1 ዳርዮስ ካዎትዳ ኦይዳን ላይን፥ ክሲላ ጌተትያ ኡዱፉን አጌናን፥ ኦይዳን ጋላሳን፥ ዛካርያሳኮ ይዳ ጎዳ ቃላይ ሀይሳ። 2 ቤተለ ካታማ አሳይ ሳረዜራ፥ ረገም-መለካነ ኤንታራ እስፈ ደእያ አሳታ ጎዳ አንጆይ ያና መላ ዎሳናዉ ኪትዶሶና። 3 ቃስ ኡባፈ ዎልቃማ ጎዳ ኬን ኦያ ካህነታነ ናበታ፥ "ዳሮ ላይ ኦሸ ጋምእዳይሳዳ ኑኒ ሀእካ እቻሻን አጌናን ዬካናዉነ ፆማናዉ በሲ?" ያግድ ኦይቻና መላ ኪትዶሶና።

4 ሄሳፈ ጉየ፥ ኡባፈ ዎልቃማ ጎዳ ቃላይ ሀይሳዳ ያግድ ታኮ ይስ፦ 5 "ቢታን ደእያ አሳ ኡባስነ ካህነታስ ሀይሳዳ ያጋዳ ኦዳ፦ ‘ህንተ ሀ አዳ ላፑን ታሙ ላይን እቻሻን አጌናንነ ላፑን አጌናን ፆምዳይነ ዬክዳይ ታና ቦንቻናሴ? 6 ህንተ ምያ ዎደነ ኡያ ዎደ ህንተዉ ሜታነ ኡዬታ። 7 የሩሳላመ ካታማይነ እያ ዩሹዋን ደእያ ካታማታን ደእያ አሳይ ሸምፖንነ እንጀን ደእዳ ዎደነ ነገባንነ ጋን አሳይ ዎፑ ግድ ደእዳ ዎደ ጎዳይ ባ ናበታ ባጋራ ኦድዳ ቃላይ ሀይሳ ግደኔ?’ ያጋ" ያግስ።

8 ጎዳ ቃላይ ዛካርያሳኮ ሀይሳዳ ያግድ ይስ፦ 9 "ኡባፈ ዎልቃማ ጎዳይ ካሰ እምዳ ኪታይ፥ ‘ሱረ ፕርዳ ፕርድተ፤ ህንተ እሶይ እሱዋስ ኬሀተነ ማሮተ ኦተ። 10 አምኤታ፥ ይኦታ፥ በተ አሳነ ማንቆታ ናቆፍተ። ቃስ ህንተፈ ኦንካ ባ እሻ ቦላ ኢታባ ኦናዉ ባ ዎዛናን ቆፖፎ።’

11 "ሽን ኤንቲ ስኦና እፅዶሶና፤ ዞኮ ዛሪድ ባንታ ሀይ ቱጭዶሶና። 12 ኡባፈ ዎልቃማ ጎዳይ ባ አያናን ካሰ ባ ናበታ ባጋራ ኪትዳ ህግያነ ቃላ ስኦና እፅድ ባንታ ዎዛና ዛላዳ ምንዶሶና። ሄሳ ግሾ፥ ኡባፈ ዎልቃማ ጎዳ ማታፐ ግታ ሀንቆይ ኤንታ ቦላ ይስ። 13 ታኒ ፄግያ ዎደ ኤንቲ ስኦና እፅዳይሳዳ ኤንቲ ፄግያ ዎደ ታኒ ስእከ" ያጌስ ኡባፈ ዎልቃማ ጎዳይ።

14 "ታኒ ጎተ ኤሀዳ ኤንቲ ኤሮና ካዎተታ ግዶን ላላስ። ቢታይ አስ ያነ ሃነ ስመረቶና ካይሳ ቢታ ግድስ፤ ሀ ሎኦ ቢታይ ባይሳ ግድስ" ያጌስ ኡባፈ ዎልቃማ ጎዳይ።