1 አቤት ጎዳዉ፥ ታ ዎልቃዉ፥

ታኒ ነና ዶሳይስ።

2 ጎዳይ ታ ዛላ፤ ታ ሚፃ፤ ታና አሸይሳ፤

ታ ፆሳይ ታ እያኮ ባቃትያ ታ ዛላ።

እ ታዉ ጎንዳለ፤ ታና አሽያ ዎልቃ፤

ታኒ ቆሰታዳ አትያ በሰ።

3 ጋላታ በሲያ ጎዳ ታ ፄጋይስ፤

ታ ሞርከታፐ ታኒ አታና።

4 ሀይቆ ዎዶሮይ ታና ጩልስ፤

ዮ ድኦይ ታና ዳጋንስ።

5 ዱፎ ዎዶሮይ ታ ቦላ ፃፀትስ፤

ሀይቆ ፅሄይ ታና ኦይክስ።

6 ታ ኡንአን ጎዳ ፄጋስ፤

ታና ማዳና መላ ታ ፆሳኮ ዋሳስ።

ባ ኬን ግድድ ታ ግርሳ ስእስ፤

ታ ዋሶይ እያ ሀይን ዎስ።

7 ፆሳይ ሀንቀትዳ ግሾ፥

ቢታይ ቃፅስ፤

ደረታ ፃጶይ ኮኮርስ።

8 እያ ሲያፐ ሀንቆ ጩያይ ከይስ፤

እያ ዶናፐ ምያ ታማ ላጮይ ከይስ፤

እ ፁግያ ቦንቆ ጩትስ።

9 ሳሉዋ ጳልቅድ ዎስ፤

እያ ቶሁዋፐ ጋርሳን ማ ሻር ደኤስ።

10 ክሩበታ ቦላ ኡትድ ፓልስ፤

ጫርኮ ቀፈን ፑደ ደንድስ።

11 ባና ማን ካምስ፤

እያ ዱንካነይ እራን ኩምዳ ሻራ።

12 እያ ስንን ደእያ ግታ ፖኡዋፐ

ሻችነ ታማ ላጮይ ከይድ

ማ ሻራ ካንድ ብስ።

13 ጎዳይ ዳዳዳ ሳሎፐ ጉምስ፤

ኡባፈ ቃ ፆሳይ ባ ግርሳ ስስስ፤

ዎልአንንነ ታማ ላጮን ቆንጭስ።

14 ባ ዶንግያ ዱክድ ባ ሞርከታ ላልስ፤

ዎልአን ፖኦ ኪትድ ኤንታ የደስ።

15 አቤት ጎዳዉ፥ ኔኒ ሴርዳ ዎደ፥

ሸነታዳ ፔኑቅዳ ዎደ፥

አባይ ዝንእዳ ቢታይ በንትስ፤

ሳአ ባሶይ ቆንጭስ።

16 ጎዳይ ቦላፈ ኩሽያ የድድ ታና ኦይክስ፤

ጪሞ ሃፈ ታና ዳፍድ ከስስ።

17 ታ ቦላ ዳሮ ዎልቃምዳ

ታ ሞርከታፐነ

ታና እፀይሳታፐ አሽስ።

18 ታ መቶትዳ ዎደ ኤንቲ ታ ቦላ ደንድዶሶና፤

ሽን ጎዳይ ታና ካትስስ።

19 እ ታና ዳልጋ በሲ ከስስ፤

ታናን ኡፋይትዳ ግሾ ታና አሽስ።

20 ታ ፅሎተዳ ጎዳይ ታዉ ቃንፅስ፤

ታ ኩሸ ጌሻተዳ እ ታዉ ዛርስ።

21 ታኒ ጎዳ ኦግያ ካላስ፤

ታ ፆሳ አጋዳ ካረ ከያብከ።

22 ታኒ እያ ህግያ ኡባ ናጋስ፤

እያ ኪታ ፖሎ አጋብከ።

23 ታኒ እያ ስንን ሱረ ደአስ፤

ታና ናጋራፐ ናጋስ።

24 ጎዳይ ታ ፅሎተዳነ

ታ ኩሸ ጌሻተዳ ታዉ ዛርስ።

25 አማነተይሳታስ ነ አማነታሳ፤

