ፅዮነይ ኑ ፆሳ ዙማ
ቆረ ናይታ ማዝሙረ
1 ጎዳይ ግታ፤ ኑ ፆሳ ካታማን
እያ ጌሻ ዙማ ቦላ ግታ ጋላት እያዉ በሴስ።
2 ቢታ ኡባ ኡፋይስ ግድዳ፥
ፑደሀ ባጋራ ደእያ ፅዮነ ደረይ፥
ቃነ ሎኦ፤
እ ግታ ካዋ ካታማ።
3 ፆሳይ ሄ ግምብያ ግዶና፤
እካ እያዉ ገሸ ግደይሳ ኤርስስ።
4 ካዎት ባንታ ቶራንቾታራ ሺቅዶሶና፤
ፅዮነ ኦላናዉ ይዶሶና።
5 እያ በእድ ዳጋምዶሶና፤
ጉየ ስሚድ ባቃትዶሶና።
6 ኤንቲ ያን ደእሸ ያሻን ኮኮርዶሶና፤
እቀ ኦይክዳ ማጫሳዳ እንፃፅዶሶና።
7 ዶሎሀ ባጋ ዎልቃማ ጫርኮን
መቅያ ታርሰሳ ማርካበታ መላ ግድዶሶና።
8 ኑ ስእዳይሳዳ፥
ኡባፈ ዎልቃማ ጎዳ ካታማን፥
ኑ ፆሳ ካታማን እ ኦዳባ በእዳ፤
ፆሳይ ሄ ካታማ መርናዉ ምንድ ናጌስ። ሳላሀ
9 አቤት ፆሳዉ፥ ነ ኬን
መርና ነ ሲቁዋ ቆፖስ።
10 አቤት ፆሳዉ፥ ነ ሱንዳ
ነ ጋላታይ ሳኣ ጋፃ ጋክስ፤
ነ ኡሻቻ ኩሸይ ፅሎተን ኩምዳይሳ።
11 ነ ፕርዳ ጋሶን ፅዮነ አሳይ ኡፋይቶ፤
ይሁዳ ኩመይ ኡፋይሳን እልሎ።
12 ፅዮነ ዩሹዋን ሄመትተ፤
እ ድርሳ ዩይተ እ ሻኮታ ታይብተ።
13 ያ የለታስ ኦዳና መላ
እያ ግምብያ አኬክተ፤ ሚፃታ ዎችተ።
14 ህንተ፥ "መርናዉ ፆሳይ ኑ ፆሳ፤
እ ኑና ሀይቃና ጋካናዉ ካለና" ያግድ ኦድተ።