1 አቤት ፆሳዉ፥ ታ ዎሳ ስአ፤

ታ ማጋኑዋ ቀል ጎፓ።

2 ታና ስአ፤ ታ ዎሳስ ዛሮ እማ፤

ታ ቆፋይ ታና ዋይስን፥ ታ ኡንኤታስ።

3 ታ ሞርከታ ግርሳ ስአዳ ዳጋማስ፤

ኢታታ ማንድያ ጋሶን ኮኮራስ።

ኤንቲ ታ ቦላ መቶ ኤሆሶና፤

ይሎን ደንድድ ታና ሞርኮሶና።

4 ታ ዎዛናይ ድርጌስ፤

ሀይቆ ህርጋይ ታና ዎስ።

5 ታና ያሽነ ኮኮርስ ኦይክስ፤

ኢታ ዳጋም ታ ቦላ ዎስ።

6 ሆለዳ ታዉ ቀፈይ ደእያኮ፥

ፓላዳ ሸምፖይ ደእያ በሲ ጋካናሽን።

7 ታኒ ሃካዳ ባናሽን፤

ባዞን አቃናሽን። ሳላሀ

8 ታኒ ጎተፐነ ጫርኮፈ ባቃታዳ፥

ታ ቆሰትያ በሲ ደማናሽን።

9 አቤት ጎዳዉ፥ ካታማ ግዶን

ኦሽነ ገነ በእዳ ግሾ

ኢታታ ኦዳ ላላ።

10 ኢታት ጋላስነ ቃማ

ካታማ ግምበ ድርሳ ዩዮሶና፤

ዋየይነ መቶይ ካታማ ግዶን ደኤስ።

11 ዮይ እያ ግዶን ደኤስ፤

ናቆይነ ጭሞይ እያ ዳባባፐ ሻከተና።

12 ታና ጫየይ ታ ሞርክያ ግደና፤

እያ ግድያኮ ታ ዳንዳአናሽን።

ታ ቦላ ጬቀተይ ታና እፀይሳ ግደና፤

እያ ግድያኮ ታ እያፐ ቆሰታናሽን።

13 ሽን ሄሳ ኦይ ነና፥

ታ ላግያ፤ ታ ዳቡዋነ ታ ሲቁዋ።

14 ኑ እሶይ እሱዋራ ኡሎ ኦዳ ኦደትዳ፤

ፆሳ ኬን ዳባባን አሳራ እስፈ ስመረትዳ።

15 ኤንታ ዎዛናን ኢታተ ደእያ ግሾ፥

ታ ሞርከት ቆፖና ሀይቆ፤

ኤንቲ ፓፃ ደእሸ ዱፎ ገሎ።

16 ሽን ታኒ ፆሳ ፄጋና፤

ጎዳይ ታና አሻና።

17 ዎንታ፥ ጋላስነ ኦማርስ ዋሳና፤

ታ መቱዋ እያዉ ኦዳና፤ እ ታና ስአና።

18 ዳሮት ታና ሞርክኮካ፥

እ ታና ቶራፐ አሼስ።

19 በንፐ ባ አራታን ኡትዳ ፆሳይ፥

ባንታ ኦግያ ላሞና ግሾነ

እያዉ ያዮና ግሾ ታና ስእድ ኤንታ ካዉሻና። ሳላሀ

20 ታ ላገይ ባ ዳቦታ ቆህስ፤

ኤንታራ ጫቅዳ ጫቁዋ መንስ።

21 እያ ዶናይ ኦይሳፐ ሊቆ፤

ሽን ባ ዎዛናን ኦላ ደንስ።

እያ እንፃርሳይ ዛይተፐ አዳ ሹጎ፤

ሽን ቃንፃናዉ ጊግዳ ቃራ ማሻ መላ።

22 ነ ቶሁዋ ፆሳ ቦላ የጋ፤

እ ነና ካትሳና።

ፆሳይ ፅሎት፥

ዳጋማና መላ ኦና።

23 ሽን አቤት ፆሳዉ፥

ኢታ አሳታ ዎልቃማ ኦላን ሆላና።

ሱ ጉሰይሳትነ ጭመይሳት፥

ባንታ ላይፈ ባጋካ ደኦኮና፤

ሽን ታኒ ነናን አማነታና።