1 GODAA qaalay taakko yiidi, 2 «Haysso asa nawu! Xiroosi gishshas zilala. 3 Abban gelizaso pengen dizaarissinne daro abba gaxatan diza deretara zal7iza Xiroosis, Ubbaa Haariza GODAY,

«Hanne Xiroosee!

‹Neni nena keehippe

lo7o› gadasa;

4 Ne zaway abba giddon dees;

nena ooththidayti keehi

lo7eththi ooththida.

5 Ne sanqqata ubbaa,

Sanireppe yida

xiiddan ooththida;

markabe tuussati

Libaanooseppe yida

zigappe giigida.

6 Baasaaneppe yida wolappe

markabe laaggiza miish ooththida;

Qophiroose zawappe yida

ziga miththaa,

danggarsa zaalen aleqessidi

ne wuygeza ooththida.

7 Ne Markabeza xibabey

Gibxe biitta laynoppe oosettides;

hessi nena bandira mala go7ides.

Salo misatizanne ochcha

teera misatiza

ne sharati Qophirooseppe yida.

8 Markabe sololissizayti

Sidoonappenne

Arwaadeppe yidayta;

hanne Xiroose,

ne markabe laaggizayti

loohida ne asata.

9 Gebaaleppe loohida daannatinne

hiillanchchati

ne markabeta koolanaas

ne giddon deettes;

abba bollara biza markabetinne

markabe laaggizayti ubbay

heregettidi nenara zal7ettanaas

neekko yeettes.

10 «Paarise, Luudenne Puuxe asati

wottadara gididi

ne olanchchata giddon

nena haggazeettes;

nees teema gidana mala

bantta gondallenne

bantta birata qoobe

ne godaa bolla kaqqida.

11 Arwaadenne Heleeke asati

ne gimbeta ubbasora

naageettes;

Gamaadeppe yida asati

ne gimbe giddon deettes;

istti bantta gondalle

ne gimbeza yuushon kaqqida;

ne puulateththaa

kumeth ooththida.

12 «Keehi daro gidida ne dureteththa gaason Tarseesey nenara zal7en gayttadus; iza biranne birata, qorqoronne irsaase ehada ne shaqaceta laame ekkawus.

13 «Yaawaaney, Tubaaleynne Mesheekey nenara issife zal7eettes; aylletanne xarqimalappe oosettida miishshata shaqacera laammeettes.

14 «Beeti-Togarma asati caana parata, ola paratanne baqulota shaqacen laammeettes.

15 «Erodoose* asati zal7en nenara gayttida; daro haruro dereti ne shaqaceta danggarsa zaaleninne Zophe geetettiza miththan laammeettes.

16 «Keehi daro gidida ne aqota gaason Aaraamey nenara zal7en gayttadus; ne shaqacekka beluren, ochcha teera misatiza carqqan, xibaben, lo7o laynon, heleloninne zo7o inqqun laammeettes.

17 «Yuhudaynne Isra7eeleykka attontta nenara zal7en gayttida; istti Miniteppe yida gistte, malido, ees, zaytenne balasaane geetettiza dhalliza zayte ne shaqacezara laammeettes.

18 «Ne daro dureteththanne ishalo duussa gaason Damasqo asati Helboone woyne ushshinne Zahaare dere dorsa iske shiishshidi nenara zal7ettida.

19 «Oozeelen diza Daaneynne Girke asay ne dumma dumma miishshaa shammida; istti ne miishshaara laammanaas aleqettida birata, dumma dumma sawotanne qarafa ehida.

20 «Dadaaney ne shaqace gilaasera laammawus.

21 «Arabiya halaqatinne Qeedaare halaqati ubbay ne laggeta; istti laaqqa, dharshonne deyshe ehidi nenara zal7eettes.

22 «Saaba zal7anchchatinne Eraa7ime zal7anchchati nenara zal7etteettes; doorettida qimame ubbaa, al7o shuchchinne worqqa shiishshidi shaqacen nenara zal7etteettes.

23 «Kaaraane, Kaane, Edene, Saaba, Asoorenne Kilmaade zal7anchchati nenara zal7etteettes. 24 Heytikka ne giya giddon lo7o may7o, salo misatiza kaabba, xibabe, hessaththoka birata qalamen phoollizanne minni dadettida sigaajja ehidi nenara zal7etteettes.

25 «Tarseese markabeti

ne shaqace caani caani efida;

neni abba giddon deexo caana

caanettada daasa.✝

26 Markabe sololissizayti ciimma

abba giddon nena efida;

gido attiin arshey

mokkiza bagga carkoy

abba giddon

nena menththereththides.

27 Markabe daafay

ne bolla gakkiza gallas

ne aqotay, ne shaqaceynne

ne zal7e miishshay,

ne markabeza sololissizayti,

markabezan bizaytinne

markabe oosanchchati,

ne zal7anchchatinne

ne wottadarati ubbay,

markabezan dizayti ubbay,

duge ciimma abban mitettana.

28 Ne markabe sololissizayti

waassishin,

abba gaxan dizayti

yarkiyarkeettes.

29 Markabe sololissizayti ubbay

bantta markabeta oli baana;

markabe sololissizaytinne

markaben dizayti ubbay

wodhdhidi abbaa gaxan eqqana.

30 Bantta qaala dhoqqu histtidi

camo yeeho nees yeekkana;

bantta hu7en gudulla qolidi

bidinththa bolla bululettana.

31 Ne gishshas kayottidi

bantta hu7e bulusana;

maaqaka may7ana;

wozinappe ceecidi

camo yeeho nees yeekkana.

32 Ne gishshas istti waassishe

yeekkana;

istti nees zilalishe,

‹Abban mitetti co7u giday,

Xiroose malay oonee?› gaana.

33 Ne shaqacey

abbaafe pinni kezida wode,

daro dereta kalssaasa;

neni ne gita aqotaninne

ne shaqacezan biittan diza

kawoteththata duresadasa.

34 Ha7i gidikko ciimma haaththan

abba giddon meqeretta

kundadasa;

ne caanaynne caanettida

asay ubbay

nenara abban mitettida.

35 Abba gaxan de7iza asay ubbay

ne bolla gakkidayssa be7idi

dagammida.

Istta kawotikka hirgan kokkorida;

istta ayfesoy laamettides.

36 Hara kawoteththata giddon diza

zal7anchchati

ne bolla ay keena wayqidoo!

ne wurseththay

daganththizaaz gidides;

ne mernaas beettaka» gides.