निर्गमन 9

पाचवा विपत्ती-जनावरगोळ्‍द मौत

1 बाक यहोवा मूसा से अंदुन, "फिरौन उन हात्ती होगकु अन, ‘इब्रीगोळ परमेश्वर यहोवा नीन से ईत्‍ता प्रकार देल अनतान: नान प्रजा अन लॉकुरी होगगोळ कि आंदुर नान आराधना माळुल. 2 अदिक अगर नी आंदरी होगगोळाल अदिक ईग भी हुडुकु ईत्‍या, 3 रा केळ, नीन जो घ्वाळागोळ, गदागोळ, ऊँटगोळ, गोसी-वस्ता, म्यांडा-मर्री ईव सप्‍पा मैदान दा आव, अऊर मा यहोवा अन कय हिंग कुरतीत कि हापाळ धोळ्‍द मरी बंदीत. 4 लेकीन यहोवा इस्त्राएलीगोळ जनावरगोळ दा अदिक मिस्त्रीगोळ जनावरगोळ दा हींग अंतर पैदा माळ्‍यान कि जो पशु इस्‍त्राएलीगोळव हुव अऊर दा टु यातव भी सायतीदील.’" 5 बाक यहोवा ईद अंदकु ऊंद समय निश्‍चित माळदुन, "ना ईद क्‍याल्‍सा ई द्‍याश दा नाळ माळाईन." 6 ✝9:6 भजन संहिता 78:50दुसरा दिशी यहोवा हींग अच माळदुन; अदिक मिस्त्रीगोळव रा सप्‍पा जनावरगोळ सोतोदव, लेकीन इस्त्राएलीगोळ्‍द ऊंद भी जनावर सोतीदील. 7 अदिक फिरौन लॉकुरी कळुदुन, लेकीन इस्त्राएलीगोळ्‍द जनावरगोळ दा टु ऊंद भी ईला सोतीत. तरी भी फिरौन उन मन कठोर आगेत, अदिक आव आ लॉकुरी होग गोटीदील.

छठवा विपत्ती फफोलागोळ अदिक फॉळागोळ्‍द होळोद

8 बाक यहोवा मूसा अदिक हारून से अंदुन, "नीव येढ्‍ढु मुंदुर भट्‍टी दा टु ऊंद ऊंद मुट्‍ठी राखळ हुडु कोमी, अदिक मूसा अदरी फिरौन उन मुंद आकाश दी हार्सबुळ. 9 ✝9:9 प्रकाशितवाक्य 16:2आग अद श्‍याण्‍द गागरा आगकु सप्‍पा मिस्त्र द्‍याश दा मंळसागोळ अदिक जनावर येढ्‍ढु मा फफोलागोळ अदिक फॉळा बनसेदीत." 10 ✝9:10 प्रकाशितवाक्य 16:10इदुरसाटी आंदुर भट्‍टी इन ठॉमा तीम राखळ हुडुकु फिरौन उन मुंद निदुरदुर, अदिक मूसा अदरी आकाश दी हार्स बुट्‍टुन, अदिक अद मंळसागोळ अदिक जनावरगोळ येढ्‍ढु मा फफोला अदिक फॉळा बनसेत. 11 आ फॉळागोळ कारण जादूगरगोळ मूसा अन मुंद निदुरकु ईर सकीदील, यतिकी आ फॉळा ह्‍यांग मिस्त्रीगोळ्द ईरव हांग अच जादूगरगोळ्‍द भी होटीदव. 12 लेकीन यहोवा फिरौन उन मन इक कठोर माळ बुट्‍टुन, अदिक ह्‍यांग यहोवा मूसा से अंदीदुन, आव आऊन केळीदील.

सातवा विपत्ती-गारपीठ इन माळ

13 बाक यहोवा मूसा से अंदुन, "व्‍हातर्‍या का येदकु फिरौन उन मुंद निदुर, अदिक आऊन से अन, ‘इब्रीगोळ परमेश्वर यहोवा ईत्‍ता प्रकार देल अनतान: नान प्रजा अन लॉकुरी होगगोळ कि आंदुर नान आराधना माळुल. 14 ईलारा ई घन *9:14 नीन ह्दय माना नीन मा, अदिक नीन कर्मचारीगोळ अदिक नीन प्रजा मा हर प्रकार इन विपत्‍तीगोळ हाकाईन, यदुर देल नी जान्‍स कोम कि पुरा पृथ्‍वी मा नान तुल्‍य दुसरा याऊ हैलेच. 15 ना रा ईग कय वाळुसकु नीनी अदिक नीन प्रजा अक माहामारी देल कोन्‍नायदीन, अदिक पृथ्‍वी मा टु नीन सत्‍यानाश आगेगाईत; 16 ✝9:16 रोमियों 9:17लेकीन खराखुरा ना नीनी ईदा उद्देश देल जीत्ता ईटीन कि नीनी तान सामर्थ्य तोरसाईन, अदिक तान हेसुर पुरा पृथ्‍वी मा प्रसिद्ध माळाईन. 17 येन नीव ईग भी अहंकारी आईर अदिक नान लॉकुर इक होगगोळालीर? 18 केळ, ना नाळ ईदा समय हींग भंयकर गारपीठ इन माळ बरसुसाईन, यऊर हिसाब देल मिस्त्र अन नीव बिळा दिशी टु रा ईगासताका यागलु बिदीदील. 19 इदुरसाटी ईग लॉकुर इक कळुकु तान सप्पा जनावरगोळी अदिक नीन हात्ती खुला मैदान क्षेत्र दा आव सप्‍पा अक सुरक्षित जागा मा ओतकु ईटकु आगुल; ईला रा यास मंळसा या जनावर मैदान दा असुरक्षित ईत्‍ताव, अवरी मान्‍या जमा माळकु आगतीदील रा, अऊर मा गारपीठ बिद्‍दीत, अदिक अव सोतोदाव.’" 20 इदुरसाटी फिरौन उन कर्मचारीगोळ दा टु जो लॉकुर यहोवा अन वचन इन अंज्‍क मान्‍सतोगोर आंदुर तान तान सेवकगोळ अदिक जनावरगोळी मान्‍या ओत कोंडुर. 21 लेकीन यार यहोवा अन वचन मा मन हचीदील आंदुर तान सेवकगोळ अदिक जनावरगोळी मैदान दा ईर गोट्टुर.

