ማዝሙረ ማፃፋ 32

ናጋር አቶ ጌተትዳ አስ አንጀትዳይሳ

ዳዊታ ትምርተ

አኬካን ፃፈትዳ ግንፆ

1 እያ ናጋራይ አቶ ጌተትዳይነ

እያ ናጋራይ ካመትዳ ኡራይ አንጀትዳይሳ።

2 ጎዳይ እያ ኢታተ ታይቦና አስ፥

እያ ቆፋን ጭሞይ ባይና አስ አንጀትዳይሳ።

3 ታኒ ታ ናጋራ ፓፆና አጋዳ፥

ኩመ ጋላስ ኦልዳይስ፥

ታ አሳተ ዳቡርስስ።

4 ጋላስነ ቃማ ነ ኩሸይ ታና ዴፅስ፤

ሃ ይን ቦነ አዋን መልድባዳ፥

ታ ዎልቃይ ዉርስ። ሳላሀ

5 ታኒ ታ ናጋራ ነዉ ፓፃስ፤

ታ ናቁዋ ኔፐ ገንብከ።

"ታ ናጋራ ጎዳስ ፓፃና" ያጋስ፤

ታና ዴፅዳ ናጋራ አቶ ጋዳሳ። ሳላሀ

6 ሄሳ ግሾ፥ ፅሎ አስ ኦንካ፥

ነ በንትያ ዎደ ነና ዎሶ፤

ኢታ ድኦይ ያ ዎደ ሄ ኡራ ጋከና።

7 ነ ታዉ ቆሰትያ በሲ፤

ነ ታና መቶፐ ናጋሳ።

አቶተ የ የፅያ አሳ

ታ ዩሹዋን ዎዳሳ። ሳላሀ

8 ፆሳይ፥ "ታ ነና ታማርሳና፤

ነ ባና ኦግያ በሳና፤

ታ ነና ዞራናነ ናጋና" ያጌስ።

9 ብፃላንነ ፑሎን ኦይከቶና፤

ኪተቶና ዎዛን ባይና ባቁሎዳ

ዎይኮ ፓራዳ ሀኖፕተ።

10 ኢታታስ ዋየይ ዳራና፤

ሽን ጎዳን አማነተይሳታ ሲቆይ ካማና።

11 ህንተኖ፥ ፅሎቶ፥

ጎዳን ኡፋይትተነ ሀሹ ጊተ፤

ህንተኖ፥ ዎዛና ሱረቶ፥ እልልተ።