መቶ ዎደ ኤለ ጋክያ ፆሳ
1 እ ኬሀ ግድያ ግሾነ
እያ ሲቆይ መርናስ ግዲያ ግሾ፤
ጎዳ ጋላትተ
2 ጎዳይ አሽዳይሳት፥
ሞርከ ኩሸፐ ከስ ኤክዳይሳት
ሀይሳዳ ያግድ ኦደቶ።
3 ኤንቲ ዶሎሀፐነ ዉሎሀፐ፥
ፑደሀፐነ ዱገሀፐ
ቢታ ኡባፈ ሺቅዳይሳታ።
4 ኤንታፈ እሶት እሶት መላ ቢታን ዩይዶሶና።
ባንታ ደእያ ካታማ ብያ ኦግያ
ደማናዉ ዳንዳእቦኮና።
5 ኤንቲ ኮሻትዶሶና፤ ሳሞትዶሶና፤
ኤንቲ ኡንኤትዶሶና።
6 ኤንቲ መቶትዳ ዎደ፥
ጎዳኮ ዋስዶሶና፤
እ ኤንታ ዋይያፐ ኤንታ አሽስ።
7 ኤንቲ ዳና ካታማ ጋካናዉ፥
ኤንታ ሱረ ኦገን ካለስ።
8 መርና እያ ሲቁዋ ግሾነ
እ ኤንታዉ ኦዳ ማላልስያ ኦሱዋ ግሾ
ኤንቲ ጎዳ ጋላቶ።
9 እ ሳሞትዳይሳታ አልሴስ፤
ኮሻትዳይሳታ ሎኦባ ካልሴስ።
10 እሶት እሶት ሳካና ማን ኡትዶሶና፤
ብራታ ሳንላታን ዋይዶሶና።
11 ሄስ ሀንዳይ ኤንቲ ኡባፈ ቃ ፆሳ፥
ኪታ ቦላ ማካልዳ ግሾነ
እያ ዞርያ ካዳ ግሾሳ።
12 እ ኤንታ ዋየ ኦሶን ዳቡርስስ፤
ኤንታ ማድያ አስ ይን ኩንድዶሶና፤
13 ኤንቲ መቶትዳ ዎደ፥
ጎዳኮ ዋስዶሶና፤
እ ኤንታ ዋያፐ ኤንታ አሽስ።
14 እ ኤንታ ሳካና ማፐ ከስስ፤
ኤንቲ ቃሸትዳ ሳንላታ ዱስ።
15 እያ ሲቁዋ ግሾነ
እ ኤንታዉ ኦዳ ማላልስያ ኦሱዋ ግሾ
ኤንቲ ጎዳ ጋላቶ።
16 እ ናሰ ብራታ ፐንገታ መንስ፤
ብራታ ካሶታ ቃንፅስ።
17 እሶት እሶት ኤያ ግድዶሶና፤
ባንታ ኦዳ ናጋራ ጋሶን
ባንታ ኢታተ ጋሶን መቶትዶሶና።
18 ኤንቲ ካ እፅዳ ግሾ
ሀይቆስ ጋክዶሶና።
19 ኤንቲ መቶትዳ ዎደ፥
ጎዳኮ ዋስዶሶና፤
እ ኤንታ ዋያፐ ኤንታ አሽስ።
20 እ ባ ቃላ ኪትድ ኤንታ ፓስ፤
ዱፎፐ ኤንታ አሽስ።
21 እያ ሲቁዋ ግሾነ
እ ኤንታዉ ኦዳ ማላልስያ ኦሱዋ ግሾ
ኤንቲ ጎዳ ጋላቶ።
22 ኤንቲ እያዉ ጋላታ ያርሾ ሺሾ፤
ኡፋይሳ የን እያ ኦሱዋ ኦዶ።
23 እሶት እሶት ማርካበን አባ ቦላራ ብዶሶና፤
አባ ቦላ ባንታ ኦሱዋ ኦዶሶና።
24 ኤንቲ ጎዳ ኦሱዋ በእዶሶና፤
ጪሞ አባን ኦዳ ማላልስያባ ፄልዶሶና።
25 እ ኪትዳ ዎደ ጎተይ ደንድስ፤
አባ ዙለይ ቃፅስ።
26 ኤንቲ ፑደ ደንድዶሶና፤
ዱገ ጪሞን ዎዶሶና፤
ኢታ መቶይ ጋክን ኤንታ ዎዛናይ ትልእስ።
27 ኤንቲ ማትዳ አሳዳ
በትድ ጋንድጋርዶሶና፤
ኤንታ ኤራይ ማይስ።
28 ኤንቲ መቶትዳ ዎደ፥
ጎዳኮ ዋስዶሶና፤
እ ኤንታ ዋያፐ ኤንታ አሽስ።
29 እ ጎትያ ስእ ኦስ፤
አባ ቤታ ስርጵ ኦስ።
30 ስእ ግዳ ግሾ ኡፋይትዶሶና፤
ኤንቲ ኮይዳ ካታማ ጎዳይ ጋስ።
31 እያ ሲቁዋ ግሾነ
እ ኤንታዉ ኦዳ ማላልስያ ኦሱዋ ግሾ
ኤንቲ ጎዳ ጋላቶ።
32 ደርያ ሺቁዋን እያ ግታተ አዋጆ፤
ጭማታ ዱላታን እያ ጋላቶ።
33 ጎዳይ ሻፋታ መልስስ፤
ፑልቶት ጎጎናዳ ተቅስ።
34 ሄ በሳን ደእያ አሳ ኢታተ ግሾ፥
አራዳ ቢታ ቁኤ ከስስ።
35 እ መላ ቢታን ሃ ኤልስስ፤
መላ ቢታን ፑልቶይ ቃናዳ ኦስ።
36 ኮሻትዳ አሳ ሄ በሳን ዎስ፤
ባንታዉ ዳና ካታማ ያን ኬፅዶሶና።
37 ኤንቲ ባንታ ጎሻን ዘርዶሶና፤
ዎይነ ቶክዶሶና፤
ዳሮ ሙሩቶ ሺሽዶሶና።
38 እ ኤንታ አንጅን ኤንቲ ዳርዶሶና፤
ኤንታ መህያ ታይቡዋ ጉቤና።
39 ኤንቲ ፆነትያ ዎደነ ኡንኤትያ ዎደ፥
መቶንነ አዛኖን ካዉይያ ዎደ፥
40 ጎዳይ ኤንታ ሀላቃታ ካዉሽስ፤
መላ ቢታን ቶይላታና መላ ኦስ።
41 ሽን ማንቆታ መቶፐ ከስስ፤
ኤንታ ሶ አሳ ዶርሳ ዉደዳ ዳርስስ።
42 ሱረ አሳይ ሄሳ በእድ ኡፋይቶሶና፤
ሽን ኢታ አሳይ ዬላትድ ስእ ጎሶና።
43 ጭንጫት ሀይሳ ኡባ አኬኮ፤
ጎዳ ሲቁዋ ቆፖ።