1 ሄሳፈ ጉየ፥ የሱሲ ፆሳ ካዎተ ዎንገላ ሳባክሸ ካታማራነ ጉታራ አስ። ሄ ዎደ ታማነ ናምኡ ሀዋረት እያራ ደኦሶና። 2 ቃስ ቱና አያናፐነ ዱማ ዱማ ሀርግያፈ ፓፅዳ እስ እስ ማጫሳት እያራ ደኦሶና። ኤንትካ፥ ላፑን ቱና አያናት ከይዳ ማግደላ ማይራሞ፥✝ 3 ሄሮዲሳ ሹማ ኩዛ ማችዉ ዮሃና፥ ሶስናራነ ቃስ ሀራ ዳሮት ኤንታና ሚሸን ማደይሳት ደኦሶና።

4 ዳሮ አሳይ ዱማ ዱማ ካታማፐ እያኮ ሺቅን ሌምሶን ኤንታዉ ኦድስ። 5 "እስ ጎሻንቾይ ዘረ ዘራናዉ ከይስ። እ ዘርሽን እስ እስ ዘረይ ኦገ ጋፃን ዎድ የትስ፥ ሳሎ ካፎት ማፅዶሶና። 6 ሀራት ሻሎይ ጋርሳን ደእያ ቢታ ቦላ ዎዶሶና። ቡሮ ዶልዳ መላ ቢታን ላሆይ ባይና ግሾ ምጭዶሶና። 7 ሀራ ዘረይ ቃስ አጉን ግዶን ዎስ። አጉንራ ዎላ ድጭዳ ግሾ አጉንይ ጩልድ በሳን አሽስ። 8 ሀራት ሎኦ ቢታ ቦላ ዎዶሶና። ዶልዳ ዎደ ፄቱ ኩሸ አይፍዶሶና።" ሄሳ ኦድ ኦንግድ፥ ባ ቃላ ቁ ኦድ፥ "ስእያ ሀይ ደእያ ኡባይ ስኦ" ያግስ።

9 እያ ታማረት፥ "ሀ ሌምሱዋ ብርሸይ አይቤ?" ያግድ ኦይችዶሶና 10 እ፥ "ፆሳ ካዎተ ፁራ ኤራና መላ ህንተዉ እመትስ። ሽን ሀራት በእሸ ደሞና መላ፥ ስእሸ አኬኮና መላ ሌምሶን ኦዳይስ።✝

11 "ህዛ፥ ሀ ሌምሱዋ ብርሸይ ሀይሳ፦ ዘረ ያገትዳይ ፆሳ ቃላ። 12 ኦገ ጋፃን ዎዳ ዘረይ ቃላ ስኤይሳታ። ግዶሽን፥ ኤንቲ አማንድ አቶና መላ ፃላሄይ ቃላ ኤንታ ዎዛናፐ ማፅ ድጌስ። 13 ሻሎይ ጋርሳን ደእያ ቢታ ቦላ ዎዳ ዘረይ ቃላ ስእድ ኡፋይሳን ኤከይሳታ። ኤንቲ ሀእስ አማኖሶናፐ አትሽን፥ ፃጶይ ባይና ግሾ ፓጨይ ጋክያ ዎደ ኤለስድ ካዶሶና። 14 አጉን ግዶን ዘረትዳ ዘረይ ቃላ ስኤይሳታ። ኤንትካ አላምያ ቆፋን፥ ዱረተንነ ሳአ ዱሳ ሚኮተን ጩለትድ በሰይሳዳ አይፍቦኮና። 15 ሎኦ ቢታን ዎዳ ዘረይ ሎኦ ዎዛናን ቃላ ስእድ ናገይሳታነ ዳንዳአን ምንድ አይፈ አይፈይሳታ።

16 "ፆምፐ ኦይድ፥ ዳቾ ካመይ ዎይኮ አርሳፈ ጋርሳን ዎይ ዴና። ገልያ አስ በአና መላ ቃ በሳን ዎስ።✝

17 "ሄሳ ግሾ፥ ቆንጨ ከዮና ቆሰትድ አትያባይ፥ ኤረቶና ጌምድ አትያባይ ዴና።✝

18 "ህዛ፥ ህንተ ቃላ ዋት ስእያኮ አኬክተ። ደእያ ኡባስ ጉዠትድ እመታና፥ ባይናይሳስ ሀር አቶሽን እያዉ ደእያ ጉያካ እያፐ ኤከታና" ያግስ።✝

19 የሱሳ አየራነ እሻታራ እያኮ ይዶሶና። ሽን አሳ ዳሮተፈ ደንዶይሳን እያ ደማናዉ ዳንዳእቦኮና። 20 እስ አስ የሱሳኮ፥ "ነ አየራነ ነ እሻታራ ነና ኮይድ ካረን ናጎሶና" ያግስ።

