1 አቤት ጎዳዉ፥

ሸምፖፈ ታ ነና ዎሳይስ።

2 አቤት ታ ፆሳዉ፥ ታ ነናን አማነታይስ፤

ታና ዬላዮፓ፤

ታ ሞርከታስ ታና አዳ እሞፋ።

3 ነናን ኡፋይስ ኦይሳት ዬላቶኮና፤

ሽን ጋሶይ ባይና ገነይሳት ዬላታና።

4 አቤት ጎዳዉ፥ ታና ነ ኦግያ በሳ፤

ነ ጌዶ ታና ካለ።

5 ታና አሽያ ፆሳይ ነና ግድያ ግሾ፥

ነ ቱማተ ታና ካለነ ታማርሳ፤

ጋላስ ኩመ ታ ነናን ኡፋይስ ኦይስ።

6 አቤት ጎዳዉ፥ በንፐ ደእያ

ነ ቃያነ ነ ኬሀተ ሀሳያ።

7 ታ ናአተ ናጋራነ ኢታባ ሀሳዮፓ፤

አቤት ጎዳዉ፥ ነ ኬሀተነ ሎኦተ ሀሳያ።

8 ጎዳይ ኬሀነ ሱረ ግድያ ግሾ፤

ናጋራንቾታ ባ ኦግያ ታማርሴስ።

9 አሽከታ ሱረተን ካለስ፤

ኤንታና ባ ኦግያ ታማርሴስ።

10 ጎዳ ጫቁዋነ

እያ ኪታ ናገይሳታስ

እያ ኦገ ኡባይ ቱማነ ኬሀ።

11 አቤት ጎዳዉ፥ ታ ናጋራይ ዳሮ፤

ግዶሽን ነ ሱን ግሾ ታው አቶ ጋ።

12 ጎዳ ያይያ አስ ኦኔ?

እ ካላናዉ በሲያ ኦግያ

ጎዳይ እያ ታማርሳና።

13 እ ኡባ ዎደ ዱረተን ዳና፤

እያ ናይት ቢታ ላታና።

14 ጎዳይ ያየይሳታስ ባ ፁራ ገንና፤

እ ኤንታዉ ባ ጫቁዋ ኤርሴስ።

15 ጎዳይ ታ ቶሁዋ ፅሄፐ ናግያ ግሾ፥

ታ አይፈይ ማዶ ኤካናዉ ኡባ ዎደ እያኮ ፄሌስ።

16 ጎዳዉ፥ ታኒ ብዛነ

መቶትዳ አስ ግድያ ግሾ፥

ታኮ ስማ፤ ነ ማሮተ ታና በሳ።

17 ታዉ ህርግ ዳርስ፤

ታ መቱዋፐ ታና ነ አሻ።

18 ታ መቱዋነ ታ ዋይያ በአ፤

ታ ናጋራ ኡባ አቶ ጋ።

19 ታ ሞርከት አይ መላ ዳርዳኮ በአ፤

ኤንቲ ታና አይ መላ እፅያኮ ፄላ።

20 ነ ታና ናጋ፤ ነ ታና አሻ፤

ታ ኔኮ ባቃትያ ግሾ ታና ዬላዮፓ።

21 ታ ነናን ኡፋይስ ኦዳ ግሾ፥

ሱረተነ ቱማተ ታና ናጎ።

22 አቤት ፆሳዉ፥ እስራኤለ አሳ

ኤንታ መቶ ኡባፈ ነ ዎዛ።