1 आग यहोवा मूसा से अंदुन, 2 "इस्त्राएलीगोळी आग्या कोळ कि आंदुर वापस होगकु मिग्दोल अदिक समुद्र अन न्याड्या, पीहाहीरोत इन हात्ती, बालसपोन इन मुंद तान ड्यारा निदरूसुल, अदुर्दा मुंद समुद्र अन किनारा मा ड्यारागोळ निदरूसुल. 3 आग फिरौन इस्त्राएलीगोळ बारा दा विचार माळ्यान, आंदुर द्याश इन उलझनगोळ दा फसुसकु आर अदिक आळी दा घिरूसेग्यार. 4 आग ना फिरौन उन मन इक कट्टर माळ बुळाईन, अदिक आव आंदुर्द पीछा माळ्यान. आग फिरौन अदिक आऊन सप्पा सेना अन द्वारा नांद महिमा आदीत; अदिक मिस्त्री लॉकुर अर्त कोंडार कि ना यहोवा हुईन." अदिक आंदुर हांगा माळदुर.

5 याग मिस्त्र अन राजा अक ईद खबर सिक्त कि आ लॉकुर ओळेग्यार, आग फिरौन अदिक आऊन कर्मचारीगोळ्द मन आंदुर खिलाप पलटुसेत, अदिक आंदुर अनली हतदुर, "नाव ईद येन माळदेव कि इस्त्राएलीगोळी तान दासत्व दा टु छुटकारा कोटकु होग गोट्टेव?" 6 आग आव तान रथ तयार माळदुन अदिक तान सेना अक सांगुळ हुळदुन. 7 आव आर सौ वळ्लेव से वळ्लेव रथ उलटा मिस्त्र अन सप्पा रथ हुळदुन अदिक आ सप्पा रथगोळ मा सरदारगोळी कुर्सदुन. 8 अदिक यहोवा मिस्त्र अन राजा फिरौन उन मन इक कट्टर माळ बुट्टुन. इदुरसाटी आव इस्त्राएली लॉकुर्द पीछा माळदुन; लेकीन इस्त्राएली बिना रूक्सद होटकु होगतोगोर. 9 लेकीन फिरौन उन सप्पा घ्वाळागोळ, अदिक रथगोळ, अदिक अऊर मा सवारगोळ समेत मिस्त्री सेना आंदुर पीछा माळकु आंदुर हात्ती, जो पीहाहीरोत इन हात्ती, बालसपोन इन मुंद, समुद्र अन किनारा मा ड्यारा हाक्‍कु ईरोर, पोहचुसदुर.

10 याग फिरौन हात्ती बंदुन, आग इस्त्राएली लॉकुर कण्ण नेगुकु येन नोळदुर कि मिस्त्री नाम पीछा माळतेला बरेत्यार; अदिक इस्त्राएलीगोळ हापाळ अंजेदुर, अदिक किटुरकु यहोवा अन दोहाई कोळ कुरतुर; 11 अदिक आंदुर मूसा से अनली हतदुर, "येन मिस्त्र दा कब्रगोळ ईला ईरव जो नी नामी अल टु सायोर साटी आळी दा तंदकु भिट्ट? नी नाम से ईद येन माळ्द कि नामी मिस्त्र टु तेगुकु तंद? 12 ✝14:12 निर्गमन 16:3; 17:3येन नाव नीन से मिस्त्र दा का ईदा मात अनतेला ईतीदील कि नामी ईरगोळ कि नाव मिस्त्रीगोळ्द स्यावा माळेव? नाम साटी आळी दा सायदुर अलावा मिस्त्रीगोळ्द स्यावा माळोद वळ्लीद ईरोद." 13 मूसा लॉकुर से अंदुन, "अंजबाळी, निदुर निदुरकु अद उद्धार इन क्याल्सा नोळी, जो यहोवा ईंद नीम साटी माळ्यान; यतिकी याता मिस्त्रीगोळी नीव ईंद नोळतीर, आंदरी बाक यागलु नोळतीदील. 14 ✝14:14 व्यवस्थाविवरण 20:4; यहोशू 10:14; यशायाह 30:15यहोवा खुद अच नीम साटी लळाई माळ्यान, इदुरसाटी नीव सुंगामुंगा ईरी." 15 आग यहोवा मूसा से अंदुन, "नी येती नान दोहाई कोळेत्या? इस्त्राएलीगोळी आग्या कोळ कि आंदुर ईल टु कूच माळुल. 16 अदिक नी तान कोल नेगुकु तान कय समुद्र अन म्याकुच वाळुस, अद येढ्ढ भाग आगेदीत; आग इस्त्राएली समुद्र अन न्याड्या दा टु आगतेला वळ्गींद जागा मा होटोदार. 17 अदिक केळ, ना खुद मिस्त्रीगोळ्द मनगोळी कट्टर माळतीन, अदिक आंदुर अल भी आंदुर्द पीछा माळ्यार. आग फिरौन अदिक आऊन सप्पा सेना, अदिक रथगोळ अदिक सवारगोळ्द विनाश इन द्वारा नांद महिमा आदीत. 18 अदिक याग फिरौन, अदिक आऊन रथगोळ, अदिक घुळसवारगोळ मा विजय द्वारा नांद महिमा आदीत, आग मिस्त्री लॉकुर अर्त कोंडार कि ना यहोवा हुईन."