21 የሱሲ ዛሪድ፥ "ፆሳ ቃላ ስእድ ኦሶን ፔሸይሳት ኡባይ፥ ታዉ አዮነ ታዉ እሻ" ያግስ።

22 እስ ጋላስ የሱሳራነ እያ ታማረታራ እስፈ ዎጎሎን ገልድ፥ "አባ ፕኖስ" ያግስ። ኤንትካ ባናዉ ደንድዶሶና። 23 አባ ቦላራ ኤንቲ ፕናናዉ ብሽን የሱሲ ስክስ። ቆፖና ምኖ ጫርኮይ አባ ቦላ ደንድስ። ሃ ዎጎሉዋን ገልን ዎጎሎይ ምተተ ኦይክያ ዎደ ኡባይ ባብዶሶና።

24 እያ ታማረት እያኮ ሺቅድ፥ "ጎዳዉ! ጎዳዉ! ኑ ዮስ" ያግድ የሱሳ ደንዶሶና።

የሱሲ ደንድድ ጫርኩዋነ ጎትያ ሀንቅስ። ኤለስድ ጫርኮይነ ጎተይ ዎፑ ግስ፤ ሳሮተ ስምስ። 25 የሱሲ ባ ታማረታኮ፥ "ህንተ አማኖይ አዉኔ?" ያግስ። ኤንትካ፥ ያይሸነ ማላለትሸ እሶይ እሱዋኮ፥ "ጫርኮይነ ሃይ ኪተተይስ፥ እ ሀይስ ኦኔ" ያግዶሶና።

26 አባ ፕንድ ጋልላ ባጋራ ደእያ ገርገሶነ ቢታ ጋክዶሶና። 27 የሱሲ ዎጎሎፐ ከይድ ሳአን ዎሽን ቱና አያናን ኦይከትዳ ኡራይ ካታማፐ ከይድ እያራ ጋሄትስ። ዳሮ ላይ ማኦ ማኦና ካሎ ዱፎን ደኤስፐ አትሽን፥ ሶ ገለና። 28 የሱሳ በእዳ ዎደ እያ ስንን ጉፋንድ፥ ባ ቃላ ቁ ኦድ፥ "ኡባፈ ቦላ ፆሳ ናአዉ የሱሳ ኔራ ታዉ አይብ እስፈተ ደኢ? ሀያና ታና ሀእ ኡንኤፋርክ" ያግስ። 29 ሄሳ እ ግዳይ፥ ቱና አያናይ ኡራፐ ከያና መላ የሱሲ ሀንቅዳ ግሾሳ። ዳሮ ዎደ ቱና አያናይ እያ ሃርዳ ግሾ ሳንላታንነ ቶሆ ቃችያ ብራታን ቃሸትድ ናገቴስ። ሽን ቃሹዋ ዱድ ቱና አያናን ላገትድ መላ ቢታ ገልስ።

30 የሱሲ፥ "ነ ሱንይ ኦነ" ያግድ ኦይችስ።

እ፥ ዳሮ ቱና አያናት እያ ኦይክዳ ግሾ ባና፥ "ሌግዮና" ግስ። 31 ቱና አያናት ባንታና ስኦለ ኪቶና መላ ዎስዶሶና።

32 ሄ በሳን ዞዘ ቦላ ምያ ጉዱን ዉደይ ሄመቴስ። ህን ጉዱንታን ገልኖ ግድ ዎስዶሶና፥ እካ "ገልተ" ግስ። 33 ቱና አያናት ኡራፐ ከይድ ጉዱንታን ገልዶሶና። ዉደይ ደርያፐ ዱገ ጉርጉፅድ አባን ገልስ።

34 ሄንንቾት ሀንዳይሳ በእዳ ዎደ ዎፅ ብድ፥ ካታማንነ ጉታ ኡባን ኦድዶሶና። 35 አሳይ ሀንዳባ በአናዉ ከይድ የሱሳኮ ይዶሶና። ቱና አያናይ ከይዳ ኡራይ ማኦ ማእድ፥ እያ ዎዛናይ ስምን፥ የሱሳ ቶሆ ማታን ኡትዳይሳ ደምድ ያይዶሶና። 36 እያ በእዳ አሳይ ቱና አያናን ኦይከትዳ ኡራይ ዋንድ ፓፅዳኮ ኦድዶሶና። 37 ገርገሶነ ዩሾን ደእያ አሳይ ግታ ያሽ ያይድ፥ የሱሲ ባንታ ማታፐ ባና መላ ዎስዶሶና። እ ዎጎሉዋን ገልድ ጉየ ስምስ።

