1 मादी क्षयर्ष को बेटो दारा, जो कसदी का देश पर राजो ठहरयो गयो थो, 2 ओका राज का पहला साल मे, मी दानिएल ने पवित्र लिखन किताबहोन का वजेसे समझी लियो कि यरुशलेम कि उजडी हुइ दशा यहोवा का उ वचन का अनुसार जो यिर्मयाह नबी का पास पोच्यो थो, कुछ सालहोन का बीतना पर यानिकि सत्तर साल का बाद पुरी हुइ जाये. 3 तब मी अपनो मुडो प्रभु परमेश्वर का तरप करीखे गिडगिडाहट का सात प्रार्थना करन लग्यो, अरु उपवास कर, बोरा का कपडा पेनीखे, राख मे बठीखे बिनती करन लग्यो. 4 मे ने अपना परमेश्वर यहोवा से यो प्रकार प्रार्थना करी अरु पाप को अंगीकार कऱ्यो, "हे प्रभु, तू महान अरु डर अरु दया का योग्य परमेश्वर हइ, जो अपना प्रेम रखन अरु आज्ञा माननवाला का सात अपनी वाचा खे पुरी करस अरु प्रेम करतो ऱ्हेस हइ, 5 हम दुनियाहोन ने तो पाप, कटुलता, बेकार काम अरु विरोध्द कऱ्यो हइ, अरु तरी आज्ञाहोन अरु नियमहोन खे तोडी दियो हइ. 6 तरो जो दास भविष्यद्वक्ता दुनिया, हमारो राजाहोन, हाकिमहोन, मुखिया, बापदादाहोन अरु सब साधारण दुनियाहोन से तरा नाम से बात करता था, उनकी हम ने नी सुनी. 7 हे प्रभु, तू धर्मी हइ, पन हम दुनियाहोन खे आज का दिन लज्जित होनु पडस हइ, यानिकि यरुशलेम मे ऱ्हेनवाला सब यहूदा होन खे, का समीप, का दुर का सब इस्राएली दुनियाहोन खे, जेखे तोने उ विश्वासघात का कारन जो उन्हे तरा साथ कऱ्यो थो, देश मे तितर-बितर करी दियो हइ, वे सब खे लजवाने होनु पडस हइ. 8 हे यहोवा, हम दुनियाहोन ने अपना राजाहोन, हाकिमहोन अरु मुखिया, बापदादाहोन समेत तरा विरोध्द पाप कऱ्यो हइ, येका कारण हम खे लज्जित होनु पडस हइ. 9 पन हे यहोवा, तु दयालु हइ, जो दुनिया बुरो काम करस हइ ते तु उनखे माप करस हइ, बलकी हम ने सचमुच कटुलता से मुडो फेरी लियो थो. 10 हम तो अपना परमेश्वर यहोवा कि शिक्षा सुना पर भी ओका पर नी चल्या जो ओने अपना भविष्यद्वक्ता से हम खे सुनय. 11 लेकिन सब इस्राएली होन ने तरी व्यवस्था को उल्लंघन कऱ्यो, अरु असा हटी गा कि तरी नी सुनी. येका कारण जो कसम कि चर्चा परमेश्वर को दास मूसा कि व्यवस्था मे लिखी हुइ हइ, वा कसम हम पर घटी गो, क्युकी हम ने ओका विरोध्द पाप कऱ्यो हइ. 12 येकालिये ओने हमारा अरु न्यायिहोन का बारे जो वचन बोल्या था, ओने हम पर बडी मुसिबत डालीखे पुरो कऱ्यो हइ; यहा तक कि जसी मुसिबत यरुशलेम पर गिरी हइ, असी सब जमिन पर अरु कही नी गिरी. 13 जसी मूसा कि व्यवस्था मे लिखी हुये, असी ही या सब मुसिबत हम पर अय गिरी हइ, तेभी हम अपना परमेश्वर यहोवा खे मनान का लिये नी ते अपना बुरा काम से फिरे, अरु अपराध नी तरी सच्ची बातहोन पर ध्यान दियो. 14 येका कारन यहोवा ने सोची बिचारीखे हम पर मुसिबत डाली हइ; क्युकी हमारो परमेश्वर यहोवा जतनो काम करस हइ वे सब मे न्यायी ठहऱ्यो हइ; पन हम ने ओकी नी सुनी. 