1 ኤንቲ የሩሳላመ ማትሸ፥ ሻማሆ ዙማ ማታን ደእያ ቤተፋገነ ብታነ ካታማታ ጋክዶሶና። የሱሲ ባ ታማረታፐ ናምአታ ስን ኪትድ፥ 2 "ህንተፈ ስንን ደእያ ጉታ ቢተ፤ ያ ገልዳ መላ ኦንካ ቶግቦና ቃሾን ደእያ ሀረ ማር ህንተ ደማና፥ እያ ብልድ፥ ሃ ኤክ ዪተ። 3 ኦንካ ህንተና፥ ‘ሀይሳ አይስ ኦቲ?’ ያግድ ኦይችኮ፥ ‘ጎዳይ እያ ኮዬስ፥ ኤለስድ ሃ የዳና’ ያግተ" ያግስ።

4 ኤንቲ ብድ፥ ሀረ ማር ካረ ቦላ ኦገ ማታን ቃሸትድ ደኤይሳ ደምድ ብልዶሶና። 5 ሄ በሳን ኤቅዳ እስ እስ አሳት ኤንታኮ፥ "ሀረ ማራ ዋታናዉ ብሌቲ?" ያግድ ኦይችዶሶና። 6 እያ ታማረት የሱሲ ባንታና ኪትዳይሳ ኦድን፥ አሳት የድ አግዶሶና። 7 ኤንቲ ሀረ ማራ የሱሳኮ ኤህድ፥ ባንታ ማኡዋ እያ ዞኮን ሂፅን የሱሲ ሄ ሀረ ማራ ቶግስ። 8 ዳሮ አሳይ ባንታ ማኡዋ ኦግያን ሂፅዶሶና፤ ቃስ ሀራት ም ታሸ ታሽድ፥ ኦገን ሂፅዶሶና። 9 የሱሳፐ ስንራ ሄመትያ አሳይነ እያ ካልያ አሳይ ባንታ ቃላ ቁ ኦድ፥

"ሆሳና!* ፆሳይ ጋላተቶ!

ጎዳ ሱንን የይስ አንጀትዳይሳ።✝

10 ጎዳ ሱንን ያ ኑ አዋ

ዳዊታ ካዎተይ አንጀትዳይሳ።

ኡባፈ ቦላ ሳሎን

ደእያ ፆሳይ ጋላተቶ"

ያግዶሶና።

11 የሱሲ የሩሳላመ ብድ፥ ፆሳ ኬ ገልስ። ቃስ ኡባባ ዩይ ፄልዳፐ ጉየ፥ ሳእ ቃምያ ግሾ፥ ታማነ ናምኡ ታማረታራ ብታነ ካታማ ብስ።

12 ዎንተ ጋላስ ኤንቲ ብታነፐ ከይድ ብሽን፥ የሱሲ ኮሻትስ። 13 ሃሆን እስ ባላሰ ምዉ ሀይ ፃላላ ማአ ኡትዳሮ በእድ፥ እ ቦላ አይፈይ በንትኮ ግድ፥ በአናዉ ኢኮ ብስ፥ ሽን ኢኮ እ ብያ ዎደ፥ ሀይ ፃላላፐ አትሽን፥ እስ አይፈካ ደምቤና፤ አይስ ጊኮ፥ ባላሰይ አይፍያ ዎደይ ጋክቤና። 14 የሱሲ ሄ ባላስዉ፥ "ህዛ፥ አስ ኔፐ መርናዉ አይፈ ሞፖ" ያግስ። እያ ታማረት እ ገይሳ ስእዶሶና።

15 ኤንቲ የሩሳላመ ብዶሶና፤ የሱሲ ፆሳ ኬ ገልድ፥ ያን ባይዘይሳታነ ሻመይሳታ ካረ ጎዶ ኦይክስ፤ ቃስ ሚሸ ላመይሳታ ፃርጴዛነ ሆለ ባይዘይሳታ ኦይድያ ሽር የግድ፥ 16 አስ አይብባካ ቶክድ፥ ፆሳ ኬ ግዶራ አና መላ ድግስ። 17 የሱሲ አሳ ሀይሳዳ ያግድ ታማርስስ፦ "ጌሻ ማፃፋን፥ ‘ታ ኬይ አስ ኡባይ ፆሳ ዎስያ ኬ ግዳና’ ጌተትድ ፃፈትስ። ሽን ህንተ እያ ፓንጋት ቆሰትያ ጎንጎሎ ኦደታ" ያግስ።✝

