1 बेलशस्सर नामका राजा ने अपना हजार मुखियाहोन का लिये बडो खानो कऱ्यो, अरु वे हजार दुनियाहोन का सामने दाखमधु पियो. 2 दाखमधु पीना का बाद ओने अपना कर्मचारिहोन खे आज्ञा दीयो, हे बेलशस्सर कि ओको बाप नबूकदनेस्सर का वजेसे यरुशलेम कि मन्दिर मे से लाया गया सोना-चांदी का पात्र ओका सामने लाया जाये, ताकी वे पात्रहोन मे उ, ओका मुखिया, ओकी रानिहोन अरु ओकी रखेलहोन ओमे दाखमधु पीये. 3 तब जो सोना का पात्र यरुशलेम मे परमेश्वर का भवन का मन्दिर मे से निकाल्या गया था, वे लायो गयो; अरु राजो अपना मुखियाहोन, अरु रानिहोन, अरु रखेलहोन समेत ओमे पीन लग्यो. 4 वे दाखमधु पी पीखे सोनो, चादी, पीतल, लोखोंड, लकडी अरु फत्थर का देवताहोन कि स्तुति करी ही रा था, 5 कि उही टेम इन्सान का हात की कइ उगलिहोन निकालीखे दीवट का सामने राजभवन कि दीवार का चूना पर कुछ लिखन लग्या; अरु हात को जो भाग लिखी रो थो, उ राजा खे दिखय दियो. 6 ओखे देखीखे राजा का मुडा को रंग बदली गो, अरु उ मन ही मन घबरय गयो, अरु ओकी कमर कि जोड ढिली हुइ गय, अरु कापता ओका टोग्या एक दुसरा से टकरान लग्या. 7 तब राजा ने उचा आवाज से पुकारीखे तांत्रिहोन, कसदी पंडितहोन अरु होनारगडी बतानवाला खे हजर करन कि आज्ञा दी. जब बेबीलोन का पंडित नजिक आया, तब राजो उनका से बोलन लग्यो, "जो कोय उ लिख्यो हुयो पढीखे ओको अर्थ मेखे समझाये ओखे जामुनी रंग का कपडा, अरु ओका गंला मे सोना कि गोप पेनय जाये; अरु मरा राज मे तिसरो उही राज करे." 8 तब राजा का सब डिमाकवाला इन्सान अंदर आया, पन उ लिख्य हुया खे नी पडी सक्या अरु नी राजा खे ओको अर्थ समझय सक्या. 9 येका पर बेलशस्सर राजो बोत घबरय गयो अरु ओका मुडा को रंग बदली गो; अरु ओका मुखिया भी बोत व्याकुल हुया. 10 राजा अरु मुखियाहोन का वचनहोन खे सुनिखे, रानी खाना का भवन मे आय अरु बोलन लगी, हे राजा, तू हमेशा जिन्दो ऱ्हीहे, अपना मन मे मत घबरा अरु मत उदास होय. 11 तरा राज मे दानिएल नामको एक इन्सान हइ जेको नाम तरा बाप ने बेलतशस्सर रख्यो थो, ओमे पवित्र इश्वरहोन कि आत्मा ऱ्हेस हइ, अरु उ राजा का दिनहोन मे ओमे डिमाक, समझदारी अरु इश्वरहोन का तुल्य डिमाक देखी गइ. "हे राजा, तरो बाप जो राजो थो, ओमे ओखे सब पंडितहोन, तांत्रिहोन, कसदी पंडितहोन अरु भविष्य बतानवाला को मुखियो बनायो गयो थो, 12 क्युकी ओमे उत्तम आत्मा, ज्ञान अरु समझदारी, अरु सपना को अर्थ बतानो अरु लुकी बात खोलन, हे बेलतशस्सर अरु सन्देह दुर करन कि शक्ति देखी गइ. येकालिये अब दानिएल खे बुलायो जाये, अरु उ येको अर्थ बाताये."

