ፆሳዉ ነ ግሾ ሞተታ
አሳፋ ትምርተ
አኬካን ፃፍዳ ግንፆ
1 ፆሳዉ ኔኒ ኑና አይስ መርናዉ አጋዲ?
ነ ቆሩዋን ደእያ ነ ዶርሳታ ቦላ
ነ ሀንቆይ አይስ ኤፅዴ?
2 ኔኒ በን ዶርዳ አሳ፥
ነዉ ቡዞ ኦዳ ዎዝዳ ኮቻታ ሀሳያ፤
ኔኒ ደእዳ ፅዮነ ዙማ ቆፓ።
3 ላለትዳ ነ ኬ ያዳ ፄላ፤
ሞርከት ያን ደእያባ ኡባ ይስዶሶና።
4 ነ ሞርከት ነ ኬን፥
"ኑ ፆንዳ" ያግድ ገሬርዶሶና።
ፆኖ ማላታ ግድዳ ባንታ ባንድራ ኤስዶሶና።
5 ኤንቲ ም ቃንፃናዉ ዎራ ግዶን ኤቅድ፥
ባንታ ካልታ ደንዳ አሳታ ዳኖሶና።
6 ኤንቲ ኩሸ ሂላን አሌቅዳ ኦሶታ ኡባ፥
ባንታ ካልታንነ ናርቃን መንረዶሶና።
7 ነ ኬ ታማን ፁግድ ይስዶሶና፤
ነ ሱንይ ፄገትያ በሳ ቱንስዶሶና።
8 ባንታ ዎዛናን፥ "ኑ ኩመ ይሳና" ያግዶሶና፤
ቢታን ደእያ አስ ፆሰ ጎይንያ በሳታ
ታማን ፁግዶሶና።
9 ሄ ዎደ ማላት ኑስ እመተና፤
ናበይካ ዴና።
ሄስ አዉደ ጋካናዉ ጋምአነኮ፥
ኤርያ አስ ኑ ግዶን ባዋ።
10 ፆሳዉ፥ ነ ሞርከት አዉደ ጋካናዉ፥
ነ ቦላ ቀልቅሳኔ?
ኤንቲ ነ ሱን መርናዉ ጫያኔ?
11 ነ ኡሻቻ ኩሽያ አይስ ሺሻ ኤካይ?
ነ ኡሻቻ ኩሽያ ነ አፍላ ግዶፈ
ከሳዳ ኤንታ ይሳ።
12 ግዶሽን፥ አቤት ፆሳዉ፥
ኔኒ በንፐ ታ ካዋ፤
ነ ዳሮ ዎደ አሻዳሳ።
13 ነ ግታ ዎልቃን አባ ሻካዳሳ፤
እያ ግዶን ደእያ ዶኣ ሁጰታ ዶንጫዳሳ።
14 ሌዋታነ ጌተትያ ዳውያ ሁጰታ ዶንጫዳ፥
እያ አሹዋ ባዞን ደእያ መተታስ
ካ ኦዳ እምዳይ ነና።
15 ኔኒ ፑልቶታ ዶያ የዳዳሳ፤
ኡባ ዎደ ጎግያ ሻፋታ መልሳዳሳ።
16 ጋላሳይ ነባ፤ ቃማይካ ነባ፤
አዋነ አጌና ኤንታ በሳን ዎዳይ ነና።
17 ቢታስ ዛዋ ዎዳይ፥
ባልጎነ ቦነ መዳይ ነና።
18 አቤት ጎዳዉ፥ ነ ሞርከት ነና ዋት ቀልቅስዳኮ፥
ኤያ አሳት ነ ሱን ዋት ጫይዳኮ ሀሳያ።
19 ነ ሆልያ ሸምፑዋ ዶኣስ አዳ እሞፋ፤
መቶታንቾታ መርናዉ ዶጎፓ።
20 ኑ ቢታን ደእያ ማ በሲ ኡባይ
ማካላንቾታን ኩምዳ ግሾ፥
ነ ኑስ ጫቅዳ ጫቁዋ ቆፓ።
21 ቆሄትዳይሳታ ዬላዮፓ፤
ማንቆትነ መቶታንቾት ነ ሱን ጋላቶ።
22 አቤት ፆሳዉ፥ ደንዳ፤ ሞተታ፤
ጋላስ ኩመ ኤያት ነና ቀልቅሰይሳ ሀሳያ።
23 ነ ሞርከት ነ ቦላ ዋስያ ዋሱዋነ
ነና እፀይሳት ጬቀትያ ጬቁዋ አኬካ።