निर्गमन 38

होमबली वेदी माळकु आगोद

1 बाक आव बबूल इन हुळ्ली इन होमबली वेदी भी बनुसदुन; अदुर लंबाई अईद कय अदिक चौळाई अईद कय इन ईरोद; ईत्ता प्रकार देल अद चौकोन बनुस्त, अदिक ऊचाई मुर कय इन ईरोद. 2 आव अदुर नाकु क्वाना मा अदुर नाक सींग बनुसदुन, अव अदुर सांगुळ बिना जोळ इन बनुसदव; अदिक आव अदरी पीतळा देल मळुसदुन. 3 अदिक आव वेदी इन सप्पा सामान, मतलब अदुर गळग्यागोळ, पावळागोळ, वाटीगोळ, काटागोळ अदिक करचीगोळी बनुसदुन. अदुर सप्पा सामान आव पीतळा अन बनुसदुन. 4 अदिक वेदी इन साटी अदुर नाकु दीकळोद कंगनी इन ल्यालमा आव पीतळा अन जाली इन ऊंद झंझरी बनुसदुन, अद ल्यालमा टु वेदी इन ऊचाई इन बीच ताका पोहचुस्त. 5 आव पीतळा अन झंझरी इन नाकु क्वाना अन साटी नाक कळागोळ घळुसदुन, जो डण्डागोळ्द खानागोळ क्याल्सा कोळुल. 6 बाक आव डण्डागोळी बबूल इन हुळ्ली इन बनुसदुन अदिक पीतळा देल मळुसदुन. 7 आग आव डण्डागोळी वेदी इन किनारा अन कळागोळ दा वेदी इन नेगोर साटी हाक बुट्टुन, वेदी इक आव तखतगोळ देल पोकर बनुसदुन.

पीतळा अन गंगार बन्सकु आगोद

8 आव गंगार अदिक अदुर्द पाया येढ्ढु पीतळ इन माळदुन, ईद मिलाप इन तम्बु उन द्वार मा स्यावा माळावाळेर आर्तेर्द पीतळ इन आरसा देल माळकु आदव.

