Neemias 9

አሳይ ባንታ ናጋራ ፓፅዶሶና

1 ሄ አጌናን ላታማነ ኦይዳን ጋላሳን እስራኤለ አሳይ እስፈ ሺቅድ፥ ካዮ ማኦ ማእድ፥ ባንታ ሁጰን ባና ቆልድ ፆምዶሶና። 2 ባንታና አላጋ ደረ አሳፐ ሻክዶሶና። ሄሰፈ ጉየ ደንድ ኤቅድ ኤንትነ ኤንታ አዋት ኦዳ ናጋራ ኡባ ፓፅዶሶና። 3 ኤንቲ ያን ኤቅድ ደእሽን ሄ ሳተ ኩመ ጎዳ ኤንታ ፆሳ ህገ ማፃፋይ ኤንታዉ ናባበትስ። ቃስ ሀራ ሄ ሳተ ባንታ ናጋራ ፓፅሸ ጎዳ ባንታ ፆሳ ጎይንዶሶና።

4 ሌወት፥ እያሱይ፥ ባን፥ ቃድምኤል፥ ሳባና፥ ቡን፥ ሳራባ፥ ባናን፥ ከናን ማድራከ ቦላ ከይድ ባንታ ቃላ ቁ ኦድ ጎዳ፥ ባንታ ፆሳ ዎስዶሶና። 5 ሌወት፥ እያሱይ፥ ቃድምኤል፥ ባን፥ አሳባን፥ ሳራብ ሆድ፥ ሳባንነ ፓታህ፥ "ደንድ ኤቅድ፥ መርናፐ መርና ጋካናዉ ደእያ ጎዳ ህንተ ፆሳ ጋላትተ!"

"እያ ቦንቾ ሱን አንጅተ፤ ጋላታፐነ አንጆፈ አያ እያ ሱን ሳቢተ።" 6 ፆሳዉ፥ ነ ፃላል ጎዳ! ኔኒ ሳሎታነ ቃ ሳሎታን ደእያ መተታ፥ ሳኣነ እያ ቦላ ደእያ መተታ፥ አባታነ ኤንታ ግዶን ደእያ መተታ ኡባ መዳሳ። ኡባስ ደኦ እማዳሳ፤ ሳሎ መተት ነዉ ጎይኖሶና።

7 ጎዳዉ፥ ኔኒ ፆሰ! ኔኒ ካልዳወታ ቢታ ኡረፐ አብራመ ዶራዳ ከሳዳሳ። እያ ሱን ላማዳ አብራሃመ ጋዳ ሱንዳሳ። 8 እ ነዉ አማንያ አስ ግደይሳ በአዳ፥ ካናነታ፥ ህተታ፥ አሞረታ፥ ፓርዘታ፥ ያቡሰታነ ገርገሰታ ቢታ እያ ኮቻስ ላታ ቢታ ኦዳ እማናዉ እያዉ ጫቃዳሳ። ኔኒ ፅሎ ግድያ ግሾ ነ ግዳ ቃላ ፖላዳሳ።

9 ኔኒ ኑ ማይዛታ ግብፀ ቢታን ጋክዳ ኡንኣ በአዳሳ፤ ቃስ ዞኦ አባ ማታን ደእሸ ኤንቲ ዋስዳ ዋሱዋ ስአዳሳ። 10 ግብፀ ካዎይ፥ እያ ሹማትነ ሄ ቢታ አሳ ኡባይ እስራኤለ አሳ ቦላ ኦቶርትዳ ግሾ ኤንታ ቦላ ማላታነ ማላልስያባታ ኦዳሳ። ሄሳ ኦዳ ሀች ጋካናዉ ነ ሱንይ ቦንቾን ፄገታናዳ ኦዳሳ። 11 አባ ሻካዳ ነ አሳ መላ ቢታራ ፕንዳሳ። ሽን ሹች ጪሞ ሃን ሆልን፥ ምተተይሳዳ ኤንታ ጎድያ ሞርከታ አባን ምትሳዳ ይሳዳሳ። 12 እስራኤለ አሳ ጋላስ ሻራ ቱሳን፥ ቃማ ታማ ቱሳን ኤንታ ኦግያ ፖእሳዳ ካለዳሳ።