ሱረታስ ነ ሱረ።

26 ጌሻታስ ነ ጌሽ፤

ሽን ጌላታስ ነ ጌላ።

27 አሽከታ አሻሳ፤

ሽን ኦቶራንቾታ ካዉሻሳ።

28 አቤት ጎዳዉ፥ ነ ታዉ ፆምፓሳ፤

ታ ፆሳይ ታ ማ ፖእሳሳ።

29 ነ ማዱዋን ታ ሞርከ ቶራ ቦላ ደንዳይስ፤

ታ ፆሳን ሚፃ ፄራራ ጉፓዳ አይስ።

30 ፆሳ ኦገይ ፖሎ፤

ጎዳ ቃላይ ጌሽ፤

እያኮ ባቃትያ ኡባስ እ ጎንዳለ።

31 ጎዳፐ አትሽን፥ ሀራ ፆሲ ኦኔ?

ኑ ፆሳፈ አትሽን፥ ሀራ ዛል ኦኔ?

32 ታዉ ዎልቃ እመይነ

ታ ኦግያ ሳሮ ኦይ ፆሳ።

33 እ ታ ቶሁዋ ገንኤ ቶሆዳ ምንስ፤

ቃ በሳን ህርግ ባይና ኤሴስ።

34 ታ ኩሽያ ኦላ ታማርሴስ፤

ናሰ ብራታ ዶንግያ ዱካና መላ

ታ ቀስያ ምንስ።

35 ታና አሽያ ነ ጎንዳልያ ታዉ እማዳሳ፤

ነ ኡሻቻ ኩሸይ ታና ዘምፕሴስ፤

ነ ሎኦ ኦይከይ ታና ግታዬስ።

36 ታ ሄመትያ በሳ ዳልግሳዳሳ፤

ታ ቶሁዋ ሀርቹች ኤክቤና።

37 ታ ሞርከታ የደዳ ኦይካስ፤

ኤንታ ይሶና ጉየ ስምከ።

38 ኤንቲ ዛር ደንዶናዳ ሾጫስ፤

ኤንቲ ታ ቶሁዋ ጋርሳን ኩንድዶሶና።

39 ኦላስ ታና ዳንጭሳዳሳ፤

ታራ ጋደተይሳታ ታዉ ጉልባትሳዳሳ።

40 ታ ሞርከታ ታ ስንፈ ጉየ ዛራዳሳ፤

ታና እፀይሳታ ይሳስ።

41 ማደ ኮይድ ዋስዶሶና፥

ሽን ኦንካ ኤንታ አሽቤና።

ጎዳ ኤንቲ ፄግዶሶና፥

ሽን እ ኤንታዉ ኮይቤና።

42 ጫርኮይ ፕትድ ኤፍያ ባናዳ ኤንታ ሊቅሳስ፤

ኦገ ኡርቃዳ ኤንታ የስ።

43 ገነ አሳፐ ታና አሻዳሳ፤

ታና ካዎተታ ቦላ ሹማዳሳ፤

ታ ኤሮና አሳይ ታዉ ሃረትዶሶና።

44 ኤንቲ ታባ ስእድ ታዉ ኪተቶሶና፤

አላጋ ደረይ ታ ስንን ዝጌስ።

45 ኤንቲ ካሀ ይዶሶና፤

ባንታ ሚፃፐ ኮኮርሸ ዮሶና።

46 ጎዳይ ደኤስ!

ፆሳይ፥ ታ ዛላይ ጋላተቶ!

ታና አሽያ ፆሳይ ቁ ቁ ጎ!

47 እ ታዉ ሀሎ ከስያ ፆሳ፤

ካዎተታ ታ ጋርሳን ሃርሰይሳ።

48 ታ ሞርከታፐ ታና አሸይሳ፤

ታና እፀይሳታ ቦላ ቁ ቁ ኦሳ፤

ኢታታፐ ታና አሻሳ።

49 ሄሳ ግሾ፥ ጎዳዉ

ካዎተታ ግዶን ታኒ ነና ጋላታና፤

ነ ሱን ሳባና።

50 እ ባ ካዋስ ፆኖ እሜስ፤

ባ ትይዳይሳስ፥ ዳዊታስነ እያ ኮቻስ፥

ባ ኬሀተ በሴስ።