22 आग यहोवा मूसा से अंदुन, "तान कय आकाश दी वाळुस कि सप्पा मिस्त्र द्‍याश इन मंळसागोळ, जनावरगोळ, अदिक केई इन मार्रमठगोळ अदिक सप्‍पा उपज मा गारपीठ बिळुल." 23 ✝9:23 भजन संहिता 78:47; प्रकाशितवाक्य 8:7; 16:21आग मूसा तान कोल इक आकाश दी नेगदुन, अदिक यहोवा अन सामर्थ्‍य देल बिजली कळकुळसोद अदिक गारपीठ बिळली हतदव अदिक बेक्‍की पृथ्‍वी ताका बर कुर्त. ईत्‍ता प्रकार देल यहोवा मिस्त्र द्‍याश मा गारपीठ बरसुसदुन. 24 ✝9:24 प्रकाशितवाक्य 8:7; 16:21जो गारपीठ बिळतोगोद अऊर सांगुळ बेक्‍की भी मिसळुसकु ईरोद, अदिक अव गारपीठगोळ ईट भारी ईरव कि यागी टु मिस्त्र द्याश बसुस्कु ईरोद आगी टु मिस्त्र द्‍याश तिमुर दा हिंग गारपीठ यागलु बिळली ईरव. 25 ✝9:25 भजन संहिता 105:33इदुरसाटी मिस्त्र द्‍याश तिमुर्द केईगोळ दा येन मंळसा, येन जनावर, यास ईरोर सप्‍पा गारपीठ देल सोतोदव, अदिक गारपीठ देल केई इन पुरा उपज बरबाद आगेत, अदिक मैदान इन सप्‍पा मार्रमठ भी मुर्दोदव. 26 सिर्फ गोशेन प्रदेश दा यल इस्त्राएलीगोळ ईरतोगोर गारपीठ बिदीदील.

27 आग फिरौन मूसा अदिक हारून उक बुलावा कळुदुन अदिक आंदुर से अंदुन, "ई घन ना पाप माळीन; यहोवा न्‍यायी आन, अदिक ना अदिक नान प्रजा अन्यायी आद. 28 बिजली कळकुळसोद अदिक गारपीठ बिळोद रा हापाळ आगेत; ईग यहोवा से विनती माळी; आग ना नीम लॉकुरी होगगोळाईन, अदिक नीमी रोक्‍सकु आगतीदील." 29 मूसा आऊन से अंदुन, "नगर दा टु होळ्‍त अच ना यहोवा दी कय फैलुसाईन, आग बादल इन गरजुसोद बंद आगेदीत अदिक गारपीठ भी यागलु बिळतीदील, इदुर देल नी जान्‍स कोंड्‍या कि पृथ्‍वी यहोवा अंद अच हुन. 30 तरी भी ना जान्‍सतीन कि ना रा नी अदिक ना नीन कर्मचारीगोळ यहोवा परमेश्वर उन अंज्‍क मानसालुर." 31 सन अदिक जौ रा गारपीठ देल बरबाद आदव, यतिकी जौ इन लॉम्बागोळ होटबुटीदव अदिक सन दा कली अदिक फुल हतकु ईरव. 32 लेकीन यातोदु गोदी बरबाद आगीदील, यतिकी अव बाद्दा हण्ण आगताव. 33 याग मूसा फिरौन उन हात्ती टु नगर इन व्‍हार्या होटकु यहोवा दी कय फैलुस्कु प्रार्थना माळदुन, आग बादल इन गरजुसोद अदिक गारपीठ इन बिळोद बंद आत, अदिक बाक बाद्‍दा माळ धरती मा बिदीदील. 34 लेकीन ईद नोळकु कि माळ अदिक गारपीठ अदिक बादलगोळ्‍द गरजुसोद बंद आगेत, फिरौन तान कर्मचारीगोळ सांगुळ मात्‍त तान मन इक कठोर माळकु पाप माळदुन. 35 ईत्‍ता प्रकार देल फिरौन उन मन जिद्दी आगतेला ईत्‍त, अदिक आव इस्त्राएलीगोळी होग गोटीदील ह्‍यांग कि यहोवा मूसा अन द्वारा अनसुसीदुन.