ማዝሙረ ማፃፋ 90

መርናዉ ደእያ ፆሳ

ፆሳ አስ ግድዳ ሙሰ ዎሳ

1 ጎዳዉ፥ ኔኒ የለታፐ የለታ ጋካናዉ፥

ኑኒ ደእያ በሲ ግዳዳሳ።

2 ደረት መታናፐ ካሰ፥

ሳእ ኦሰታናፐ ካሰ፥

መርናፐ መርና ጋካናዉ ነ ፆሰ።

3 ኔኒ፥ "አሳ ናይቶ፥ ጉየ ቢታኮ ስምተ" ያጋዳ፥

ኤንታ መትዳ ቢታኮ ጉየ ዛራሳ።

4 ሙኩሉ ላይ ዝነ አዳ ጋላሳ መላ፤

ዎይኮ እስ ቃማ ግዶን እስ ሳተ መላ።

5 ኔኒ አሳ ቆፖና ድኦዳ ኤፋሳ፤

ኤንቲ አሙሆ መላ፤

ዎንታ ዎንታ ዶልያ ማታ መላ።

6 ማት ዎንታ ድጭድ ጭዬስ፤

ኦማርስያ ዎደ ሹልድ መሌስ።

7 ኑኒ ነ ይሉዋን ዉርዳ፤

ነ ሀንቁዋ ሱሎን ዳጋምዳ።

8 ኑ ኢታ ኦሱዋ ነ ስንን ዎዳሳ፤

ኑ ጌምዳ ናጋራ ነ ሶምኡዋ ፖኡዋን ዎዳሳ።

9 ኑ ጋላሳ ኡባይ ነ ሀንቁዋን አስ፤

ኑ ላይ ኦለን ዉርሶስ።

10 ኑ ደኦ ላይይ ላፑን ታማ፤

ዎይኮ ዳርኮ ሆስፑን ታማ።

ሄስካ መቶይነ ዋየይ ኩምዳይሳ፤

ኑ ላይይ ኤሶን ዉሬስ፤ ኑካ ኤሶን አኦስ።

11 ነ ሀንቁዋ ዎልቃ ኤረይ ኦኔ?

ነ ሀንቁዋ ሱሎይ ዎልቃማ።

12 ኑ ላይ ማራ ኦገን ኑ ጎኤታና መላ፥

ኑና ጭንጫተ ታማርሳ።

13 ጎዳዉ፥ ነ ሀንቆይ አዉደ ጋካናሴ?

ሀያና ነ አይለታስ ቃታ።

14 ኑ ላይ ኡባን

ኑ ኡፋይታናዳነ የፃናዳ፥

ዎንታ ዎንታ ነ ሲቁዋ ኑና ካልሳ።

15 ነ ኑና መቶዳ ጋላሳታ ኬና፥

ኑኒ ኡንኤትዳ ላይታ ኬና ኑና ኡፋይሳ።

16 ኑስ ነ አይለታስ ነ ኦሶይ ቆንጮ፤

ነ ቦንቾይ ኤንታ ናይታስ በንቶ።

17 ጎዳ ኑ ፆሳ ኬሀተይ ኑ ቦላ ግዶ፤

ኑ ኩሸ ኦሶ ኡባ ኑስ አይፍሳ፤

ኤ፥ ኑ ኩሸ ኦሶ ኡባ አይፍሳ።