እያ ሲቆይ መርናሳ
1 ጎዳይ ኬሀ ግድያ ግሾ ጋላትተ፤
እያ ሲቆይ መርናሳ።
2 እስራኤለ አሳይ፥
"እያ ሲቆይ መርናሳ" ያጎ።
3 አሮና ኬ አሳይ፥
"እያ ሲቆይ መርናሳ" ያጎ።
4 ጎዳስ ያይያ ኡባይ፥
"እያ ሲቆይ መርናሳ" ያጎ።
5 ታ ኡንኤትዳ ዎደ ጎዳኮ ዋሳስ፤
እ ታ ዋሱዋ ስእድ ታና ላአ ከስስ።
6 ጎዳይ ታራ ደእያ ግሾ ታ ያይከ፤
አስ ታና አይ ኦኔ?
7 ጎዳይ ታና ማዳናዉ ታራ ደኤስ፤
ታ ሞርከታ ፆነተ ታ በአና።
8 አሳን አማነታናፐ
ጎዳን ጌምድ አተይስ ሎኦ።
9 ግታ አሳን አማነታናፐ
ጎዳን ጌምድ አተይስ ሎኦ።
10 ካዎተት ኡባይ ታና ተቅድ ኦይክዶሶና፤
ሽን ጎዳ ሱንን ታ ኤንታ ፆናስ።
11 ኤንቲ ታ ዩሹዋ ተቅዶሶና፤
ሽን ጎዳ ሱንን ታ ኤንታ ፆናስ።
12 ኤንቲ ታ ዩሹዋ ማዳ ተቅዶሶና፤
ሽን ቡረይ ታማን ኤፀይሳዳ ኤፅድ ይዶሶና፤
ጎዳ ሱንን ታ ኤንታ ይሳስ።
13 ታኒ ሱገታዳ ኩንዳናዉ ጋካስ፤
ሽን ጎዳይ ታና ማድስ።
14 ጎዳይ ታ ምኖተነ የ፤
እ ታና አሸይሳ ግድስ።
15 ፅሎታ ዱንካንያን ኦላ ፆንድ፥
ስምያ አሳ ኡፋይሳስ ግያባ ስእተ፤
ጎዳ ኡሻቻ ኩሸይ ግታባ ኦስ።
16 ጎዳ ኡሻቻ ኩሸይ ፆኖ እሚስ፤
ጎዳ ኡሻቻ ኩሸይ ግታባ ኦስ።
17 ታኒ ሀይቅከ፤ ደኦን ዳና፤
ጎዳይ ኦዳባ አዋጃና።
18 ጎዳይ ታና ኢታ ሴራ ሴርስ፤
ሽን ሀይቆስ አድ እምቤና።
19 ታኒ ግዶ ገላዳ ጎዳ ጋላታና መላ፥
ፅሎተ ፐንገታ ታዉ ዶይተ።
20 ሀይስ ጎዳ ፐንገ፤
ፅሎት እያራ ገሎሶና።
21 ጎዳዉ፥ ነ ታና ስእዳ ግሾነ
ታዉ ፆኖ እምዳ ግሾ ታ ነና ጋላታይስ።
22 ግምበይሳት ካድ የግዳ ሹቻይ፥
ጎዳ ፃጱዋ ምንያ ሹቹ ግድስ።
23 ሀይስ ጎዳ ኦሶ፤
ኑ አይፍያስ ማላልስያባ።
24 ሀይስ ጋላሳይ ጎዳይ ኦዳ ጋላስ፤
አነ ኑኒ እያን ኡፋይቶስነ እልሎስ።
25 ጎዳዉ፥ ሀእ ኑና አሻ፤
ጎዳዉ፥ ሀእ ኑስ እንጀያ።
26 ጎዳ ሱንን ያ አስ አንጀትዳይሳ ግዶ፤
ኑኒ ፆሳ ኬፈ ህንተና አንጆስ።
27 ጎዳይ ፆሳ፤ እ ኑ ቦላ ፖእስስ፤
ያርሾ በሳን ደእያ ካጭያኮ ከይተ፤
እርፃ ታሸ ኦይክድ ባኣለ ቦንችተ።
28 ኔኒ ታ ፆሳ፤ ታ ነና ጋላታና፤
ኔኒ ታ ፆሳ፤ ታ ነና ሳባና።
29 ጎዳይ ኬሀ ግድያ ግሾ እያ ጋላትተ፤
እያ ሲቆይ መርናሳ።