ማዝሙረ ማፃፋ 98

ፆሳስ ኡፋይሳን እልልተ

ማዝሙረ

1 ጎዳይ ማላልስያባ ኦዳ ግሾ፥

እያዉ ኦራ ማዝሙረ የፅተ።

እያ ኡሻቻ ኩሸይ፥ እያ ጌሻ ቀሰይ

እያዉ ፆኖ እሚስ።

2 ጎዳይ ባ ፆኑዋ ኤርስስ፤

ባ ፅሎተ ካዎተታስ ቆንጭስስ።

3 እ እስራኤለ አሳ ሲቀይሳነ

ኤንታዉ አማነተይሳ ሀሳይስ።

ሳኣ ጋፃ ጋካናዉ ደእያ አሳ ኡባይ

ኑ ፆሳ አቶተ በእዶሶና።

4 ሳአ ቦላ ደእያ አሳዉ፥

ጎዳስ ኡፋይሳን የፅተ፤

ኡፋይሳን እልልሸ ሳቢተ።

5 ጎዳስ ዲ ዲፅተ፤

ዲንነ ማዝሙረን ጎዳ ሳቢተ።

6 ሱሱልኤነ ሞይዘ ፑንሸ፥

ኡፋይሳን ጎዳ ኑ ካዋ ስንን የፅተ።

7 አባይነ አባ ግዶን ኩምዳ ኡባይ ጉሞ፤

ሳአይነ ሳኣ ቦላ ደእያ ኡባይ የፆ።

8 ሻፋት ባንታ ኩሽያ ባቆ፤

ዙማት እስፈ ጎዳ ስንን ኡፋይሳን የፆ።

9 ጎዳይ ሳኣ ቦላ ፕርዳናዉ ዬስ፤

እ ሀ ሳኣ ቦላ ፅሎተን

አሳ ቦላ ሱረተን ፕርዳና።