ማዝሙረ ማፃፋ 27

ፆሳራ ደእያ አሳ ፃላተ

ዳዊታ ማዝሙረ

1 ጎዳይ ታዉ ፖኦነ ታና አሸይሳ፤

ያትን፥ ታ ኦና ያያኔ?

ጎዳይ፥ ታ ደኦይ ናገትያ ሚፃ፤

ያትን፥ ታ አይስ ዳጋማኔ?

2 ኢታ አሳት፥ ታና እፀይሳትነ ታ ሞርከት

ታና ዎናዉ ሆርዶፍያ ዎደ፥

ባንታዉ በትድ ኩንዳና።

3 ሞርከ ቶር ታና ተቅኮ

ታ ዎዛናይ ያየና።

ኦል ታ ቦላ ደንድያኮካ፥

ታኒ ጎዳን አማነታይስ።

4 ታ ጎዳ እስባ ኦይቻስ፤

ሄስካ፥ ታ ደኦ ላይ ኡባን

ጎዳ ኬን ደአናሳ፤

ጎዳ ሎኦተ በአናሳነ

እያ ኬን እያ ኮያናሳ።

5 መቶ ጋላስ ታና ባ ደእያ በሳን ገንና፤

ባ ዱንካንያን ታና ቆሳና፤

ታና ቃ ዛላ ቦላ ኤሳና።

6 ሄ ዎደ ታኒ ታና ተቅዳ

ታ ሞርከታፐ አዳ፥

ቁ ቁ ጋና።

ታኒ እያ ዱንካንያን

ኡፋይታሸ ያርሾ ያርሻና፤

ጎዳ ማዝሙረን ጋላታና።

7 አቤት ጎዳዉ፥

ታ ነና ፄግያ ዎደ ነ ታዉ ኮያ፤

ታዉ ቃታ፤ ታና ስአ።

8 ኔኒ፥ "ታ ሶምኡዋ ኮይተ" ጋዳሳ፥

ታ ዎዛናይ አቤት ጎዳዉ፥

"ታ ነ ሶምኡዋ ኮያና" ያግስ።

9 ነ ሶምኡዋ ታፐ ገንፋ፤

ታና ማደይሶ፤ ነ ሸነታዳ

ታና ነ አይልያ ጉየ ዛሮፓ።

አቤት ታና አሽያ ፆሳዉ፥

ታና የጎፋ፤ አጎፋ።

10 ታ አዋይነ ታ አይያ ታና አግኮካ

ጎዳይ ታና ሺሽድ ኤካና።

11 አቤት ጎዳዉ፥ ታና ነ ኦግያ ታማርሳ፤

ታ ሞርከታ ግሾ ታና ሱረ ኦገ ካለ።

12 ታና ማንድያ ዎርዶ ማርካት

ታ ቦላ ዎልቃን ደንድዳ ግሾ፥

ታና ታ ሞርከታ አሙዋስ አዳ እሞፋ።

13 ታኒ ደኦን ደአሸ፥

ጎዳ ኬሀተ በአናይሳ አማናይስ።

14 ጎዳን ኡፋይስ ኦ፤

ምና፥ ያዮፋ፤

ጎዳን ኡፋይስ ኦ።