ማዝሙረ ማፃፋ 26

ፅሎ አሳ ዎሳ

ዳዊታ ማዝሙረ

1 አቤት ጎዳዉ፥ ታ ሱረተን ሄመትዳ ግሾነ

ስይ ባይና ነናን አማነትዳ ግሾ፥

ታዉ ፕርዳ።

2 አቤት ጎዳዉ፥ ታና ፓጫ፤

ታና ፕልጋዳ በአ፤

ታ ዎዛና ፆሞሳ።

3 ነ ሲቆይ ታ ስንን ደእያ ግሾ፥

ታ ኡባ ዎደ ነ ቱማ ኦግያን ሄመታይስ።

4 ጭምያ አሳራ ታ ኡትከ፤

ጩቦታ ማባራን ገልከ።

5 ኢታታ ዱላታ ታ እፃይስ፤

ማካላቾታራ እስፈ ኡትከ።

6 አቤት ጎዳዉ፥ ታ ፅሎተ በሳናዉ

ታ ኩሽያ ሜጫይስ፤

ነ ያርሾ በሳ ዩያይስ።

7 ጋላታ ማዝሙረ የፃሸ

ነ ማላልስያ ኦሶ ኡባ ኦዳና።

8 አቤት ጎዳዉ፥ ነ ኬነ፥

ነ ቦንቾይ አቅያ በሳ ታ ዶሳይስ።

9 ታና ናጋራንቾታራ እስፈ ፕቶፋ፤

አሳ ሱ ጉሰይሳታራ ታ ሸምፑዋ ይሶፋ።

10 ኤንታ ኩሸን ኢታ ሀልቾይ ደኤስ፤

ኤንታ ኡሻቻ ኩሸን ዎፈይ ኩምስ።

11 ሽን ታ ሱረተን ሄመታና፤

ታና ዎዛ፤ ታዉ ቃታ።

12 ታ ቶሆይ ደምባ በሳን ኤቅስ፤

ግታ ሺቁዋን ጎዳ ጋላታና።