Neemias 8

እዝር ህገ ማፃፋ ናባብስ

1 ላፑን አጌናይ ገልያ ዎደ እስራኤለ አሳይ ባንታ ካታማን ካታማን ኡትዶሶና። ሄ አጌናን ኤንቲ ኡባይ እስፈ ሃ ፐንገ ስንን ደእያ ዳባባን ሺቅዶሶና። ኤንቲ ጎዳይ ሙሰ ባጋራ እስራኤለ አሳስ እምዳ ህገ ማፃፋ ኤሀና መላ ፃፍያ እዝራ ኦይችዶሶና። 2 ያትን፥ ካህነይ እዝር፥ ላፑን አጌናን ኮይሮ ጋላሳን፥ አደይ፥ ማጭነ አኬካናዉ ዳንዳእያ አስ ኡባይ ሺቅዳ በሳ ህገ ማፃፋ ኤህስ። 3 ሃ ፐንገ ስንን ደእያ ዳባባን ኤቅድ፥ አደስ፥ ማጫስነ አኬካናዉ ዳንዳእያ አሰ ኡባስ ህገ ማፃፋ ዎንታፈ ጋላስ ጋካናዉ ናባብስ። አሳይካ ሀይዝድ ስእዶሶና።

4 ፃፈይ እዝር፥ ናባባናዉ ምፈ ኦሰትዳ ቃ በሳን ከይድ ኤቅስ። እያፐ ኡሻቻ ባጋራ ማትታ፥ ሻማያ፥ አናያ፥ ኡራያ፥ ካልቀነ ማእሰያ ጌተትያ አሳት ኤቅዶሶና። ሀድርሳ ባጋራ ፓዳያ፥ ምሳኤላ፥ ማልክያ፥ ሀሱማ፥ ሀሽባዳ፥ ዛካርያሳነ ማሱላማ ጌተትያ አሳት ኤቅዶሶና።

5 እዝር አሳ ኡባፈ ቅያ በሳን ኤቅያ ዎደ ኡባይ እያ ሎይድ ፄልሽን፥ ኤንታ ስንን ህገ ማፃፋ ዶይስ። እ ዶይያ ዎደ ኤንቲ ኡባይ ኡትዳ በሳፈ ደንድ ኤቅዶሶና። 6 እዝር ጎዳ፥ ግታ ፆሳ ጋላትስ። አሳ ኡባይ ባንታ ኩሽያ ደንድ፥ "አምንእ! አምንእ!" ያግዶሶና። ኤንታ ሶምኦይ ሳአ ቦቻና ጋካናዉ ጉፋንድ ጎዳ ጎይንዶሶና።

7 ኤንቲ ባንታ ኤቅዳ በሳን ደእሽን፥ ሌወት፥ እያሱይ፥ ባን፥ ሳራባ፥ ያምና፥ አቁባ፥ ሳባታ፥ ሆዳ፥ ማሰያ፥ ቃልፃ፥ አዛራ፥ ዮዛባታ፥ ሀናንነ ፓላህ ህግያ አሳይ አኬካናዳ ብርሸ ቆንጭስዶሶና። 8 ኤንቲ ፆሳ ህገ ማፃፋ ናባብዶሶና፤ ቃስ ናባበተይስ ዎይግያኮ አሳይ ኤራና መላ ብርሸ ቆንጭስዶሶና።

9 አሳይ ህገ ቃላ ስእዳ ዎደ ዬክዳ ግሾ፥ ቢታ ሃርያ ናህመይ፥ ካህነነ ፃፈ ግድዳ እዝርነ አሳስ ማፃፋ ብርሽያ ሌወት፥ "ሀ ጋላሳይ ጎዳስ፥ ህንተ ፆሳስ ጌሻ ጋላስ ግድያ ግሾ፥ ዬኮፍተ ዎይኮ አፉፆፍተ" ያግዶሶና።

10 ናህመይ፥ "ብድ ዶረትዳ ካ ሚተ፤ ማልእያ ኡሽ ኡይተ፤ ቃስ አይኮይ ባይናይሳታስ ህንተይሳፈ ሻክድ እምተ። ሀች ጋላሳይ ኑ ጎዳስ ጌሻ ጋላስ። ጎዳ ኡፋይሳይ ህንተዉ ዎልቃ ግድያ ግሾ አዛኖፕተ" ያግስ።

11 ሌወት፥ "ሀች ጋላሳይ ጌሻ ጋላስ ግድያ ግሾ፥ አዛኖፕተ፤ ስእ ጊተ" ያግድ አሳ ስእ ኦዶሶና። 12 ናበበትዳ ቃላ ብርሸይ ኤንታዉ ገልዳ ግሾ፥ አሳይ ኡፋይሳን ማናዉ፥ ኡያናዉነ አይኮይ ባይናይሳታስ ሻክድ እማናዉ ሶ ብዶሶና።

13 ሄ አጌና ናምአን ጋላሳን ኮቻታ ሀላቃት፥ ካህነትነ ሌወት ህገ ቃላ ኤንታዉ ብርሻና መላ እዝራኮ ይዶሶና። 14 ኤንቲ ታማርያ ዎደ ላፑን አጌናን ሻቃራ ባኣለ ቦንችያ ዎደ እስራኤለ አሳይ ሻቃራ ጋርሳን ኡትድ ቦንቻና መላ ፆሳይ ሙሰ ባጋራ ኪትዳይሳ ደምዶሶና። 15 ሻቃራ ባኣለ ቦንቻናዉ ካታማታንነ የሩሳላመን ሀይሳዳ ያግድ አዋጅዶሶና፤ "ሻቃራ ሻቃራናዉ ደረ ቦላ ከይድ ዛይተ ሻማሆ፥ ዎራ ሻማሆ፥ ባርሰኔተ ም፥ ዛምባ ሀይነ ም ኡባፈ ህገን ፃፈትዳይሳዳ ታሸ ኤህተ" ያግዶሶና።

16 ሄሳ ግሾ፥ አሳይ ብድ ም ታሸ ኤህድ ባንታ ፖቀ ኬ ቦላ ደእያ ደንባን፥ ባንታ ዛባን፥ ፆሳ ኬ ዳባባን፥ ሃ ፐንግያ ዳባባንነ ኤፍሬማ ፐንግያ ዳባባን ሻቃራ ሻቃርዶሶና። 17 ድኤተፈ ስምዳ አሳ ኡባይ ሻቃራ ሻቃርድ እያ ጋርሳን ኡትዶሶና። ናወ ናኣ እያሱ ዎደፐ ሃ ስምን ኤንቲ ሀይሳ መላ ባኣለ ቦንች ኤሮኮና። ሄሳ ግሾ፥ ኤንቲ ኡባይ ዳሮ ኡፋይትዶሶና። 18 ባለይ ዶመትድ ዉራና ጋካናዉ ጋላስ ጋላስ እዝር ፆሳ ህገ ማፃፋፐ አሳስ ናባቤስ። ባልያ ላፑን ጋላስ ቦንችዳፐ ጉየ ሆስፑን ጋላሳን ህገይ ኪተይሳዳ ጌሻ ዱላታ ኦዶሶና።