38 ቱና አያናይ ከይዳ ኡራይ የሱሳራ ዳናዉ ዎስስ። 39 ሽን የሱሲ እያኮ፥ "ነ ሶ ስማ፥ ፆሳይ አይ መላ ግታባ ነዉ ኦዳኮ ኦዳ" ያግድ ሞይዝስ። ኡራይካ የሱሲ አይ መላ ግታባ እያዉ ኦዳኮ ካታማ ኡባን ማርካትሸ ብስ።

40 አሳይ ናግድ ጋምእዳ ግሾ የሱሲ ስምያ ዎደ ሞክ ኤክዶሶና። 41 አይሁደ ዎሳ ኬ ሀላቃ ግድዳ እያሮሳ ጌተትያ ኡራይ ባ ሶ ያና መላ የሱሳ ቶሁዋ ቦላ ዎድ ዎስስ። 42 እያዉ ታማነ ናምኡ ላይ ግድዳ ማጫ ናእ ሳከታዳ ሀይቆስ ጋካዳ ደአዉሱ። የሱሲ ብያ ዎደ አሳይ እያ ኡንኤስ። 43 ታማነ ናምኡ ላይ ሱ ጎግሸ ጋምእዳ ማጫስ ደአዉሱ። እያ ባዉ ደእያ ሚሽያ አክመታስ እማዳ ኦንጋሱ። ሽን ፓፃናዉ ዳንዳአቡኩ። 44 እያ የሱሳስ ጉየ ባጋራ ሺቃዳ፥ እያ አፍላ ማጫራ ቦቻሱ፥ ኢራካ ጎግያ ሱይ ኤቅ አግስ።

45 የሱሲ፥ "ታና ቦችዳይ ኦኔ?" ያግስ። ኡባይ፥ "ኑ ቦችቦኮ" ያግን፥ ጰፅሮስ፥ "አስታማርያዉ፥ ዳሮ አሳይ ካልሽንነ ኡንኤሽን በአሸ ዋናዳ፥ ‘ታና ቦችዳይ ኦኔ?’ ጋይ" ያግስ።

46 ሽን የሱሲ፥ "እስ አስ ታና ቦችስ፤ አይስ ጊኮ፥ ዎልቅ ታፐ ከዮይስ ታዉ ኤረትስ" ያግስ።

47 ማጫስያ፥ እባይ ቆንጭዳይሳ ኤርዳ ዎደ ኮኮራሸ ያዳ የሱሳ ቶሁዋ ቦላ ኩንዳሱ። አይስ ቦችዳኮነ ዋናዳ ኤለሳዳ ፓፅዳኮ አሳ ኡባ ስንን ማርካታሱ። 48 እ፥ "ታ ናተ፥ ነ አማኖይ ነና ፓስ፤ ሳሮ ባ" ያግስ።

49 የሱሲ ኦዳ ኦንጎና ደእሽን፥ አይሁደ ዎሳ ኬ ሀላቃ፥ እያሮሳ ሶፐ እስ አስ ይድ፥ "እያሮሳ፥ ነ ናእያ ሀይቃሱ፤ አስታማርያ መላ ዳቡርሶፋ" ያግስ።

50 ሽን የሱሲ ሄሳ ስእድ እያሮሳኮ፥ "ባቦፋ! አማና፥ ነ ናእያ ፓፃና" ያግስ።

51 የሱሲ እያሮሳ ሶ ጋክዳ ዎደ ጰፅሮሳፐ፥ ዮሃንሳፐ፥ ያይቆባፐ፥ ናኤ አዋፐነ አየፐ አትሽን፥ ሀር ገላና መላ ኮይቤና። 52 ሄ በሳን ደእያ አሳ ኡባይ ናኤስ ምሸትድ ዬክሽን፥ የሱሲ፥ "ዬኮፍተ ናእያ ስካሱፐ አትሽን፥ ሀይቃቡኩ" ያግስ።

53 አሳይ ናእያ ሀይቅዳይሳ ኤርያ ግሾ፥ እያ ኦዳ ለቅድ ሚጭዶሶና። 54 ሽን የሱሲ ናኤ ኩሽያ ኦይክድ፥ "ናተ ደንዳ" ያግስ። 55 ናኤስ ሸምፖይ ስምን ደንዳ ኤቃሱ። የሱሲ ኤንታኮ፥ "እዉ ምያባ እምተ" ያግስ። 56 ናኤ አዋራነ አየራ ማላለትዶሶና። ሽን የሱሲ ሀይሳ፥ "ኦደስካ ኦዶፕተ" ያግስ።