1 እስ ጋላስ የሱሲ ገንሳሬፀ አባ ማታን ኤቅዳሽን ዳሮ አሳይ እያ ዩሹዋ ኡንኤድ፥ እ ታማርስያ ፆሳ ቃላ ስኦሶና።✝ 2 ያን ሃ ጋፃን ደእያ ናምኡ ዎጎሎታ በእስ። ሞሎ ኦይክያ አሳት ዎጎሎታፐ ዎድ ባንታ ግትያ ሜጮሶና። ሞሎ ኦይክያ አሰ 3 ሄ ዎጎሎታፐ ስሞናይሳን ገልድ ቢታፈ ጉ ግዶ ሺሻና መላ ኦይችስ። ያትድ፥ ሄ ዎጎሉዋ ቦላ ኡትድ አሳ ታማርስስ።

4 ባ ትምርትያ ኦንግዳፐ ጉየ ስሞናኮ፥ "ገደ ጪሙዋኮ ሺሻዳ ሞሉዋ ኦይካናዉ ህንተ ግትያ የግተ" ያግስ።

5 ስሞን ዛሪድ፥ "አስታማርያዉ፥ ቃማ ኩመ ዳቡርሸ አቅድ አይኮካ ኦይክቦኮ፥ ሽን ነ ጊኮ ግትያ የጋና" ያግስ።✝

6 ኤንቲ ግትያ የግዳ ዎደ ግተይ ዳከታና ጋካናዉ ዳሮ ሞሎ ኦይክዶሶና።✝ 7 ሀራ ዎጎሎን ደእያ ባንታ ላገት ይድ፥ ባንታና ማዳና መላ ዉትድ ፄግዶሶና። ኤንቲ ይድ ናምኡ ዎጎሎት፥ ሃን ምተታና ጋካናዉ ሞሎን ኩንዶሶና።

8 ስሞን ጰፅሮስ ሄሳ በእዳ ዎደ፥ የሱሳ ስንን ኩንድድ፥ "ጎዳዉ፥ ታኒ ናጋራንቾ አስ ግድያ ግሾ፥ ታፐ ሻከታ" ያግስ። 9 እ ሄሳ ግዳይ፥ እነ እያራ ደኤይሳት ኦይክዳ ሞሉዋ ዳሮተን ማላለትዳ ግሾሳ። 10 ቃስ ስሞና ላገ ግድዳ ዛብድዮሳ ናይት ያይቆባራነ ዮሃንሳራ ማላለትዶሶና። የሱሲ ስሞናኮ፥ "ባቦፋ! ህዛፐ ኔኒ አሰ ኦይክያ አስ ግዳና" ያግስ። 11 ኤንቲ ዎጎሎታ ጋፃ ሺሽዳፐ ጉየ ኡባ አግድ የሱሳ ካልዶሶና።

12 የሱሲ ካታማታፐ እሱዋን ደእሽን እስ ባሮ ሀርገን* ኦይከትዳ አስ ሄ ካታማን ደኤስ። ሄ ኡራይ የሱሳ በእድ እያ ስንን ጉፋንድ፥ "ጎዳዉ፥ ነ ሸነ ግድኮ ታና ጌሻናዉ ዳንዳኣሳ" ግድ ዎስስ።

13 የሱሲ ባ ኩሽያ የድ ቦችድ፥ "ኤ፥ ታ ሸነ፤ ጌይያ" ያግስ። ኢራ ባሮ ሀርገይ ኡራፐ ክችስ።

14 የሱሲ፥ "ሀይሳ ኦደስካ ኦዶፓ፥ ሽን ባዳ ነናተ አይሁደ ካህነ በሳ። ነ ጌይዳይሳስ ማርካ ግዳና መላ ሙሰይ ኪትዳ ያርሾ ያርሻ" ግድ ኪትስ።✝

15 ግዶሽን፥ እያ ሱንይ ካሰፐ አድ ኤረትሸ ብስ። ዳሮ አሳይ እ ኦድያባ ስአናዉነ ባንታ ሀርግያፈ ፓፃናዉ ዮሶና። 16 ሽን የሱሲ ዳሮ ዎደ ጌማ በሲ ብድ ዎሴስ።

17 እስ ጋላስ የሱሲ ታማርስሽን ጋልላፐነ ይሁዳ ሄራ ኡባፈ ቃስ የሩሳላመፐ ይዳ ፋርሳወትነ ህገ አስታማረት ያን ኡትዶሶና። አሳ ፓያ ጎዳ ዎልቃይካ እያራ ደኤስ። 18 ሄ ዎደ አሳይ እስ ጉንዳ አስ ሀላራ ቶክድ ኤህዶሶና። ሶ ገልስድ እያ ስንን ዎናዉ ቆፕዶሶና። 19 ሽን አሳ ዳሮተፈ ደንዶይሳን ሶ ገልሳናዉ ፆነትድ ኬ ቦላ ከይድ፥ ካራ ቃዉፅድ፥ ሀርጋንቹዋ ሀላራ አሳ ሻክድ የሱሳ ስንን የግዶሶና።