13 ኔኒ ሳሎፐ ዎዳ ነ አሳ ሲና ዙማ ቦላ ኦድሳዳሳ። ሱረ ፕርዳነ ቱማ ግድዳ ህግያ፥ ሎኦ ዎጋነ ኪታ ኤንታዉ እማዳሳ። 14 ጌሻ ነ ሳምባታ ኤንቲ ቦንቻና መላ ኤንታ ታማርሳዳሳ። ነ አይልያ ሙሰ ባጋራ ኤንታዉ ኪታ፥ ዎጋነ ህገ እማዳሳ። 15 ኤንቲ ኮሻትዳ ዎደ ሳሎፐ ካ እማዳሳ፤ ቃስ ኤንቲ ሳሞትዳ ዎደ ዛላፈ ሃ ፑልትሳዳሳ። ኔኒ ኤንታዉ እማና ጋዳ ጫቅዳ ቢታ ኤንቲ ገልድ ላታና መላ ኪታዳሳ።

16 ሽን ኑ ማይዛት ኦቶርትዶሶና፤ ስኦና እፅድ ነዉ ኪተትቦኮና። 17 ኪተቶና እፅዶሶና፤ ኔኒ ኤንታዉ ኦዳ ማላልስያባ ኡባ ሀሳይቦኮና። ኤንቲ ስኦና አስ ግድዶሶና፤ ባንታ ጌላተን አይለተስ ግብፀ ቢታ ጉየ ካለና መላ ሀላቃ ባንታዉ ዶርዶሶና። ግዶሽን፥ ኔኒ አቶ ግያ ፆሲ፥ ኬሀነ ማርያ ፆሲ፤ ሲቆን ኩምዳይሳነ ሀንቆስ ኤለሶና ፆሲ ግድያ ግሾ ኤንታ አጋባካ።

18 ኤንቲ ማራ ማላን ኤቃ መድ፥ "ህንተና ግብፀ ቢታፈ ከስዳ ህንተ ፆሳይ ሀይሳ" ያግድ ነና ግታ ጫሸ ጫይዶሶና። 19 ነ ዳሮ ማሮተን ኔኒ ኤንታ መላ ቢታን አጋባካ። ኤንቲ ብያ ኦግያ ፖእሳና መላ ጋላስ ሻራ ቱሳን፥ ቃማ ታማ ቱሳን ኤንታ ካለዳሳ። 20 ኤንታ ታማርሳና መላ ነ ሎኦ አያና ኤንታዉ እማዳሳ። ማናዉ ማና፥ ኡያናዉ ሃ ኤንታዉ እማዳሳ። 21 ኦይታሙ ላይ ኩመ መላ ቢታን ሄመትያ ዎደ ኤንታዉ ኮሽያባፐ እስባካ ፓጭሳባካ። ኤንታ ማኦይ ዉርቤና፤ ኤንታ ቶሆይ ክፅቤና።

22 ነ ኤንታ ካዎተታነ ደረታ ሀር አቶሽን ሃሆን ደእያ ቢታታ ፆንድ ኦይካና መላ ኦዳሳ። ካዎይ ስሆነይ ሃርያ ሀሰቦና ቢታነ ካዎይ ኦገይ ሃርያ ባሳነ ቢታ ኤንታና ላትሳዳሳ። 23 ኤንታ ኮቻ ታይቡዋ ሳሎ ፆልንቶዳ ዳርሳዳሳ። ኤንታ ማይዛታስ እማና ጋዳ ጫቅዳ ቢታ ኤንታ ላትሳዳሳ። 24 ኤንታ ናይት ካናነ ቢታ ላትዶሶና። ሄ ቢታን ደእያ ካናነ አሳ ኤንታ ስንን ኔኒ ካዉሻዳሳ። ኤንቲ ካናነ አሳ ቦላ፥ ኤንታ ካዎታ ቦላነ ቢታን ደእያ አሳ ቦላ ዶስዳባ ኦና መላ ኤንታ ኩሸን አ እማዳሳ። 25 ኤንቲ ዩሾይ ግምበትዳ ካታማታነ አራዳ ቢታ ፆንድ ኤክዶሶና። ሎኦባ ኡባይ ኩምዳ ኬታ፥ ቦከትዳ ሃ ኦላታ፥ ዎይነ በሳታ፥ ሻማሆነ ሀራ አይፈ አይፍያ ዳሮ ምታ ላትዶሶና። እያፐ ምድ ካልድ ኦርድዶሶና፤ ነ ግታ ኬሀተን ኡፋይትዶሶና።

26 ግዶሽን፥ ኤንቲ ኪተቶና እፅድ፥ ነ ቦላ ማካልዶሶና፤ ነ ህግያ ቦላ ዞኮ ዛርዶሶና። ኔኮ ስማናዳ ኤንታዉ ምንድ ኦድዳ ነ ናበታ ዎዶሶና። ዳሮ ኢታ ጫሽ ነና ጫይዶሶና። 27 ሄሳ ግሾ፥ ኤንታ ኡንኤያ ሞርከታ ኩሸን አ እምን፥ ሞርከት ኤንታ ኡንኤዳ ዎደ ኔኮ ዋስዶሶና። ኤንታ ዋሱዋ ሳሎን ግዳዳ ስአዳሳ፤ ነ ማሮተ ዳሩዋን ኤንታ፥ ኤንታ ሞርከታ ኩሸፐ አሽያ አሳታ ኪታዳሳ።

