ማዝሙረ ማፃፋ 83

ፆሳዉ ስእ ጎፓ

አሳፋ ማዝሙረ

1 አቤት ፆሳዉ፥ ስእ ጎፓ፤

ፆሳዉ ስርጵ ጎፓ፤ ሙሞፓ።

2 ነ ሞርከት ነ ቦላ ደንደይሳ፥

ነና እፀይሳት ነ ቦላ ማካለይሳ በአ።

3 ኤንቲ ነ አሳ ቦላ ጌማን ዱላቶሶና፤

ኔኒ ዶስያ አሳ ቦላ ማቀቶሶና።

4 "ሃይተ፥ ኤንታ ካዎተ ይሶስ፤

እስራኤለ ጌተትያ ሱንይ መርናዉ ሀሳየቶና መላ ኦስ" ያጎሶና።

5 ኤንቲ እስ ዎዛናን ግድድ ማቀቶሶና፤

ነ ቦላ ደንዳናዉ ጫቅዶሶና።

6 ኤንቲ፥ ኤዶመነ እስማኤላ አሳ፥

ሞአበነ አጋር ኮቻታ፤

7 ገባላነ አሞነ አሳ፥

አማለቃ፥ ፍልስፄመነ ፅሮሳ አሳ።

8 አሶረት ኤንታራ ጋሄትዶሶና፤

አሶረት ሎፀ አሳስ ዎልቃማ ማዶ ግድዶሶና። ሳላሀ

9 ኔኒ፥ ምድያመ፥ ስሳራነ ያብና ቦላ

ቅሶና ሻፋን ኦዳይሳዳ ኤንታ ቦላ ኦ።

10 ኤንቲ ኤንዶራን ይዶሶና፤

ኤንታ አሀይ ደንባን ዎቅድ አትስ።

11 ኤንታ ሀላቃታ ኦሬባነ ዘባዳ ኦ፤

ኤንታ ሃረይሳታ ዛብሄላነ ስልማናዳ ይሳ።

12 ኤንቲ፥ "ኑኒ ፆሳ አሳ ላታ

ኑስ ቡዞ ኦና" ያግዶሶና።

13 ታ ፆሳዉ፥ ኤንታ ባናዳ ላላ፤

ጫርኮይ ኤፍያ ሱላዳ ኦ።

14 ታም ዎራ መይሳዳ፥

ታማ ላጮይ ደርያ ፁገይሳዳ፥

15 ነ ኡሹዋን ኤንታ የደ፤

ነ ጎትያን ኤንታ ዳጋን።

16 ጎዳዉ፥ አሳይ ነ ሱን ኮያና መላ፥

ኤንታ ሶምኡዋ ዬላ ማይዛ።

17 ኤንቲ መርናዉ ዬላቶ፤ ህርጎ፤

ካዉይድ ዮ።

18 ነ ሱንይ ጎዳ ግድዳ ነ ፃላል፥

ኡባፈ ቃ ፆሳይ፥

ሳአ ኡባ ሃረይሳ ኤንቲ ኤሮ።