20 የሱሲ ኤንታ አማኑዋ በእድ፥ "ላ አድያዉ፥ ነ ናጋራይ አቶ ጌተትስ" ያግስ።

21 ህገ አስታማረትነ ፋርሳወት፥ "ሀይስ ፆሳ ቦላ ያግድ ኦደተይ ኦኔ? እስ ፆሳፈ አትሽን፥ ሀር ናጋራ አቶ ጋናዉ ዳንዳኤይ ኦኔ?" ያግድ ቆፕዶሶና።

22 የሱሲ ኤንታ ቆፋ ኤርዳ ግሾ ኤንታኮ፥ "ህንተ ዎዛናን ሄሳ አይስ ቆፔቲ? 23 ‘ነ ናጋራይ ቁሸትስ ገይሳፈነ ደንዳዳ ባ ገይሳፈ አዉስ ካዉዪ?’ 24 ሽን ታ ሄሳ ግዳይ አሳ ናእ ሳአ ቦላ ናጋራ አቶ ጋናዉ ማት ደኤይሳ ህንተ ኤራና መላሳ።" ሄሳፈ ካልድ፥ ጉንዳ ኡራኮ፥ "ደንዳ፤ ነ አልጋ ቶካዳ ነ ሶ ባ" ያግስ። 25 እ ኤለስ ደንድድ ኤንታ ስንን ኤቅስ፤ እ ቶከትድ ይዳ አልጋ ቶክድ ፆሳ ጋላትሸ ባ ሶ ብስ። 26 ሄ ዎደ ኡባይካ ማላለትዶሶና። ፆሳ ጋላትሸ፥ "ሀች ግታ ማላታ በእዳ" ያግድ ያሸትዶሶና።

27 ሄሳፈ ጉየ፥ የሱሲ ያፐ ከይድ ብስ። ሌወ ጌተትያ እስ ቃራፃ ቃንፅሰይስ ቃራፃ ቃንፅስያ በሳን ኡትዳይሳ በእድ፥ "ታና ካላ" ያግስ። 28 እ ኡባባ አግድ፥ ደንድድ እያ ካልስ።

29 ሄ ሌወይ ባ ሶን ግታ ግብራ ጊግስስ። ዳሮ ቃራፃ ቃንፅሰይሳትነ ሀራ አሳት ካ ቦላ ኡትዶሶና። 30 ፋርሳወትነ ህገ አስታማረት፥ "ቃራፃ ቃንፀይሳታራነ ናጋራንቾታራ አይስ ሜትነ ኡዬቲ?" ያግድ የሱሳ ታማረታ ቦላ ዙዙምዶሶና።✝

31 የሱሲ ኤንታኮ፥ "ሀርጋንቾታሳፈ አትሽን፥ ፓፃታስ አክመ ኮሸና። 32 ታኒ ናጋራንቾታ ማሮታኮ ዛራናሳፈ አትሽን፥ ጌሻታ ፄጋናዉ ያቢከ" ያግድ ዛርስ።

33 ኤንቲ የሱሳኮ፥ "ዮሃንሳ ታማረት ዳሮ ዎደ ፆሞሶና፥ ዎሶሶና፤ ቃስ ፋርሳወታ ታማረትካ ሄሳ ኦሶና። ሽን ነይሳት ኡባ ዎደ ሞሶናነ ኡዮሶና" ያግዶሶና።

34 የሱሲ ኤንታኮ፥ "ማችዉ ኤከይስ ኤንታራ ደእሽን ፄገትዳ አሳይ ፆማና መላ ኦናዉ ዳንዳኤቲ? 35 ሽን ሙሹራይ ኤንታፈ ሻከታና ጋላሳይ ያና፥ ሄ ዎደ ኤንቲ ፆማና።"

36 ቃስ ያግድ ሌምሶ ኦድስ፤ "ኦራ ማኦፐ ፔድ ጋልአ ማኦ ቦላ ስከይ ኦንካ ባዋ። ሄሳ ኦኮ ኦራ ማኡዋ ፔስ፥ ኦራይ ጋልኣስ ጊገና። 37 ማልአንቶ ዎይነ ጋልአ ኦጎሮን ቆልያ ኦንካ ባዋ። ሄሳ ኦኮ፥ ኦራ ዎይነይ ጋልአ ኦጎሩዋ ሴስ፤ ዎይነይ ጉኬስ ኦጎሮይካ ማዶናባ ግዴስ። 38 ሄሳ ግሾ፥ ኦራ ዎይነይ ኦራ ኦጎሮን ቆለታናዉ በሴስ። 39 ህዛ፥ ጫላይ ሎኦ ግያ ግሾ፥ ጫላ ዎይነ ኡይ ስሚድ ማልአንቶ ኮየይ ኦንካ ባዋ" ያግስ።