28 ሽን ኤንቲ ሸምፖ ደም ስሚድ ዛሪድ ነ ስንን ናጋራ ኦዶሶና። ነ ዛራዳ ኤንታ ሞርከታ ኩሸን አዳ እምን፥ ኤንታ ሞርከት ኤንታ ሃርዶሶና። ሽን ሀእካ ኤንቲ ኔኮ ዋስን፥ ኤንታ ዋሱዋ ሳሎን ግዳዳ ስአዳሳ። ነ ማሮተን ኤንታ ዛራ ዛራዳካ አሻ ኤካዳሳ።

29 ነ ህግያኮ ኤንቲ ስማና መላ ኤንታዉ ምንዳ ኦዳዳሳ፥ ሽን ኤንቲ ኦቶርትዶሶና፤ ነዉ ኪተቶና እፅዶሶና። አስ ኪተትድ ደኦ ደምያ ነ ህግያ መንዶሶና። ነዉ ዞኮ ዛሪድ ስኦና እፅዶሶና፤ ኪተቶና እፅዶሶና። 30 ግድኮካ ነ ኤንታ ዳሮ ላይ ዳንዳአዳሳ፤ ነ አያናን ናበታ ባጋራ ኤንታዉ ኦዳዳሳ፥ ሽን ኤንቲ ስእቦኮና። ሄሳ ግሾ፥ ሾሮ ካዎተት ኤንታ ሃራና መላ አ እማዳሳ። 31 ሽን ኔኒ ኬሀነ ማርያ ፆሲ ግድያ ግሾ፥ ነ ግታ ማሮተን ኤንታ አጋባካ፤ ቡርፆራ ይሳባካ።

32 ህዛ ኑ ፆሳዉ፥ ግታዉ፥ ዎልቃማነ ያየትዳ ፆሳዉ፥ ነ መርና ሲቆ ጫቁዋ ናገይሶ፥ በን አሶረ ካዎተፈ ሀች ጋካናዉ ኑ ቦላ፥ ኑ ካዎታ ቦላ፥ ኑ ሀላቃታ ቦላ፥ ኑ ካህነታ ቦላ፥ ኑ ናበታ ቦላ፥ ኑ ማይዛታ ቦላነ ነ አሳ ኡባ ቦላ ጋክዳ መቶይ ነ ስንን ላፋባ ዳኖፖ። 33 ኑና ጋክዳባ ኡባን ኔኒ ፅሎ። ኑኒ ነና ናቅኮካ ነ አማነተ አጋባካ። 34 ኑ ካዎት፥ ኑ ሀላቃት፥ ኑ ካህነትነ ኑ ማይዛት ነ ህግያ ናግቦኮና። ቃስ ነ ኤንታዉ እምዳ ኪታነ ናግሱዋ ስእቦኮና። 35 ነ ኤንታ ካዎተን ኤንታዉ ግታ አንጁዋ እማዳሳ፤ ዳልጋነ አራዳ ቢታ ኤንታዉ እማዳሳ። ሽን ኤንቲ ነና ጎይንቦኮና፤ ባንታ ኢታ ኦሱዋፐ ስምቦኮና።

36 "ህዛ፥ ሀች ኑኒ አይለ ግደይሳ በአ። ኑ ማይዛት ሄ ቢተ አይፍያነ እያ እምያ አንጁዋ ኡባ ማና መላ ነ እምዳ ቢታን ኑ ሀች አይለ ግድዳ። 37 ኑ ናጋራ ግሾ፥ ነ ኑ ቦላ ደንዳ ካዎት ቢታይ እምያ አይፍያ ኡባ ጎኤቶሶና። ኑ ቦላነ ኑ መህያ ቦላ ባንታ ኮይዳባ ኦሶና፤ ኑኒ ግታ መቶ ግዶን ደኦስ" ያግዶሶና።

38 ሀንዳባ ኡባ ግሾ፥ ኑኒ ሃሳይድ፥ ሄ ሃሳያ ፃፍድ ቆንጭሳናዉ ቆፋ ቃችዳ። ፃፈትዳ ፁፍያ ቦላ ኑ ሀላቃት፥ ኑ ሌወትነ ኑ ካህነት ባንታ ማታመ ዎዶሶና።