ ግዶን፥ "ኑኒ እያዉ ኦዳ ኢታባ ኡባስ ዮሰፍ ኑና ባ ኡሎን ሞርክድ ሀሎ ከያናዉ ኮይኮ ኑኒ ዋናኔ?" ያግዶሶና። 16 ሄሳ ግሾ፥ ዮሰፋኮ ያግድ ኪታ ኪትዶሶና፤ "ነ አዋይ ሀይቃናፐ ስን ኑኮ፥ 17 ‘ኔኒ፥ ነ እሻታ ናጋራነ ኤንታ ኢታ ናቁዋ ሀያና አቶ ያጋ ያግስ ግድ ኦድተ’ ያግስ። ሄሳ ግሾ፥ ሀእ ሀያና፥ ኑ ናጋራ፥ ነ አዋ ፆሳ አይለታ ናቁዋ አቶ ያጋ" ያግዶሶና። ዮሰፍ ሄሳ ስእድ ዬክስ።

18 ሄሳፈ ጉየ፥ እያ እሻት ባንታ ሁጰን እያኮ ይድ፥ እያ ስንን ጉፋንድ፥ "ኑኒ፥ ነ አይለታ" ያግዶሶና።

19 ሽን ዮሰፍ ኤንታኮ፥ "ባቦፍተ፥ ታና ህንተዉ ፆሳ ግደትዬ? 20 ህንተ ታዉ ኢታ ኦደታ፥ ሽን ሀእ ዳሮ አሳይ ሀይቆና አታና መላ ፆሳይ ሀይሳ ሎኦተስ ኦስ። 21 ሄሳ ግሾ፥ ህዛ ባቦፍተ። ታኒ ህንተናነ ህንተ ናይታ ሙዛና" ያግድ፥ ኤንታ ምንድ ሎኦ ቃላ ሀሳይስ።

ዮሰፋ ሀይቁዋ

22 ዮሰፍ፥ እያዉ ላይ ፄታነ ታማ ግዳና ጋካናስ ባ አዋ ሶ አሳራ ግብፀን ደእስ። 23 ኤፍሬማ ናይታነ፥ ኤንታ ናይታ ናይታ በእስ። ቃስ ምናሰ ናኣ ማክራ ናይታ፥ ባ ናይታ ኦስ።

24 ሄሳፈ ጉየ፥ ዮሰፍ ባ እሻታ፥ "ታኒ ሀይቃናዉ ማታስ፥ ሽን ፆሳይ ህንተና ማዳናዉ ፆሞሳና። እ ህንተና ሀ ቢታፈ ከስድ፥ አብራሃመስ፥ ይሳቃስነ ያይቆባስ እማና ግድ ጫቅዳ ቢታ ኤፋና" ያግስ። 25 ዮሰፍ እስራኤለ ናይታ፥ "ፆሳይ ህንተና ማዳናዉ ፆሞስያ ዎደ፥ ህንተ ታ መቀ ሀ ቢታፈ ኤክድ ቢተ" ያግድ ጫቅስስ።

26 ዮሰፍ ፄታነ ታሙ ላይ ደእድ ሀይቅን፥ ሽቱዋን እያ አሀ ትይድ መልስዳፐ ጉየ፥ ግብፀ ቢታን ሳፅነን ዎዶሶና።