18 ካህነ ሀላቃትነ ህገ አስታማረት ሄሳ ስእድ፥ እያ ዎናዉ ኦገ ኮይዶሶና። ሽን ዳሮ አሳይ እያ ትምርትያን ማላለትያ ግሾ፥ እያዉ ባብዶሶና።

19 ሳአይ ኦማርስያ ዎደ የሱሲነ እያ ታማረት ካታማፐ ጋፃ ከይዶሶና።

20 ኤንቲ ዎንተ ጋላስ ሄ ኦግያራ አሸ፥ ሄ ባላስያ ፃጶራ መልዳሮ በእዶሶና። 21 ጰፅሮስ አኬክድ፥ "አስታማርያዉ፥ ሄኮ፥ ኔኒ ባድዳ ባላስያ መላሱ" ያግስ።

22 የሱሲ ዛሪድ፥ "ፆሳ አማንተ። 23 ታኒ ህንተዉ ቱማ ኦዳይስ፤ ኦንካ ባ ዎዛናን ስና ግዳባይ ሀናናይሳ አማንድ፥ ሀ ዙማ፥ ‘ደንዳዳ አባን ኩንዳ’ ያግኮ እያዉ ሀናና።✝ 24 ሄሳ ግሾ፥ ታኒ ህንተዉ ኦዳይስ፤ ፆሳ ህንተ ዎስያባነ ኦይችያባ አይባ ግድኮካ ኤክዳዳ አማንተ፥ ህንተ ኤካና። 25 ፆሳ ዎሳናዉ ህንተ ኤቅያ ዎደ፥ ሳሎን ደእያ ህንተ አዋይ ህንተ ናጋራ አቶ ጋና መላ፥ ኦንካ ህንተና ናቅዳባይ ደእኮ፥ እያዉ አቶ ጊተ። 26 ሽን አሳ ናጋራ ህንተ አቶ ጎና እፅኮ፥ ሳሎን ደእያ ህንተ አዋይካ ህንተ ናጋራ ህንተዉ አቶ ጌና" ያግስ።

27 ኤንቲ ዛሪድ የሩሳላመ ብዶሶና። የሱሲ ፆሳ ኬን ሄመትሽን፥ ካህነ ሀላቃት፥ ህገ አስታማረትነ ጭማት እያኮ ይድ፥ 28 "ኔኒ ሀይሳ ኦናዉ ነዉ አይ ማት ደኢ? ዎይኮ ነዉ ሀ ማታ እምዳይ ኦኔ?" ያግዶሶና።

29 የሱሲ ዛሪድ፥ "ታ ህንተና እስባ ኦይቻና፥ ታዉ ኦድተ። ታ ቃስ ሀይሳ አይ ማታን ኦያኮ፥ ህንተዉ ኦዳና። 30 ዮሃንሳ ፅንቃተይ ፆሳፈየ ዎይኮ አሳፔ? ታዉ ኦድተ" ያግስ።

31 ኤንቲ ባንታ ግዶን ፓላማ ዶምድ፥ "ኑኒ፥ ‘ፆሳፈ’ ጊኮ፥ እ ኑኮ፥ ‘ያትን፥ ዮሃንስ ኦድዳይሳ አይስ አማንበከቲ?’ ያጋና። 32 ‘አሳፐ ጊኮ’ አሳ ኡባይ ዮሃንስ ናበ ግደይሳ ኤሮሶና።" ሄሳ ግሾ፥ አሳስ ያይዶሶና። 33 ሄሳ ግሾ፥ ኤንቲ የሱሳኮ፥ "ኑኒ ኤሮኮ" ያግድ ዛርዶሶና።

የሱሲ፥ "ታንካ ሀይሳ አይ ማታን ኦያኮ፥ ህንተዉ ኦድከ" ያግስ።