ኡፋይሳን ናገትያ ካዋ
ሶሎሞነ ማዝሙረ
1 ፆሳዉ፥ ነ ሱረ ፕርዳ ካዋስ፥
ነ ፅሎተ ካዋ ናኣስ እማ።
2 እ ነ አሳስ ፅሎተን ፕርዳና፤
ቆሄትዳይሳታስ ሱረን ዳይናታና።
3 ደረት ዱረተ፥
ዙማት ፅሎተ አይፈ ነ አሳስ አይፎ።
4 ካዎይ ቆሄትዳይሳታ ግሾ ሞተቶ፤
ማንቆታ አሾ፤ ኡንኤይሳታ መን።
5 ፆሳዉ፥ እ አዋዳነ አጌናዳ ደኦ፤
የለተፈ የለተ ጋካናዉ ደኦ።
6 ካዎይ ጎሻን ቡክያ እራ መላነ
ቢታ ካልስያ ፑሰ እራ መላ ግዶ።
7 እያ ላይ ኡባን ፅሎ አሳት ዳዮ፤
አጌን ያና ጋካናዉ ሳሮተ ዳሮ።
8 አባፈ አባ ጋካናዉ፥
ኤፍራፂሳ ሻፋፐ ሳኣ ጋፃ ጋካናዉ እ ሃሮ።
9 ባዞን ደእያ አሳት እያ ጎይኖ፤
እያ ሞርከት ባና ላጮ።
10 ታርሰሳነ ዩሾይ አባን ተቀትዳ ቢታታ፥
ካዎት እያዉ ጊራ ጊሮ፤
አራበነ ቶጰ ካዎት እያዉ እሞታ ኤሆ።
11 ካዎት ኡባይ እያዉ ጉልባቶ፤
ካዎተት ኡባይ እያዉ ኪተቶ።
12 እያኮ ዋስያ ማንቆታ፥ ቆሄትዳይሳታነ
ማዶይ ባይናይሳታ እ አሻና።
13 ማንቆታስነ ዳቡራንቾታስ እ ቃቴስ፤
ማንቆታ ሸምፑዋ ሀይቆፐ አሼስ።
14 ኤንታ ሱይ እያ ስንን አልኦ ግድያ ግሾ፥
እ፥ ኤንታ ቆሆፐነ ኢታፐ ዎዛና።
15 ካዎይ ዳሮ ላይ ጋምኦ፤
አራበ ቢታ ዎርቃይ እያዉ ዮ።
አሳይ እያ ግሾ ኡባ ዎደ ዎሶ፤
ጋላስ ኡባን እ አንጀቶ።
16 ቢታን ካ ፓላሆ፤
ደረት ካን ካመቶ።
ልባኖሰ ደርያ ቦላ ካ አይፍያዳ አይፎ፤
ደንብ ማታን ኩምያዳ አሳይ ካታማ ኩሞ።
17 ካዋ ሱንይ መርናዉ ደኦ፤
አዋዳ ኡባ ዎደ ፄገትሸ ጋምኦ።
አሳ ኡባይ እያ ባጋራ አንጀታና፤
ካዎተት እያ "አንጀትዳይሳ" ያጋና።
18 ማላልስያባ ባርካ ኦያ ጎዳይ፥ ፆሳይ
እስራኤለ ፆሳይ ጋላተቶ።
19 እያ ቦንቾ ሱንይ መርናዉ ጋላተቶ፤
እያ ቦንቾይ ሳአ ኡባ ኩሞ።
አምንእ! አምንእ!
20 እሰየ ናኣ ዳዊታ ዎሳይ ሀይሳን ፖለትስ።