1 GODAA qaalay taakko yiidi, 2 «Haysso asa nawu! Hayssa mala gaada tinbite yoota: Ubbaa Haariza GODAY,

« ‹Wu! Wuy› ga waassa;

‹He gallassays aayye ana!› ga.

3 Gallassay matides!

GODAA gallassay gakkides!

He gallassay shaara gallassa;

kawoteththata ubbaas

bashsha gallassa.

4 Gibxe bolla olay yaana;

Tophphiya bollaka tuggay yaana.

Daroti Gibxen shuketti kundana;

izi aqotay bonqqettana;

izi yochchatikka laalettana.

5 «Tophphiyaynne Puuxey, Luudeynne Arabey, Liibiyaynne caaqo qaala biitta asay Gibxera issife mashshan wurana.

6 «Ubbaa Haariza GODAY,

‹Gibxera zuppetizayti kundana;

iza otorettiza minoteththay dhayana;

Migidooleppe biidi

Asiwa gakkanaas,

istti mashshan hayqqana› gees.

7 Bula biittata giddon

istti aadhdhi bula gidana;

istta katamatikka

laalettida katamata giddofe

issaa gidana.

8 Tani Gibxen tama oyththiza wode,

izo maaddizayti ubbay

kundiza wode,

tani GODAA gididayssa

istti he wode erana.

9 «He gallas ta qasttanneti markaben biidi badhdhi ga uttidasohoppe kessanaas Tophphiya daganththana; Gibxey dhuman mitettiza wode istta ceecey oykkana; tumappe he gallassay yaana».

10 Ubbaa Haariza GODAY,

«Baabiloone kawo Nabukadanaxoore kushen

qooday baynda Gibxe dere asaa

ta dhayssana.

11 Kawoteththata ubbaafe

menxe iita gidida

izinne iza oosanchchati

biittayo dhayssanaas

yaana mala ooththana;

bantta mashsha

Gibxe bolla shoddidi

biittayo aha xalla histtana.

12 Abbaye shaafa tani melissana;

biittayokka iita asatas bayzana;

allagata kushen biittayonne

izin diza ubbaa ta bula histtana;

tani GODAY hayssa yootadis.

13 «Eeqa xoossata

ta dhayssana;

Memppisan diza misleta

ta dippi histtana;

hayssafe guye Gibxen

halaqatanay deenna;

biittay bolla

ta yashshateth kiittana.

14 Tani Phaxiroose biitta

bula histtana;

Xaanoose bolla tama yeddana;

Teebeese bolla qixaate yeggana.

15 Gibxes miixa gidida

Siina bolla ta bashshaa gussana;

qooday baynda Teebeese asaa

ta dhayssana.

16 Tani Gibxe bolla tama eeththana;

Siiney ceecen bul7akettana;

Teebeesey dambalan mitettana;

Memppisay duuxxontta

ceece giddo gelana.

17 Heeliyootenne

Buubastte naateththati

mashshan siifettana;

he katamatikka di7ettana.

18 Tani Gibxe qambara menththiza wode

Xaafinaasen gallassay qammana;

hessafe guye iza otorettida

izi minoteththay kundana;

iza shaaran kamettana;

izi gutatikka di7ettana.

19 Hessa gishshas ta Gibxe bolla

ta qixaate ehana;

isttika tani GODAA gididayssa

he wode erana» gides.

20 Nuni di7ettida tammanne issinththa layththan, koyro aginan, laappunththa gallassan GODAA qaalay taakko yiidi, 21 «Haysso asa nawu! Tani Gibxe kawo qese menththadis; izi paxana mala iza qesey koolettibeenna; woykko izi mashsha oykki dandayana mala iza kushey maqqan koolettibeenna. 22 Hessa gishshas Ubbaa Haariza GODAY, ‹Tani Gibxe kawo Paaroone bolla dendadis; izas paxa qesezaranne meqo qesezara nam7aa gaththa menththana; iza mashshay iza kusheppe kessi ekki wodhdhana mala ta ooththana. 23 Tani Gibxe asaa kawoteththata giddon laallana; hara dereta giddonkka zerana. 24 Tani Baabiloone kawo qese minththada ta mashshaaka iza oyththana. Gido attiin Paaroone qeseza ta menththana; izikka ba morkkeza sinththan iita madunxida asa mala toqqana. 25 Baabiloone kawo qese ta minththana; gido attiin Paaroone qesey daaburana; tani ta mashshaa Baabiloone kawo kushen oyththiin izikka qaaththishin tani GODAA gididayssa istti erana. 26 Ta Gibxeta kawoteththata giddon laallana; dereta giddonkka zerana; hessafe guye tani GODAA gididayssa istti he wode erana› gees» gides.