ኡንአ ዎደ ዎሳ
ዛማረታ ሀላቃስ ፃፈትዳ ዳዊታ ማዝሙረ
ሆስፑን ሻያን የፀትያ ማዝሙረ
1 አቤት ጎዳዉ፥ ነ ይሉዋን ታና ሴሮፓ፤
ነ ሸንያን ታና ሀንቆፋ።
2 አቤት ጎዳዉ፥ ታኒ ዳቡራንቾ ግድዳ ግሾ ታና ማራ፤
አቤት ጎዳዉ፥ ታ ዎዛናይ አርጋጭዳ ግሾ ታና ምን።
3 ታ ሸምፕያ ዳሮ ኡንኤታሱ፤
ታና ማዳናዉ አዉደ ጋካናዉ ጋምአይ?
4 አቤት ጎዳዉ፥ ኔኒ ስማዳ ታና አሻ፤
ነ ኬሀተ ዳሩዋን ታና ከሳ ኤካ።
5 ሀይቅዳ አሳ ግዶፈ ነና ሀሳየይ ባዋ፤
ዱፎን ግድድ ነና ጋላተይ ኦኔ?
6 ታኒ ኦለን ዳቡራስ፤
ቃማ ኩመ ዬካሸ ታ ሂፃ እርፅሳስ፤
ታ አርሳ አፉን ዎቅሳስ።
7 ታ ሞርከታ ጋሶን ታ አይፈይ ሙልጫትስ፤
ታኒ አፉፅዳ ግሾ ደሞና እፅስ።
8 ጎዳይ ታ ዬሁዋ ስእዳ ግሾ፥
ህንተኖ፥ ኢታ ኦይሳቶ ታፐ ሃክተ።
9 ጎዳይ ታ ዋሱዋ ስእስ፤
ታ ዎሳ ኤክስ።
10 ታ ሞርከት ኡባይ ዬላትዶሶና፤ ዳጋምዶሶና፤
ቆፖና ጉየ ስሚድ ካዉይዶሶና።