ፆሳይ ፅዮነ ዶርስ
ፑደ ከይሸ የፅያ ማዝሙረ
1 ጎዳዉ፥ ዳዊታነ
እ ዳንዳእዳ መቱዋ ኡባ ቆፓ።
2 ጎዳስ እ ጫቅዳይሳ፥
ዎልቃማ ግድዳ ያይቆባ ፆሳስ፥
እ ኦድዳይሳ ሀሳያ።
3-5 ጎዳስ በሰ ጊግሳና ጋካናዉ፥
ዎልቃማ ግድዳ ያይቆባ ፆሳስ፥
ኬ ኬፃና ጋካናዉ፥
ታ ሶ ገልከ፤
ታ ሂፃን ዝንእከ።
ታ አይፈይ ቅልምኤና፥
ዎይኮ ታና ስኮይ ኤከና።
6 ኑኒ ታቦትያባ
ኤፍራታን ስእዳ፤
ይኣርመ ቢታን እያ ደምዳ።
7 "አነ እ ደእያ በሳ ቦስ፤
እያ ቶሆይ የያ በሳን
እያ ጎይኖስ።"
8 ጎዳዉ፥ ደንዳ!
ነ ምኖተ ማላ ግድዳ
ነ ታቦትያራ ነ ኬ ገላ።
9 ነ ካህነት ፅሎተ ማኦ፤
ነ አሳይ ኡፋይሳን የፆ።
10 ነ አይልያ ዳዊታ ግሾ፥
ኔኒ ትይዳ ካዋ አጎፋ።
11 ጎዳይ ዳዊታስ ላመቶና ጫቆ
ሀይሳዳ ያግድ ጫቅስ፤
"ነ ጉልባታፐ ከይዳ፥
ነ ናይታፐ እሱዋ ነ አራታን ኡትሳና።
12 ነ ናይት ታ ጫቁዋነ
ታ ታማርስያ ትምርትያ ናግኮ፥
ኤንታ ናይት ነ አራታን መርናዉ ኡታና" ያግስ።
13 ጎዳይ ፅዮነ ዶርስ፤
ባዉ ደእያ በሲ ኦናዉ አሞትድ፥
ሀይሳዳ ያግስ፤
14 "ሀይስ ታ መርናዉ ደእያ በሰ፤
ታኒ አሞትዳ ግሾ ሀይሳን ዳና።
15 ታኒ ዳሮ ካ እማዳ ፅዮነ አንጃና፤
እያን ደእያ ማንቆታካ ካ ካልሳና።
16 እያን ደእያ ካህነታ አቶተ ማይዛና፤
እያን ደእያ ፅሎት ኡፋይሳን የፃና።
17 ሄ በሳን ዳዊታ ዘርያፐ ካዎ ከሳና፤
ታኒ ትይዳ ካዋ ካዎተን ጋምእሳና።
18 ታኒ እያ ሞርከታ ዬላ ማይዛና፤
ሽን እያ ሁጰን ደእያ ካላቻይ ጶላና" ያጋስ።