ታኒ መቶ ዎደ ፆሰ ኮያስ
አሳፍ ዛማረታ ሀላቃ ኤዶታመስ ፃፍዳ ማዝሙረ
1 ታኒ ፆሳ ማጋናይስ፤
ታና ስአ ጋዳ እያኮ ዋሳይስ።
2 ታ መቱዋ ጋላሳን ጎዳ ኮያስ፤
ቃማ ኩመ ሸምፖይ ባይና ታ ኩሽያ ምጫስ፤
ግዶሽን፥ ታ ሸምፕያ ምናናዉ ዳንዳአቡኩ።
3 ታኒ ፆሳባ ቆፕያ ዎደ ኦላይስ፤
ታኒ ዎ ደንዳ ዎደ ታ ሸምፖይ ዳቡሬስ። ሳላሀ
4 ቃማ ኩመ ታና ስኮ ድጋዳ አይሳዳሳ፤
ታ ኡንኤትዳ ግሾ ኦደታናዉ ዳንዳአብከ።
5 ታኒ አዳ ጋላሳታ ቆፓስ፤
ካሰ ላይታ ሀሳያስ።
6 ታኒ ቃማ ግታ ቆፋን አቃስ፤
ታ ዎዛናን ዎ ደንሸ፥
ሀይሳዳ ያጋዳ ታና ኦይቻስ፤
7 "ፆሳይ ኑና መርናዉ አግደዬ?
ህዛፐ ጉየ እ ኑስ ኬሄነዬ?
8 እያ ሲቆይ አትደዬ?
እ ኦድዳ ቃላ መርናዉ ፖለነዬ?
9 ፆሳይ ባ ማሮታ ዶግደዬ?
ባ ቃያ ሀንቆን ላምደዬ?" ያጋዳ ኦይቻስ። ሳላሀ
10 ኡባፈ ቃ ፆሳዉ፥ ታና ኡንኤዳይ፥
ነ ኡሻቻ ኩሽያን ኑና ማዶ አግዳይሳ።
11 ጎዳ ኦሶታ ታኒ ቆፓና፤
እ በን ኦዳ ማላልስያ ኦሶታ ሀሳያና።
12 ነ ኦሶታ ታኒ ዛራ ዛራዳ ቆፓና፤
ነ ዎልቃማ ኦሶታ ታኒ ዎ ደንና።
13 አቤት ፆሳዉ፥ ነ ኦገይ ጌሽ፤
ነ መላ ግታ ፆሲ ኦኔ?
14 ኔኒ ማላልስያባ ኦያ ፆሳ፤
አሳ ግዶን ነ ዎልቃ ቆንጭሳሳ።
15 ነ አሳ፥ ያይቆባነ ዮሰፋ ኮቻ
ነ ቀስያን ዎዛዳሳ። ሳላሀ
16 አቤት ፆሳዉ፥ ሃት ነና በእድ ያይዶሶና፤
አባ ጪሞትካ ኮኮርዶሶና።
17 ሻራት ሃ ዱገ ትግዶሶና፤
ዳዳይ ሳሎን ጉምስ፤
ነ ዎልአንይ ያን ሀን ዎልአምስ።
18 ነ ዳዳ ጉንይ ኡሹዋ ግዶን ጉምስ፤
ነ ዎልአንይ ሳኣ ፖእስስ፤
ቢታይ ቃፅስ፤ ኮኮርስ።
19 ኔኒ አባ ግዶራ ሄመታሳ፤
ጪሞ አባ ግዶራ ካንሳ፤
ሽን ነ ቶሆይ የዳ በሳይ በንተና።
20 ሙሰ ኩሸንነ አሮና ኩሸን
ነ አሳ ዶርሳ ዉደዳ ካለዳሳ።