ናህመ ማፃፋ 2

ናህመይ የሩሳላመ ቡሳ

1 አርፀክስስ ካዎትዳ ላታማን ላይን፥ ንሳነ ጌተትያ አጌናን፥ እስ ጋላስ ካዋ ስንን ዎይነ ኡሻ ሺሻስ። ሄ ጋላሰፐ አትሽን፥ ካሰ ካዋ ስንን አዛና ኤርከ። 2 ሄሳ ግሾ፥ ካዎይ፥ "ነና ሳክያባይ ባዋ፥ ሽን ሀይሳ መላ አይስ አዛናዲ? ሄስ ነ ዎዛናይ እስባን አዛንዳይሳ በሴስ" ያግስ።

ያግን፥ ታኒ ዳሮ ያያዳ፥ ካዋኮ፥ 3 "ካዎይ መርናዉ ካዎቶ! ታ ማይዛት ሞገትዳ ካታማይ ላለትድ ይን፥ ቃስ ሄ ካታማ ድርሳ ፐንገት ታማን ፁገትን አይስ አዛንክና?" ያጋስ።

4 ካዎይ ዛሪድ፥ "ያትን፥ ሀእ ታ ነዉ አይ ኦና መላ ኮያይ?" ያግስ።

ታኒ ሳሎ ፆሳ ዎሳ ስማዳ፥ 5 ካዋኮ፥ "ካዋዉ፥ ታ ነ ስንን ሳባ ደምዳባ ግድኮነ ታ ኦይሻይ ኡፋይስያባ ግድኮ፥ ይሁዳ ቢታ፥ ታ ማይዛት ሞገትዳ ካታማ ባዳ ዛራ ኬፃና መላ ታና የዳርክ" ያጋስ።

6 ሄ ዎደ ካውያ፥ ካዋ አርፀክስሳ ማታን ኡትዳ ደእሽን፥ ካዎይ ዛሪድ፥ "ነ ኦገይ አይ መላ ዎደ ኤካኔ? ነ አዉደ ስማኔ?" ያግድ ታና ኦይችስ። ታኒ ታ ስማና ዎድያ እያዉ ኦድን፥ ካዎይ ኡፋይትድ ታና የድስ።

7 ቃስ፥ "ካዋ፥ ነና ኡፋይስያባ ግድኮ፥ ታ ይሁዳ ጋካናዉ ሄ ቢታራ ካንዳ አና መላ ኤፍራፂሳ ሻፋፐ ዉሎሀ ባጋራ ደእያ ቢታ ሃረይሳታስ ዳብዳበይ ፃፈቶ" ያጋዳ ካዋ ዎሳስ። 8 ሄሳዳካ፥ "ፆሳ ኬ ፐንግያ ጊግሳናዉ፥ ካታማ ግምበ ድርሳ ድራናዉነ ታ ዳና ኬ ኬፃናዉ ታዉ ም እማና መላ ካዎ ዎራ ናግያ አሳፋስ ዳብዳበይ ፃፈቶ" ያጋዳ ኦይቻስ። ፆሳ ሎኦ ኩሸይ ታራ ደእያ ግሾ ካዎይ ታኒ ኦይችዳባ ኡባ እሚስ።

9 ካዎይ ታራ ጉ ቶራ ሞጮናታነ ፓራ ቶገይሳታ የድስ። ታኒ ኤንታራ እስፈ ኤፍራፂሳ ሻፋፐ ዉሎሀ ባጋ ቢታ ጋካዳ ካዎይ የድዳ ዳብዳብያ ሄ ቢታ ሃረይሳታስ እማስ። 10 ሽን ሆሮና ካታማ አስ ግድዳ ሳንባላፅነ አሞነ ቢታ ሀላቃ ግድዳ ፆበይ፥ "እስራኤለ አሳስ ሎኦባ ኦያ አስ ይስ" ጌተትዳይሳ ስእዳ ዎደ ዳሮ ይሎትዶሶና።

