ማዝሙረ ማፃፋ 4

ኡባ ዎደ ዎሳ

ዛማረታ ሀላቃስ ፃፈትዳ ዳዊታ ማዝሙረ

ዲን የፀትያ ማዝሙረ

1 አቤት ታና ፅልስያ ፆሳዉ፥

ታኒ ነና ፄግያ ዎደ ታዉ ኮያ።

ታኒ ኡንኤትዳ ዎደ ነ ታና ላአ ከሳዳሳ፤

ታዉ ቃታ፤ ታ ዎሳ ስአ።

2 ህንተኖ አሳዉ፥ ህንተ አዉደ ጋካናዉ

ታ ቦንቹዋ ካዉሼቲ?

አዉደ ጋካናዉ ፓናባ ዶሴቲ?

አዉደ ጋካናዉ ዎርዶ ካሌቲ? ሳላህ

3 ጎዳይ አማነትያ አሳታ ባዉ ዱማይድ ዎዳይሳ ኤርተ፤

ታኒ ጎዳ ፄግያ ዎደ እ ታና ስኤስ።

4 ሀንቀትተ፥ ሽን ናጋራ ኦፕተ፤

ህንተ ዝንእያ ዎደ

ህንተ ዎዛና ቆርተ፤ ስእ ጊተ። ሳላህ

5 ጎዳስ ልከ ያርሾ ያርሽተ፤

እያን አማነትተ።

6 "ኑና ሎኦባ በሳናይ ኦኔ?"

ያግድ ዳሮት ኦይቾሶና፤

አቤት ጎዳዉ፥ ነ ኑና ኬሀ አይፈን ፄላ።

7 ዳሮ ግስተፈነ ዎይነ ኡሻፈ

ነ ታ ዎዛናን ዎዳ ግታ ኡፋይሳይ አስ።

8 አቤት ጎዳዉ፥ ነ ፃላል ታና ሳሮ ዎያ ግሾ፥

ታኒ ዝንአዳ ዎፑ ጋዳ ስካይስ።