Lucas 17

ኦይሽሲያ አዋተ

1 የሱሲ ባ ታማረታኮ፥ "አሰ በድ ናጋራን ገልስያባይ ዮና አገና። ግዶሽን፥ ናጋራን ገላና መላ ኦያ ኡራ አየ!" ያግስ። 2 ሄ ኡራይ ካሎታፐ እሱዋ ባለናፐ ዎፃ ባ ቆን ቃችድ አባን ዉልኮ እያዉ ሎኦ። 3 ሄሳ ግሾ ናገትተ።✝17:3 ማቶ 18:15.

"ነ እሻይ ናጋራ ኦኮ ሀንቀታ፤ ቂሮትድ ማሮተን ስምኮ፥ እያዉ አቶ ያጋ። 4 እስ ጋላሳን ላፑን ቶሆ ቆህድ፥ ላፑን ቶሆ፥ ‘ታኒ ታ ናጋራ ኤራስ ታና ማራ’ ያግድ ኔኮ ዪኮ እያዉ አቶ ጋ።"

5 ሀዋረት ጎዳኮ፥ "አማኖ ኑስ ጉጃርክ" ያግዶሶና።

6 ጎዳይ፥ "ጋሸ አይፈ መላ አማኖይ ህንተዉ ደእኮ ‘ሀይሳ ዎላ ሾደታዳ አባ ግዶን ቶከታ’ ያግኮ ህንተዉ ኪተታና" ያግስ።

7 ጉጅድካ የሱሲ፥ "ህንተ ግዶፈ እሱዋስ ጎሻንቾይ ዎይኮ ዶርሰ ሄምያ አይለይ ደእኮ ኦሶ ጋደፐ ዎይኮ ዉደፐ ሶ ስምያ ዎደ፥ ‘ኤለ ሃያዳ ካ ማናዉ ኡታ’ ያገይ ደኢ? 8 ዴና፥ ‘ታዉ ካሆ ጊግሳ፤ ታኒ ማዳ፥ ኡያዳ አጋና ጋካናዉ ኤቃዳ ሙዛ። ሄሳፈ ጉየ፥ ኔኒ ቃስ ማሳነ ኡያሳ’ ያገነዬ? 9 ህዛ፥ ጎዳይ፥ አይለይ ኪታ ፖልዳ ግሾ አንጅዬ? 10 ሄሳ ግሾ፥ ህንተካ ኪተቶይሳ ኡባ ፖልዳ ዎደ፥ ‘ኑ ፓና አይለታ፤ ኦናዉ በሲያ ኦሱዋ ፖልዳ’ ያግተ" ያግስ።

ባሮ ሀርገፈ ጌይዳ ታሙ አሳታ

11 የሱሲ የሩሳላመ ብሸ ሳማርስነ ጋልላስ ግዶራ ካንድ አስ። 12 እስ ጉታ ገልያ ዎደ ባሮ ሀርገን ኦይከትዳ ታሙ አሳት እያ ደምዶሶና። ኤንትካ ሃሆን ኤቅድ፥ 13 "ጎዳ የሱሳ፥ ኑስ ቃታርክ" ያግድ ዋስዶሶና።

14 እ ኤንታ በእዳ ዎደ፥ "ብድ ህንተናተ አይሁደ ካህነ በስተ" ያግስ። ኤንቲ ኦግያ ቦላ ብሸ ፓፅዶሶና።✝17:14 ሌወ 14:1-32.

15 ኤንታፈ እሶይ ባ ፓፁዋ በእዳ ዎደ ቁ ግዳ ቃላን ፆሳ ቦንችሸ የሱሳኮ ስምስ። 16 እ፥ ሳማረ ቢታ አስ፥ ሽን የሱሳ ቶሆ ቦላ ጉፋንድ እያ ጋላትስ።

17 የሱሲ፥ "ፓፅዳይ ታሙ አሳታ ግዶኮናዬ? ያትን፥ ኡዱፉናት አዉ ብዶና? 18 ሀ አላጋ ኡራፐ*17:18 ሀ አላጋ ኡራፐ፦ ባሮ ሀርግያፈ ፓፅዳ ኡራይ አላጋ ጌተትዳይ እ አይሁደ ግዶና ግሾሳ። አትሽን፥ ሀር ስሚድ ፆሳ ጋላተይ ዴና ጉሰዬ?" ያግድ ኦይችስ። 19 ኡራኮ፥ "ነ አማኖይ ነና ፓስ፤ ደንዳዳ ባ" ያግስ።

