ፆሳ አራታይ መርናሳ
ቆረ ናይት "ጪሸ" ጌተትያ ጩን ዛማረታ ሀላቃስ ፃፍዳ ማዝሙረ
አኬካን ፃፍዳ ሲቆ ማዝሙረ
1 ታኒ ታ የ ካዋስ ስሳና፤
ታ ዎዛናይ ሎኦ ቆፋ ፑልቴስ፤
ታ እንፃርሳይ ሎኦ ፃፍያ አሳ ብእረ መላ።
2 አሳ ኡባፈ ኔኒ ማላ ሎኦ፤
ነ መተርሻይ አ ኬሀተ ቃላን ኩምስ፤
ፆሳይ ነና መርናዉ አንጅስ።
3 ዎልቃማ ካዋዉ፥ ነ ማሻ ዳንጫ፤
ቦንቾነ ቴማ ማአ።
4 ነ ቱማተ፥ ነ አዳተነ ነ ፅሎተ ግሾ፥
ነ ቴማ ማአዳ ፆናናዉ ደንዳ፤
ነ ኡሻቻ ኩሸይ ማላልስያባ በሶ።
5 ነ ቶራት ቃራ፤
ኤንቲ ካዋ ሞርከታ ዎዛና ጫዶ፤
ካዎተት ነ ቶሁዋ ጋርሳን ኩንዶ።
6 ፆሳዉ፥ ነ አራታይ መርናዉ ደኤስ፤
ነ ካዎተ ፃምአይ ፅሎተ ፃምኣ።
7 ኔኒ ፅሎተ ዶሳዳ ጌላተ እፃሳ፤
ሄሳ ግሾ፥ ፆሳይ፥ ነ ፆሳይ፥
ነ ላገታፐ አድ፥
ነና ኡፋይሳ ዛይተን ትይስ።
8 ጎዳረ ኡን፥ ካርበንነ
ቡርጉደን ዋላከትዳ ሽቶን፥ ነ ማኦይ ፑከትስ።
ዳንጋርሳ ዛለን አሌቀትዳ፥
ነ ካዎ ጋን ዲፀትያ ዲይ ነና ኡፋይሴስ።
9 ካዎ ኬን ደእያ ማጫሳታ ግዶን፤
ካዎታ ማጫ ናይት ደኦሶና።
ካውያ ኦፍራ ዎርቃን አሌቀታዳ፥
ኔፐ ኡሻቻ ባጋን ኤቃሱ።
10 ታ ናተ፥ ስአ፤ ዎዛናን ዎ፤
ነ ሀይ ሃ ዛራ፤
ነ ደርያነ ነ አዋ ኬ ዶጋ።
11 ካዎይ ነ ማላን ኡፋይትስ፤
ነ ጎዳ ግድያ ግሾ እያ ቦንቻ።
12 ፅሮሳ አሳይ ነዉ ዎይቶ ኤክድ ያና፤
ዱረት ነና አዳሻና።
13 ካዋ ናእያ፥
ካዎ ኬን ዋና ሎአይ!
እ ያጋኖ ማኦይ ዎርቃን አሌቀትስ።
14 ባ አሌቆ ማኡዋ ማአዳ፥
ካዋኮ ሞይዘታሱ።
እ ጌላኦ ላገት እዮ ካልድ፥
እያ ስን ኤክድ ይዶሶና።
15 ኤንቲ ኡፋይትሸ ይድ፥
ካዎ ጋ ገሎሶና።
16 ካዋዉ፥ ነ አዋታ በሳ ነ ናይት ላታና፤
ቢታ ኡባን ነ ኤንታ ሹማና።
17 ታ ነ ሱን የለታ ኡባን፥
ሀሳየታናዳ ኦና።
ሄሳ ግሾ፥ አሳይ መርናዉ ነና ጋላታና።