ማዝሙረ ማፃፋ 7

መቶ ዎደ ፅሎ አሳ ዎሳ

ብንያመ ኮቻ ኩዛባ ዳዊታ ጎዳስ የፅዳ ማዝሙረ

1 አቤት ጎዳዉ ታ ፆሳዉ፥ ታ ነናን ቆሰታይስ፤

ታና የደያ ኡባፈ ታና አሻ።

2 ኔኒ ታና አሾናባ ግድያኮ፥

ኤንቲ ታና ጋሞዳ ዛዛና፤

አሽያ አስ ባይና መንረናሽን።

3 አቤት ጎዳዉ ታ ፆሳዉ፥

ታ ሀይሳ መላባ ኦዳባ ግድኮ፥

ታኒ አሰ ናቅዳባ ግድኮ፥

4 ታ ላገታስ ሎኦ ግሾ ኢታ ዛርዳባ ግድኮ፥

ጋሶይ ባይና ታ ሞርክያ ቦንቅዳባ ግድኮ፥

5 ታ ሞርከይ ታና የደድ ኦይኮ፤

ታና ሳአን የግድ የ፤

ታና ባናን ጎንዶርስድ ካዉሾ። ሳላህ

6 አቤት ጎዳዉ፥ ነ ሀንቁዋን ደንዳዳ፥

ኤፅያ ታ ሞርከታ ሀንቁዋ ቦላ ኤቃ፤

ታ ፆሳዉ፥ ታ ግሾ ባርካ፤

ኔኒ ፅሎ ፕርዳ ኮያሳ።

7 አሳይ ነ ዩሾን ሺቆ፤

ኔኒ ኤንታፈ ቦላራ ሃራ።

8 ጎዳይ ካዎተታ ቦላ ፕርዴስ፤

አቤት ጎዳዉ፥ ታ ፅሎተዳነ

ታ ሱረተዳ ፕርዳ።

9 ቆፋነ ዎዛና ሻካዳ ኤርያ ፅሎ ፆሳዉ፥

ኢታታ ጌላ ሀኖታ ኔኒ ተቃ፤

ሽን ፅሉዋ ሳሮን ናጋ።

10 ዎዛና ሱረታ አሽያ፥

ፆሳይ ታዉ ጎንዳለ።

11 ፆሳይ ፅሎ ፕርደይሳ፤

እ ኡባ ዎደ ኢታታ ቦላ ሀንቀትያ ፆሳ።

12 ኢታት ባንታ ኢታተፈ ስሞና እፅኮ፥

ፆሳይ ባ ማሻ ሌፈስ፤

ባ ዶንግያ ጊግሴስ።

13 እ ባ ዎያ ኦላ ሚሸታ ጊግሴስ፤

ላፅያ ባ ዶንገ ቶራ ፕቴስ።

14 ኢታት ቆሆ ቃንትድ፥

ገነ ዎደፅድ፥

ዎርዶ የሎሶና።

15 ሀራ አሳስ ኦላ ቦክዳ አስ

ባ ቦክዳ ኦላን ባዉ ኩንዴስ።

16 እያ ገነይ እያ ሁጰን ስሜስ።

እያ ጌላተይ እያ ሜስ።

17 እያ ፅሎተ ግሾ ታኒ ጎዳ ሳባና፤

ኡባፈ ቃ ጎዳ ሱንስ

ታኒ ጋላታ ማዝሙረ የፃና።