1 አሳ ኡባይ ሀይሳ ስእተ፤

ቢታ ቦላ ደኤይሳቶ፥

ኡባይ ሀይሳ ሀይዝተ።

2 ቃይ ዝቃይ፥

ዱረይ ማንቆይ ስእተ።

3 ታ ዎዛና ቆፋይ አኬካ እሜስ፤

ታ ዶናይ ጭንጫተ ቃላ ኦደቴስ።

4 ታ ሀይ ሌምሶኮ ዛራና፤

ዲ ዲፃሸ፥ ታ ቃንእሽያ ብርሻና።

5 መቶ ጋላሳይ ያ ዎደነ ጭምያ ሞርከት፤

ታና ተቅያ ዎደ ታ አይስ ባባይና?

6 ባንታ ሻሉዋን አማነተይሳታነ

ባንታ ዱረተን ጬቀትያ

ታ ሞርከታ አይስ ባባይና?

7 አይ አስካ ባና ዎዛናዉ፥

ዎይኮ ባ ሸምፑዋ ጋትያ

ፆሳስ ቃንፃናዉ ዳንዳኤና።

8 አሳ ሸምፖ ጋተይ ዳሮ አልኦ፤

አይ ጋተ ቃንፅንካ ግደና።

9 እ ሀይቆናዳነ ዱፎ ገሎናዳ፥

ዎይኮ እ ሀይቆናዳ ኦናዉ ጋከና።

10 ኤያትነ ፓና አሳት ሀይቀይሳዳ፥

ጭንጫት ባንታ ሻሉዋ

ሀራታስ የግድ በይሳ አሳ ኡባይ በኤስ።

11 ኤንቲ ባንታ ቢታ ባንታባ ጊኮካ፥

ዱፎይ መርናዉ ኤንታዉ ኬ ግዳና።

12 አስ አይ ግታትኮካ ባ ግታተራ ካንና፤

እ ዶአዳ ሀይቄስ።

13 ባንታርካ ባንታ ሁጰን አማነተይሳታ ቃዳይነ

ኤንቲ ግዳባ ቱማ ግያ ኤያታ ዉርሰይ ሀይሳ። ሳላሀ

14 ሹካስ ጊገትዳ ዶርሳታዳ፥

ሀይቆይ ኤንታ ዱፎ ካለስ።

ሱረት ኤንታ ዱፉዋ ቦላራ ሄመታና፤

ኤንታ አሳተይ ዱፎን ዎቃና፤

ኬፈ ከይድ ሃክድ ስኦለን አታና።

15 ሽን ፆሳይ ታ ሸምፑዋ ዎዛና፤

እ ታና ሀይቆ ዎልቃፈ አሻና። ሳላሀ

16 አስ ዱረትያ ዎደነ

እያ ቦንቾይ ዳርያ ዎደ ያዮፋ።

17 እ ሀይቅያ ዎደ አይኮካ ኤክድ ቤና፤

እያ ሻሎይ እያራ እስፈ ዱፎ ገለና።

18 አስ ፓፃ ደእያ ዎደ ታዉ ኩምስ ጊኮ፥

ኡባባይ እያዉ እንጀትዳ ግሾ ጋላተትኮካ፥

19 ስሚድ ፖኦ በኦና፥

ባ ማይዛታን ጋሄቴስ።

20 ኤራተ ባይና ዱረትዳ አስ

ዶአዳ ጮ ያና።