ማዝሙረ ማፃፋ 50

ፆሳይ ቱማ ዳይና

አሳፋ ማዝሙረ

1 ዎልቃማ ጎዳይ፥ ፆሳይ ኦዴስ፤

ዶሎሀፐ ዉሎሀ ጋካናዉ ቢታ ኡባ ፄጌስ።

2 መን ፖሎ የገልስ ግድዳ

ፅዮነፐ ፆሳይ ፖኤስ።

3 ኑ ፆሳይ ያና፤ ስእ ጌና፤

ኤፅያ ታማይ እያ ስንና፤

ዎልቃማ ጎተይ እያ ዩሹዋና።

4 ፆሳይ ባ አሳ ፕርድያ ዎደ፥

ሳሎታነ ሳኣ ፄጌስ።

5 "ያርሾን ታራ ጫቅዳ፥

ታ ጌሻታ ታኮ ሺሽተ" ያግስ።

6 ፆሳይ ፕርድያ ግሾ፥

ሳሎት እያ ፅሎተ አዋጆሶና። ሳላሀ

7 "ታ አሳዉ፥ ስእተ፤ ታ ህንተዉ ኦዳይስ፤

እስራኤለ አሳዉ፥ ታ ነ ቦላ ማርካታና፤

ታኒ ፆሳይ፥ ነ ፆሳ።

8 ነ ያርሹዋ ግሾነ

ነ ፁሳ ያርሹዋ ግሾ፥

ነና ቦርከ።

9 ነ ዳራፐ ኮርማታ፥

ነ ግርብያፈ ኮለ ኤካናዉ ኮይከ።

10 ዎራን ደእያ ዶአት ኡባይ ታባ፤

ሙኩሉ ዙማ ቦላ ደእያ መሄትካ ታሳ።

11 ታኒ ቃ ደርያን ደእያ ካፎታ ኡባ ኤራይስ፤

ደንባን ደእያ መተት ታይሳታ።

12 ታና ኮሻይኮካ ነና ኦይችከ፤

ሳእነ ሳአን ኩምዳባ ኡባይ ታባ።

13 ታኒ ኮርማታ አሹዋ ማይናዬ?

ዎይኮ ዴሻታ ሱ ኡያናዬ?

14 ፆሳስ ጋላታ ያርሾ እማ፤

ኡባፈ ቃ ፆሳስ ነ ቃንገ ጋ።

15 መቶ ጋላስ ታና ፄጋ፤

ታ ነና አሻና፤ ነካ ታና ቦንቻና" ያጌስ።

16 ሽን ፆሳይ ኢታ አሳ ሀይሳዳ ያጌስ፤

"ታ ህግያ ነ ናባባናዉ ነዉ አይ ማት ደኢ?

ዎይኮ ታ ጫቁዋ ነ ዶናን ቆንጭሳናዉ ነዉ አይ ማት ደኢ?

17 ኔኒ ታ ትምርትያ እፃዳሳ፤

ታ ቃላ ጉየ የጋዳሳ።

18 ካይሱዋ በእዳ ዎደ ኔኒ እያራ ዳቦታዳሳ፤

ላይማተይሳታ ማባራን ገላዳሳ።

19 ነ ዶና ኢታባ ኦደታናዉ ብላ የዳዳሳ፤

ነ እንፃርሳይ ዎርዶ ሃሳያ ሜዘትስ።

20 ኡታዳ ነ እሻ ዝግራዳሳ፤

ነ አየ ናኣ ቦላ ኢታባ ኦደታዳሳ።

21 ነ ሀይሳ ኡባ ኦያ ዎደ፥

ታኒ ስእ ግዳ ግሾ

ታና ነ መላ ጋዳ ቆፓዳሳ።

ሽን ሀእ ታ ነና ሀንቃና፤

ነ ናጋራ ነ ስንን ታይባና።

22 ህንተኖ፥ ፆሳ ዶገይሳቶ፥ ሀይሳ አኬክተ፤

ሄስ ሀኖና እፅኮ ታ ህንተና መንረና፤

ሄ ዎደ ህንተና አሻናይ ባዋ።

23 ታዉ ጋላታ ያርሸይ ታና ቦንቼስ፤

ባ ኦግያ ሱርስዳ አሳስ

ታኒ ፆሳ አቶተ በሳና" ያጌስ።