1 Nuni di7ettida tammanne issinththa layththan, heedzdzanththa aginan, koyro gallassan GODAA qaalay taakko yiidi, 2 «Haysso asa nawu! Gibxe kawo Paaroonessinne qooday baynda iza deraas,

« ‹Gitateththan nenara

ginattanay oonee?

3 Iza haggay woraas kuwa gididi

daro luule gididi iza xeeray

salo gakki diichiza

Libaanoose ziga

misatiza Asoore xeellite.

4 Haaththati iza caarissida;

ciimma pulttotikka iza dichchida;

istta kanchche

haaththati goggida;

istta xaphoy dizaso

ubbaa irxxisida;

demban diza miththata ubbaakko

zara haath yeddida.

5 Haath kallida gishshas

wora giddon diza mith ubbaafe,

keehi aduqqides;

iza haggati daayida;

unquloti aduqqida.

6 Salo kafoti ubbay iza haggata bolla

bantta keeth keexxida;

wora do7ati ubbay

iza haggata garsan

marata yelida;

gita kawoteththati

ubbay iza kuwa

garsan de7ida.

7 Daayida iza haggatara

izas puulazi keehi lo7o;

iza xaphoti haaththi

dari dizaso bida.

8 Xoossa gannaten diza zigatikka

izara ginattana dandaybeettenna;

xiiddatikka iza haggatara

ginattettenna;

wolatikka iza haggara

ginattettenna;

Xoossa gannaten diza

ay miththika

lo7eteththan iza gakkenna.✝

9 Tani iza daro haggatara gaththa

puulasa medhdhadis;

Xoossa gannaten diza

miththati ubbay

iza amottana mala

ooththadis› gees ga.

10 «Hessa gishshas Ubbaa Haariza GODAY, ‹Cuppu gida bonccota bolla xeeraa dhoqqu histtidi bana zaradhissida gishshas, ba adussateththan izi otorettida gishshas, 11 tani iza iitateththaa keena iza ooso gate immana mala kawoteththata haarizayssas ta iza aaththa immadis. Ta iza kessa wora oladis. 12 Kawoteththata garsan keehi menxe iita allagati iza qanxxereththi yeggida; iza unquloti zumataninne zulletan kundida; iza haggatikka meqeretti haaththa zaratan wodhdhida; biittan diza kawoteththati ubbay iza kuwa garsafe kezidi yeggi bida. 13 Salo kafoti yiidi kundida miththaa bolla uttida; wora do7atikka ubbay kundida miththaa haggata bolla uttida. 14 Hessa gishshas haaththa lanqen diza ay miththika ba xeera cuppu gida bonccotappe bollara dhoqqu histtidi hayssafe guye bana otoron zaradhissenna; qasseka ay miththika lo7eththidi hayssaththo aduqqenna; ubbayka hayqqidi duge duufon gelizaytara issife hayqqana mala pirdettides› gees.

15 «Ubbaa Haariza GODAY, izi duge duufon gelida gallas ciimma pulttota iza gishshas kayon kammadis; shaafata teqqadis; goggiza haaththatikka eqqida; ta iza gaason Libaanoose dhuma mayzadis; wora miththati ubbay melida. 16 Duge duufon gelizaytara ta iza gelththiza wode izi kundishin siyettida giirissay kawoteththata daganththides; hessafe guye Edene miththati, dummanne doorettida Libaanoose miththati, haath kallida miththati ubbay biitta garsan dishe minettida. 17 Kawoteththata giddofe izara zuppetidayti, iza kuwa garsan de7idayti, mashshan siifettidaytara gayttanaas duge duufon wodhdhida.

18 «Edenen miththatappe puulateththaninne adussateththan nenara ginattanay oonee? Gido attiin nenikka hessaththo Edene miththatara issife biitta gars gelana; mashshan hayqqidaytaranne ammanonttaytara issi bolla ichchana.

«Paaroonenne qooday baynda iza deraa gakkanayssi hayssa; tani Ubbaa Haariza GODAY hayssa yootadis» gides.