13 तब दानिएल राजा का सामने अंदर बुलायो गयो. राजो दानिएल से पुछन लग्यो, "का तु उही दानिएल हइ जो मरो बाप नबूकदनेस्सर राजा का वजेसे यहूदा देश से लायो हुयो यहूदी बधुहोन मे से हइ? 14 मे ने तरा बारे मे सुन्यो हइ कि इश्वर कि आत्मा तरा मे ऱ्हेस हइ; अरु डिमाक, समझदारी अरु उत्तम ज्ञान तरा मे दिखय जास हइ. 15 देख, अभी पंडित अरु तांत्रि दुनिया मरा सामने येकालिये लाया गया था कि यो लिख्यो हुयो पडे अरु ओखे अर्थ मेखे बतये, पन वे वा बात को अर्थ नी समझ्या सक्या. 16 पन मे ने तरा बारे मे सुन्यो हइ कि दानिएल लुकि बात खोली सकस अरु सन्देह दुर करी सकस हइ. येकालिये अब अगर तु उ लिख्या हुया खे पडी सखे अरु ओको अर्थ भी मेखे समझय सखे, ते तोखे बैंजनी रंग का कपडा, अरु तरा गला मे सोना कि गोप पेनय जाये, अरु राज मे तिसरो तू ही राज करे." 17 दानिएल ने राजा से बोल्यो, अपनो दान अपना ही पास रख; अरु जो दान तू देनो चास हइ, उ दुसरा खे दे; वा लिखी हुइ बात मी राजा खे पडी खे सुनायु, अरु ओको अर्थ भी तोखे समझायु. 18 हे राजा, परममुखिया परमेश्वर ने तरो बाप नबूकदनेस्सर को राज, बडाइ, महानता अरु महिमा कऱ्यो थो; 19 अरु वा बडाइ का कारन जो ओने ओखे दी थी, देश-देश अरु राज्य-राज्य का सब दुनिया, अरु अलग-अलग भाषा बोलनवाला ओका सामने थरथर कापता था; जेखे उ चाये ओखे उ मरतो थो, अरु जेखे उ चाये ओखे उ जिन्दो रखतो थो; जेखे उ चाये ओखे उ उचो पद देतो थो, अरु जेखे उ चाये ओखे उ गिरय देतो थो. 20 पन जब ओको मन घमंड करन लगीगो, अरु ओकी आत्मा कठोर हुइ गइ, यहा तक कि उ अभिमान करन लग्यो, तब उ अपना राजगद्दी पर से उताऱ्यो गयो, अरु ओकी महानता भंग की गइ; 21 उ इन्सानहोन मे से निकाल्यो गयो, अरु ओको मन जनवरहोन का जसो अरु ओको ऱ्हेनो जगली गंधा का बिच हुइ गो; उ बैलहोन का जसो घास चरे, अरु ओको आग आकाश कि ओस से गिलो होतो थो, जब तक कि ओने जानी नी लियो कि परममुखिया परमेश्वर इन्सानहोन का राज मे राज करस हइ अरु जेखे चाये ओखे ओका पर अधिकारी रखतो थो. 22 तेभी, हे बेलशस्सर, तू जो ओको बेटो हइ, अरु यो सब कुछ जानतो थो, तेभी तरो मन नम्र नी हुयो. 23 वरण तोने स्वर्ग का प्रभु का विरोध्द मे माथो उठयखे ओका भवन का पात्र मागीखे अपना सामने रखी लिया, अरु अपना मुखियाहोन अरु रानिहोन अरु रखेलहोन समेत तोने ओमे दाखमधु पियो; अरु सोना-चादी, पीतल, लोखोंड, लकडी अरु फत्थर का देवता, जो नी देखस नी सुनस, नी कुछ जानस हइ, उनकी तो स्तुति करी पन परमेश्वर की जेका हात मे तरी जान हइ, अरु जेका कुल मे तरो सब चलनो फिलनो हइ, ओको सम्मान तोने नी कऱ्यो. 24 "तब ही यो हात को एक भाग ओका तरप से प्रगट कऱ्यो गयो हइ अरु वे बोल लिख्या गया हइ. 25 जो बोल लिख्या गया वे ये हइ : मेने*, तखेल*, अरु उपर्सीन*. 26 यो लेख को अर्थ यो हइ : मेने, यानिकि परमेश्वर ने तरा राज का दिन गिनीखे ओको खातनो करी दियो हइ. 27 तखेल, यानिकि तू मान तराजू मे तोल्यो गयो अरु हलको पायो गयो हइ. 28 परेस*, यानिकि तरो राज बाटिखे मादिहोन अरु फारसिहोन दुनियाहोन खे दियो गयो हइ." 29 तब बेलशस्सर ने आज्ञा दी, अरु दानिएल खे बैंजनी रंग का कपडा अरु ओका गंला मे सोना कि गोप पेनय गइ; अरु ढिढोरावाला ने ओका बारे मे बोल्यो, कि राज मे तीसरो दानिएल राज को तिसरो मुखीयो शासक हइ✝. 30 उही रात कसदी को राजो बेलशस्सर मारी डाल्यो गयो, 31 अरु ओका बाद दारा जो मादि जो बासठ साल का उमर मे उ राज को राजा बन्यो.