ፆሳ ካዎተ ዩሳ

20 ፋርሳወት፥ "ፆሳ ካዎተይ አዉደ ያኔ?" ግድ የሱሳ ኦይችዶሶና። እ፥ "ፆሳ ካዎተይ በንትያ ማላን ዬና። 21 ቃስካ እያ፥ ‘ሀንና ዎይኮ ህንና ያጋናዉ ዳንዳኤና። አይስ ጊኮ፥ ፆሳ ካዎተይ ህንተ ግዶን ደኤስ’ " ያግድ ዛርስ።

22 የሱሲ ባ ታማረታኮ፥ "አሳ ናአ ጋላሳታፐ እሱዋ በአናዉ ህንተ አሞትያ ዎደይ ያና፥ ሽን ህንተ በኤከታ። 23 አሳይ፥ ‘እ ያን ደኤስ’ ዎይኮ፥ ‘ሀይሳን ደኤስ’ ያጋና፥ ሽን ኤንታና ካልድ ቦፕተ። 24 ዎልአን ዎልአምድ ሳሎ ጋፃፐ ጋፃ ፖእስያ መላ አሳ ናኣ ዩሳ ጋላሳይ ሄሳዳ ሀናና። 25 ሽን ሄስ ሀናናፐ ስን አሳ ናአይ ዳሮ ዋያናዉነ ሀ የለተን እፀታናዉ በሴስ። 26 ኖሄ ዎደ ሀንዳይሳ መላ አሳ ናአ ዎደን ሄሳዳ ሀናና።✝17:26 መ 6:5-8. 27 ኖሄይ ማርካብያን ገልዳ ቃማ ጋካናዉ አሳይ ምሸነ ኡይሸ፥ ኤክሸነ ገልሸ ደእሽን ዮ ሃይ ይድ ኡባ ይስስ።✝17:27 መ 7:6-24. 28 ሎፀ ላይንካ ሄሳ ሀንስ። አሳይ ምሸነ ኡይሸ፥ ሻምሸነ ባይዝሸ፥ ቶክሸነ ኬፅሸ፥ ጋምእዶሶና።✝17:28 መ 18:20—19:25. 29 ሎፀይ ሶዶመፐ ከይዳ ጋላስ ዲነ ጌተትያ ፁግያባይ ሳሎፐ ቡክድ ኡባ ይስስ። 30 አሳ ናአይ ቆንጭያ ዎደካ ሄሳዳ ሀናና።

31 "ሄ ጋላሳን ካረን ደእያ ኦንካ ኬ ግዶን ደእያባ ኤካናዉ ሶ ገሎፖ። ሄሳዳካ፥ ጋደን ደእያ አስ አይኮስካ ሶ ስሞፎ።✝17:31 ማቶ 24:17-18፤ ማር 13:15-16. 32 ሎፀ ማችዉ አኬክተ፤✝17:32 መ 19:26. 33 ባ ሸምፕዉ አሻናዉ ኮይያ አስ ኦንካ ይሳና፤ ባ ሸምፕዉ አድ እምያ ኦንካ እ አሻና።✝17:33 ማቶ 10:39፤ 16:25፤ ማር 8:35፤ ሉቃ 9:24፤ ዮሀ 12:25. 34 ታ ህንተዉ ኦዳይስ፤ ሄ ጋላሳን ናምኡ አሳት እስ አርሳን ዝንአና፤ እሶይ ኤከታና፥ ሀንኮይ አታና። 35 ናምኡ ማጫሳት ዎላ ጋጭሽን ኢስያ ኤከታና፥ ሀንክያ አታና። 36 ናምኡ አሳት ዎላ ጋደን ጎየይሳታፐ እሶይ ኤከታና፥ ሀንኮይ አታና"*17:36 እስ እስ ማፃፋታን ፓይዶ 36 ዴና። ያግስ።

37 ኤንቲ፥ "ጎዳዉ አዉ ኤከታኔ?" ያግድ ኦይችዶሶና።

እ፥ "ባዉት ደእያ በሳን አንኮት ሺቆሶና" ያግስ።