15 अब, हे हमारा परमेश्वर, हे प्रभु, तोने अपना दुनिया खे मिस्र देश से ताकतवर हात का वजेसे निकाली लायो अरु अपनो असो बडो नाम कऱ्यो, जो आज तक प्रसिध्द हइ, पन हम ने पाप कऱ्यो हइ अरु बेकार काम कऱ्यो हइ. 16 हे प्रभु, हमारा अपराध अरु पापहोन अरु हमारो बापदादाहोन का बुरा कामहोन का कारण यरुशलेम कि अरु तरा दुनिया कि, हमारा आस पास का सब दुनियाहोन का तरप से बुराइ हुइ री हइ; तेभी तु अपना सब धर्म का कामहोन का कारन अपनी घुस्सा अरु जलजलाहट अपना नगर यरुशलेम पर से उतारी दे, जो तरी पवित्र टेकली पर बस्यो हइ. 17 हे हमारा परमेश्वर अपना दास कि प्रार्थना अरु गिडगिडाहट सुनीखे, अपनी उजड्यो हुइ पवित्रजगा पर अपना मुडा को उजालो चमका; हे प्रभु, अपना नाम का निमित्त यो करे. 18 हे मरा परमेश्वर, कान लगयखे सुन, आख खोलीखे हमारी उजडी हुइ दशा अरु उ नगर खे भी देख जो तरो बोलस हइ; क्युकी हम जो तरा सामने गिडगिडयखे प्रार्थना करस हइ, उ अपना धर्म का कामहोन पर नी, वरन तरी बडी दया ही का कामहोन पर भरोसो रखीखे करस हइ. 19 हे प्रभु, सुनी ले; हे प्रभु, पाप माप कर; हे प्रभु, ध्यान दिखे जो करनो हइ ओखे करी दे, देर नी करनु; हे मरा परमेश्वर, तरो नगर अरु तरा दुनिया तरो ही बोलस हइ; येकालिये अपना नाम का निमित्त असो ही कर."

20 येका प्रकार मी प्रार्थना करुस, अरु अपनो अरु अपना इस्राएली दुनियाहोन का पाप खे अंगीकार करुस हुये, अपनो परमेश्वर यहोवा का सामने ओकी पवित्र टेकली का लिये गिडगिडयखे बिनती करतो ही थो, 21 जब मी प्रार्थना करी ही रो थो, तब जिब्राएल, जेखे मी पहला दर्शन मे देखी चुक्यो थो, शाम का बलिदान का टेम जोर से मरा पास आयो. 22 ओने मरा से बोल्यो, हे दानिएल, मी तोखे डिमाक अरु समझदार देन खे अभी निकली खे आयोस हुये. 23 जब तू गिडगिडयखे बिनती करन लग्यो, तब ही येकी आज्ञा निकली, येकालिये मी तोखे बतान आयो हइ, क्युकी तु अति प्रिय ठहऱ्यो हइ; येकालिये ओका बारे को समझी ले अरु प्रार्थना अरु दर्शन कि बात को अर्थ जानी ले. 24 "तरा दुनियाहोन अरु तरा पवित्र नगर का लिये सत्तर हप्ता ठहरायो गयो हइ कि ओका आखरी तक अपराध को होनो बन्द हुयो टेकली, अरु पापहोन को खातमो अरु बुरा काम खे मानी लियो जाये, अरु हमेशा कि न्यायीपन प्रगट हुइ; बलिदान अरु दर्शन कि बात पर अरु भविष्यव्दाणी पर सिक्को दी जाये, अरु परमपवित्र को सत्कार कऱ्यो जाये. 25 येकालिये यो जान अरु समझी ले, यरुशलेम खे फिर बसान की आज्ञा का निकलना से लिखे अभिषिक्त* मुखिया का टेम तक सात हप्ता बित्या हुये. फिर बासठ हप्ताहोन का बितना पर चौक अरु खइ समेत उ नगर कष्ट का टेम मे फिर बसायो जाये. 26 वे बासठ हप्ताहोन का बितना पर अभिषिक्त* इन्सान काट्यो जाये : अरु ओका पास कुछ नी ऱ्हीहे; अरु आनवाला मुखिया कि दुनिया नगर अरु पवित्रजगा खे खतम तो करे. पन उ मुखिया को खतम असो हुये जसो बाढ से होस हइ; तेभी ओका खातमा तक झगडो होतो ऱ्हीहे; क्युकी ओको उजडी जानु निश्चय ठानी लियो गयो हइ. 27 मुखिया हर दुनियाहोन का सात पंकी वाचा बाधे, या वाचा को टेम साल का एक हप्ता कि हुये अरु ये साल का आधा हप्ता तक मुखियो जनवर बलिदान अरु अन्नबली, तब घृणित मुरती पुजा होना से उ मुखियो खतनो करनवालो ऱ्हीहे, उ टेम तक खतनो करतो ऱ्हीहे जब तक ओको आखरी को निश्चित टेम नी आये."