19 आग परमेश्वर उन दूत जो इस्त्राएली सेना अन मुंद मुंद नळुतोगोन होगकु आंदुर हींद आगेदुन; अदिक बादल इन खम्भा आंदुर मुंदु टु हटुसकु आंदुर हींद निदुरकु ईत्त. 20 ईत्ता प्रकार देल आव मिस्त्रीगोळ्द सेना अदिक इस्त्राएलीगोळ्द सेना अन न्याड्या दा होटबंदुन; बादल अदिक अंधार रा ईरोद, तरी भी ईळ्लक इन होती आंदरी ऊजुळ सिकतेला ईत्त; अदिक आंदुर ईळ्लक तीम आबुर दाबुर हात्ती बंदिदील.

21 ✝ 14:21 भजन संहिता 106:9; 114:3 आग मूसा तान कय समुद्र अन म्याकुच वाळुसदुन; अदिक यहोवा ईळ्लक तीम प्रचड पूरवी हवा नळ्सदुन, अदिक समुद्र अक येढ्ढ भाग माळकु नीर हिंग हटुस बुट्टुन, यदुर देल अदुर न्याड्या समुद्र अन्द नीर येढ्ढ भाग आगेत अदिक वळ्गींद जागा आगेत. 22 आग इस्त्राएली लॉकुर समुद्र अन न्याड्या वळ्गींद जागा मा टु आगतेला नळदुर, अदिक नीर आंदुर्द डाक्या अदिक ऊजवा कय दी दीवार इन क्याल्सा माळतोगोद. 23 ✝14:23 १ कुरिन्थि 10:1,2; इब्रानिगोळ 11:24आग मिस्त्री, मतलब फिरौन उन सप्पा घ्वाळागोळ, रथ अदिक सवारगोळ आंदुर पीछा माळतेला समुद्र अन न्याड्या दा टु होटोदुर. 24 अदिक ईळ्लक इन आखरी पहर दा यहोवा बादल अदिक बेक्‍की इन खम्भा दा टु मिस्त्रीगोळ सेना मा दृष्टी माळकु आंदरी घबरूस बुट्टुन. 25 अदिक आव आंदुर्द रथगोळ्द चक्कागोळी तेग्द बुट्टुन, यदुर देल आंदुर रथ नळसोद कठिन आगेत. आग मिस्त्री आपस दा अनली हतदुर, "बरी, नाव इस्त्राएलीगोळ मुंदु टु ओळाता; यतिकी यहोवा आंदुर दी टु मिस्त्रीगोळ खिलाप लळाई माळेत्यान." 26 बाक यहोवा मूसा से अंदुन, "तान कय समुद्र अन म्याकुच वाळुस कि नीर मिस्त्रीगोळ, अदिक आंदुर रथगोळ, अदिक सवारगोळ मा मात्त वाहुसुल." 27 आग मूसा तान कय समुद्र अन म्याकुच वाळुसदुन, अदिक व्हातुर आग्त आग्त येन आत कि समुद्र मात्त ह्यांग इन हांगा आगेत; अदिक मिस्त्री उलटा ओळली हतदुर, लेकीन यहोवा आंदरी समुद्र अन न्याड्या दा अच वाहुस बुट्टुन. 28 अदिक नीर इन पलटुसदुर देल, यास रथ अदिक घुळसवारगोळ इस्त्राएलीगोळ हींद समुद्र दा बंदीदुर, आंदुर सप्पा उलटा फिरौन उन सप्पा सेना अदुर दा मुळकेत, अदिक आंदुर दा टु ऊंद भी ऊळदीदील. 29 लेकीन इस्त्राएलीगोळ समुद्र अन न्याड्या वळ्गींद जागा मा टु आगतेला होटोदुर, अदिक नीर आंदुर्द डाक्या अदिक ऊजवा येढ्ढु दी दीवार बनस्कु नीदुरकु ईरोद. 30 ईत्ता प्रकार देल यहोवा आ दिशी इस्त्राएलीगोळी मिस्त्रीगोळ्द वश दा टु बिळ्सदुन; अदिक इस्त्राएलीगोळ मिस्त्रीगोळी समुद्र अन किनारा मा सोतकु नोळदुर 31 अदिक यहोवा मिस्त्रीगोळ मा जो तान पराक्रम तोर्सुसीदुन, अदरी नोळकु इस्त्राएलीगोळ यहोवा अन अंज्क मान्सदुर अदिक यहोवा मा अदिक आऊन दास मूसा मा विश्वास माळदुर.