ማደ ደማናዉ ዎስያ ዎሳ
ዛማረታ ሀላቃስ ዳዊቲ ፃፍዳ ማዝሙረ
1 ታኒ ጎዳ ዳንዳአን ናጋስ፤
እ ታኮ ስሚድ ታ ዋሱዋ ስእስ።
2 ዮ ኦላፈ፥ ስልሞ ኡርቃፈ ታና ከስስ፤
ታ ቶሁዋ ዛላ ቦላ ኤስስ፤
ታ ሄመ ምንስ።
3 ታ ዶናን ኦራ የ ዎስ፤
ሄስካ ኑ ፆሳይ ጋላተቶ ያገይሳ፤
ዳሮት በእድ ያያና፤ ጎዳን አማነታና።
4 ጎዳን አማነትያ፥
ኦቶራንቾታ ፄሎናይ፥
ዎርዶታራ ሄመቶናይ፥
አንጀትዳ አስ።
5 ጎዳዉ፥ ታ ፆሳዉ፥
ኔኒ ዳሮ ማላልስያባ ኦዳሳ፤
ኔራ ልከተይ ኦንካ ባዋ!
ኔኒ ኑስ ቆፕዳ ሎኦ ቆፋ፥
ኦንካ ታይባናዉ ዳንዳኦና፤
ሄስ ታኒ ኦድን ዉርያባ ግደና።
6 ኔኒ ያርሾነ እሞ ኮያባካ፤
ሽን ነና ስአና መላ ታ ሀይ ዶያዳሳ፤
ፁሳ ያርሾነ ናጋራ ያርሾ ኮያባካ።
7 ሄሳ ግሾ ታኒ፥ "ፃ ማፃፋን
ታባይ ፃፈትዳይሳዳ ታኒ ያስ።
8 ታ ፆሳዉ፥ ታኒ ነ ሸንያ ኦናዉ ዶሳይስ፤
ነ ህገይ ታ ዎዛናን ደኤስ" ያጋስ።
9 ግታ ሺቆን፥ ነ ፅሎተ ኦዳና፤
ጎዳዉ ኔኒ ኤረይሳዳ፥
ታኒ ማርካተይሳ አግከ።
10 ታ ነ ፅሎተ ታ ዎዛናን ቆሳብከ፤
ነ አማነተነ ነ አሹዋ ኦዳስ።
ነ ሲቁዋነ ነ ቱማተ፥
ግታ ሺቁዋን ገንብከ።
11 ጎዳዉ፥ ነ ማሮተ ታፐ ሃሶፋ፤
ነ ሲቆይነ ነ ቱማተይ፥
ታና ኡባ ዎደ ናጎ።
12 ታይቦይ ባይና ኢታባይ ታና ተቅስ፤
ታ ባላይ ታና ጎዝስ፤
ታ ፄላናዉ ዳንዳእከ
ታ ናጋራይ ታ ሁጰ ብናናፐ ዳርስ፤
ታ ዎዛናይ ታ ግዶን ትልእስ።
13 ጎዳዉ፥ ታና አሻናዉ ኤሮ ጋ፤
ታ ጎዳዉ፥ ታና ማዳናዉ ኤለሳ።
14 ታና ዎናዉ ኮየይሳት ዬላቶ፥ ካዉዮ፤
ታ ቆሄተ አሞተይሳት ካዉይድ ጉየ ስሞ።
15 ታኮ፥ "እያዉ ሀሹ፥ ሀሹ"
ገይሳት ፆነትድ ዬላቶ።
16 ሽን ነና ኮይያ ኡባይ፥
ነናን ኡፋይቶ፤ ሀሹ ጎ።
ነ አቶተ ዶስያ ኡባይ፥
"ጎዳይ ግታ" ያጎ።
17 ታኒ ማንቆነ መቶታንቾ፤
ሽን ጎዳይ ታባ ቆፖ!
ታና ማደይ አሸይ ነና፤
ታ ፆሳዉ፥ ጋምኦፋ።