ኑና ዛራዳ ደን
ዛማረታ ሀላቃስ ፃፈትዳ ቆረ ናይታ ማዝሙረ
1 ጎዳዉ፥ ኔኒ ነ ቢታስ ኬሀዳሳ፤
ያይቆባ ኮቻ ድኦፐ ጉየ ዛራዳሳ።
2 ነ አሳ ናቁዋ አቶ ጋዳሳ፤
ኤንታ ናጋራ ኡባ ካማዳሳ። ሳላሀ
3 ነ ይሉዋ አጋዳሳ፤
ሱልያ ነ ሀንቁዋፈ ስማዳሳ።
4 አቤት ኑና አሽያ ፆሳዉ፥
ኑና ጉየ ዛራ፤
ኑ ቦላ ላንጭዳይሳ አጋ።
5 ኔኒ ኑ ቦላ መርናዉ ሸነታዬ?
ነ ሀንቁዋፈ ስምክዬ?
6 ኑኒ ነናን ኡፋይታና መላ፥
ኑና ዛራዳ ኦራክዬ?
7 አቤት ጎዳዉ፥ ነ መርና ሲቁዋ ኑና በሳ፤
ኑና አሻ።
8 ጎዳ ፆሳይ ኦድያባ ታኒ ስአና፤
ኤንቲ ባንታ ኤያ ኦግያኮ ስሞና እፅኮ፥
እ ባ ጌሻ ደርያስ ሳሮተ ኦዴስ።
9 እያ ቦንቾይ ኑ ቢታን ዳና መላ፥
ፆሳ ያየይሳታ አሻናዉ እ ማታን ደኤስ።
10 ሲቆይነ ቱማተ ጋሄትዶሶና፤
ፅሎተነ ሳሮተ እድመትዶሶና።
11 ቱማተ ሳኣፐ ፑደ ከዬስ፤
ፅሎተ ሳሎፐ ዱገ ፄሌስ።
12 ፆሳይ ሎኦባ ኑስ እማና፤
ኑ ቢታይ ዳሮ ካ አይፋና።
13 ፅሎተ ጎዳ ስንን ሄመታና፤
እያ ኦግያ ጊግሳና።