1 GODAA qaalay taakko yiidi, 2 «Haysso asa nawu! Xiroose halaqas Ubbaa Haariza GODAY:

«Ne wozinay otoron kumidi,

‹Tani xoossa;

xoossa araatan abbaas

giddo addan uttadis› gides.

Aykkoska neni tani xoossa mala

aadho eranchcha ga qoppikokka

neni asa attiin xoos daakka.

3 Neni Daaneelappe bollara

aadho eranchchaa?

Neeppe geemmida

xuura yo7oy deennee?

4 Ne aadho erateththaninne

ne akeekan

ne aqota dagasadasa;

worqqanne bira

ne minjja keeththan

shiishshadasa.

5 Ne zal7e ooso erateththan

keeha bida gishshas,

aqota bolla aqota dagasadasa;

ne aqota daroteththafe

dendidayssan

ne wozinay otoron

kumides gaada yoota.

6 «Hessa gishshas

Ubbaa Haariza GODAY,

‹Tani xoossa mala

aadho eranchcha›

gaada neni qoppiza gishshas,

7 Kawoteththata giddon

keehi menxe iita gidida allagata

ta ne bolla ehana.

Istti ne aadho erateththa

puulateththa bolla

bantta mashsha shoddana;

gita ne bonchchozakka tunisana.

8 Nena duge nena ollan yeggana;

ciimma haaththan abba giddon

iita hayqo ne hayqqana.

9 Histtiin neni nena wodhizayta

sinththan,

‹Tani xoossa› gaandii?

Nena wodhizayta kushen

ne gelashe

neni asa attiin xoos daakka.

10 Neni allagata kushen

ammanontta asata

hayqo mala hayqqana;

Ubbaa Haariza GODAY,

‹Tani hayssa yootadis›

gees» gides.

11 Qasseka GODAA qaalay taakko yiidi, 12 «Haysso asa nawu! Xiroose kawo gishshas zilalashe Ubbaa Haariza GODAY nena,

« ‹Aadho erateththan kumada,

kumeththa puulateth may7ada

neni asas tumu leemiso gidadasa.

13 Neni Edenen,

Xoossa atakilte giddon de7adasa;

bonchcho shuchchazi issoy issoy

nena alleqissides;

isttika sardiyoone,

tophaaziyoonenne almaaze,

margide, iyasphidenne simpere,

belure, birillenne al7o inqqu;

ne may7otikka xolqiza

inqqunne worqqa;

hayti neni medhettida

gallas oosettida.

14 Neni naagiza

kirube gidada tiyettadasa;

hessas ta nena shuumadis;

neni kase geeshsha zumaan

Xoossayssan de7adasa;

tama mala shuchchata giddon

simerettadasa.

15 Neni medhettida gallassafe doommiin,

iitateththi ne bolla

beettida gallas gakkanaas,

ne oge ubbaan

borey baynda de7adasa.

16 Ne zal7ey minnida gishshas,

makkallateththan kumadasa;

nagarakka ooththadasa.

Hessa gishshas ta nena

Xoossa zuma bollafe

kawushshada yedeththadis;

haysso naagiza kirubee!

ta nena tama misatiza

shuchchata giddofe kessadis.

17 Ne puulateththaa gaason,

ne wozinay otorettides;

ne bonchcho gitateththaafe

dendidayssan,

ne aadho erateththaa tunisadasa;

hessa gishshas tani nena

duge biittan oladis;

hara kawota seeranaas

malata ooththadis.

18 Ne nagaraninne ne cimo zal7e

daroppe dendidayssan,

ne goynniza keeththata

tunisadasa.

Hessa gishshas

tani tamay ne giddofe

kezana mala ooththadis;

izikka nena mides.

Nena be7iza ubbaa sinththan,

biitta bolla nena bidinth kessadis.

19 Nena eriza kawoteththati ubbay,

ne bolla gakkidayssan dagammida.

Ne wurseththi

ceecissizaaz gidides;

hayssafe guye nees

de7oy deenna› gees» gides.

20 GODAA qaalay taakko yiidi,✝ 21 «Haysso asa nawu! Ne ayfeso Sidoona bagga zaarada tinbite izi bolla yoota. 22 Neni deraas Ubbaa Haariza GODAY nena,

‹Hanne Sidoona tani ne bolla dendadis;

ne giddon tani bonchchettana;

qixaate tani izi bolla ehishin,

ta geeshshateththaaka

ta izi giddon qonccisishin,

tani GODAA gididayssa istti erana.

23 Tani izi bolla iita harge ehana;

izi ogetan suuththi gukkana mala

ta ooththana;

Ubbaa baggara yiza

mashshan siifettidayti,

izi giddon kundana;

hessafe guye

tani GODAA gididayssa

istti erana.

24 « ‹Hayssafe guye Isra7eele asaa un7eththiza kindichchoynne caddiza agunth gidida shooroti istta yuushon deettenna; hessan tani Ubbaa Haariza GODAA gididayssa istti erana› gees» gides.

25 Ubbaa Haariza GODAY, «Ta Isra7eele deraa istti laalettida kawoteththata biittafe shiishshiza wode, kawoteththati xeellishin ta geeshshateththaa tani istta giddon qonccisana; hessafe guye istti tani ta aylle Yaaqoobes immida bantta biittan de7ana. 26 Heen istti saron daana; keeththata keexxana; woyne tura tokkizasohota giigsana; istti kadhida shoorota ta qaxxayiza wode istti saron daana; hessafe guye tani GODAY istta Xoos gididayssa istti erana» gees.