ናህመይ የሩሳላመ ግምበ ድርሳ በእስ

11 ታኒ የሩሳላመ ጋካዳ ሄ ጋላስ ያን ጋምአስ። 12 የሩሳላመስ ታኒ ኦና መላ ፆሳይ ታ ዎዛናን ዎዳ ቆፋ ኦደስካ ኦዳብከ። ሄሳፈ ጉየ፥ ታራ ደእያ አሳፐ ጉታ ኤካዳ ቃማ ደንዳዳ ባስ። ሄ ዎደ ታኒ ቶግዳ መህያፐ ሀራ ቶጋ መሄይ ኑስ ባዋ። 13 ታኒ ብላሄ ደንዳዳ ዛንጋራ ፐንግያራ ካንዳ፥ ዳወ ፑልቶ ጌተትያ በሳራ አዳ፥ ፕቶ ፐንገ*2:13 ፕቶ ፐንገ፦ የሩሳላመ ካታማ ቡረን ኬ ፕቶ ኡባ የግያ በሲ ጉሱ። ጌተትያ በሳ ጋካናዉ ባስ። ያራ አሸ ላለትዳ የሩሳላመ ግምብያነ ታማን ፁገትዳ ግምበ ፐንገታ በአስ። 14 ሄሳፈ ስማዳ ፑልቶ ፐንግያኮነ ካዋ ተቀ ሃይ ደእያ በሳ ባስ። ግዶሽን፥ ታ ቶግዳ መሄይ አያ ኦገ ደማብከ። 15 ሄሳ ግሾ፥ ቃማ ቀድሮና ዛንጋራ ግዶራ አዳ ግምብያ በአስ። ዉርሰን፥ ጉየ ስማዳ ዛንጋራ ፐንግያራ ካታማ ገላስ።

16 ያን ደእያ ሀላቃታፐ ኦንካ ታኒ አዉ ብዳኮ፥ ዎይኮ አይ ኦዳኮ ኤርቤና። አይስ ጊኮ፥ ታኒ አይሁደታስ፥ ካህነታስ፥ ቦንቸትዳ አሳታስ፥ ሀላቃታስነ ኦሱዋ ኦናዉ ደእያ አሳፐ ኦደስካ ታ ቆፋ ኦዳብከ። 17 ሄሰፈ ጉየ፥ ኤንታኮ፥ "ኑኒ አይ መላ መቶን ደእያኮ በኤታ፤ የሩሳላመ ካታማይ ላለትስ፤ ግምበ ፐንገት ታማን ፁገትዶሶና። ሀ ዪተ፥ የሩሳላመ ግምብያ ዛሪድ ግምቦስ፤ ኑና ጋክዳ ዬላ አነ ድጎስ" ያጋስ። 18 ቃስ ፆሳ ሎኦ ኩሸይ ታራ ደኤይሳነ ካዎይ ታዉ ኦድዳባ ኡባ ኤንታዉ ኦዳስ።

ኤንቲ ዛሪድ፥ "አነ ደንዶስ፤ ዛሪድ ግምቦስ" ያግድ ባንታ ኩሽያ ሎኦ ኦሶስ ምንዶሶና።

19 ሽን ሆሮና ካታማ አስ ግድዳ ሳንባላፅ፥ አሞነ ቢታ አስ ግድዳ ፆበይነ አራባ ቢታ አስ ግድዳ ጌሳመይ ሄሳ ስእዳ ዎደ፥ ኑ ቦላ ቀልቅስድ ሚጭዶሶና። "ሀይስ ህንተ ኦያባይ አይቤ? ዎይኮ ካዋ ቦላ ማካላናዉ ኮዬቲ?" ያግድ ኦይችዶሶና።

20 ታኒ ዛራዳ፥ "ሳሎ ፆሳይ ኑና ፖልሳና፤ ኑኒ እያ አይለት ደንድድ ኦና። ሽን የሩሳላመን ህንተዉ ግሾይ ዎይኮ ህንተና ጋያባይ ዎይኮ ህንተና ቆፍስያባይ ባዋ" ያጋስ።