निवास-स्थान इन आंगुळ बन्सकु आगोद

9 बाक आव आंगुळ बनुसदुन; अदिक दक्षिण दीकळोद साटी आंगुळ इन पळदागोळ सुक्ष्म सन इन कपळा नव ईरव, अदिक सप्पा मिलुसकु सौ कय ऊद्द ईरव; 10 अऊर साटी ईप्पत खम्बागोळ, अदिक ईऊर्द पीतळा अन ईप्पत कुर्चीगोळ बनुसदव; अदिक खम्बागोळ्द घुंडीगोळ अदिक जोळसोद कळीगोळ बेळ्ली नव बनुसदव. 11 अदिक उत्तर दीकळोद साटी भी सौ कय ऊद्द पळदागोळ बनुसदव; अदिक अऊर साटी ईप्पत खम्बागोळ, अदिक ईऊर्द पीतळा अन ईप्पत अच कुर्चीगोळ बनुसदव, अदिक खम्बा नव घुंडीगोळ अदिक जोळसोद कळी बेळ्ली नव बनुसदव. 12 अदिक पश्चिम दीकळोद साटी सप्पा पळदागोळ मिलुसकु पचास कय इन ईरव; अऊर साटी हत्त खम्बागोळ अदिक हत्त अच अऊर कुर्चीगोळ ईरव, अदिक खम्बागोळ्द घुंडीगोळ अदिक जोळसोद छळीगोळ बेळ्ली नव ईरव. 13 अदिक पूर्व दी भी अव पचास कय इनव ईरव. 14 आंगुळ इन दरवाजा अन ऊंद दिकळोद साटी पंदरा कय इन पळदागोळ बन्सदव, अदिक अऊर साटी मुर खम्बा अदिक मुर कुर्चीगोळ ईरव. 15 अदिक आंगुळ इन दरवाजा अन दुसरा दी भी हांगा बनुसीत; अदिक आंगुळ इन दरवाजा अन ईत्त अदिक आत्त पंदरा पंदरा कय इन पळदा बन्सकु ईरव; अदिक अऊर साटी मुर मुर खम्बा, अदिक मुर मुर कुर्चीगोळ भी ईरव. 16 आंगुळ इन नाकु दी सप्पा पळदा सुक्ष्म सन इन कपळा अन बन्सकु ईरव. 17 अदिक खम्बागोळ्द कुर्चीगोळ पीतळा अन अदिक घुंडीगोळ अदिक छळी बेळ्ली इन बनुसदव, अदिक अऊर क्वाना बेळ्ली देल मळुसकु आदव, अदिक आंगुळ इन सप्पा खम्बा बेळ्ली इन छळी देल जोळ्सकु आगीदव. 18 आंगुळ इन दरवाजा अन पळदागोळ मा बेल बुटा अन क्याल्सा माळकु आगित, अदिक अव नीळा, जांभळा अदिक क्याचांद रंग इन सन इन कपळा अन, अदिक सुक्ष्म सनी इन कपळा अन बन्सकु आगीदव; अदिक अदुर लम्बाई ईप्पत कय इन ईरोद, अदिक अदुर ऊचाई आंगुळ इन कनात इन चौळाई इन घाई अईद कय इन बनुस्त. 19 अदिक अऊर साटी नाक खम्बा अदिक खम्बागोळ्द नाक अच कुर्चीगोळ पीतळा अन बनुसदव, अऊर घुंडीगोळ बेळ्ली नव बनुसदव, अदिक अऊर क्वानागोळ बेळ्ली देल मळुसकु आदव, अदिक अऊर पट्टीगोळ बेळ्ली नव बनुसदव. 20 अदिक निवास अदिक आंगुळ इन नाकु दिकळोद सप्पा खुटागोळ पीतळा अन बन्सकु ईरव.

निवास-स्थान दा प्रयुक्त धातुगोळ्द विवरण

21 गवाही इन‍ चिट्टी इन निवास इन सामान जो लेवीगोळ्द स्यावा कार्य अन साटी बनुस्त, अदिक यदुर गिनती हारून याजक उन पार ईतामार उन द्वारा मूसा अन कहना देल आगित, अदुर विवरण ईद आद. 22 याता याता वस्तु उन माळोद आग्या यहोवा मूसा अक कोटीदुन अदरी यहूदा अन गोत्र वाळा बसलेल, जो हूर उन नातु अदिक ऊरी इन पार ईरोन, माळ बुट्टुन. 23 अदिक आऊन सांगुळ दान इन गोत्र वाळा, अहीसामाक उन पार, ओहोलीआब ईरोन, जो नकाशी माळली अदिक कळुसावाळा अदिक नीळा, जांभळा अदिक क्याचांद रंग इन अदिक सुक्ष्म सन इन कपळा दा कढ़ाई माळावाळा निपुन कारीगर ईरोन.

24 पवित्रस्थान इन सप्पा क्याल्सा दा जो भेंट इन व्हान्ना हत्त अद पवित्रस्थान इन शेकेल इन हिसाब देल उंत्तीस किक्कार अदिक येळ सौ तीस शेकेल ईरोद, मतलब ऊंद हजार येढ्ढ किलो. 25 अदिक मंडली इन आळ्दकु लॉकुर्द भेंट इन बेळ्ली पवित्रस्थान इन शेकेल इन हिसाब देल सौ किक्कार अदिक सतरा सौ पच्यात्तर शेकेल मतलब मुर हजार नाक सौ तीस किलो ईरोद. 26 मतलब यास ईप्पत साल इनोर अदिक अदुर से यक्कुल उमर इनोर आळ्दकु आगीदुर, आंदुर आर लाख मुर हजार अईद सौ पचास मंळसा ईरोर, अदिक ऊंद ऊंद मुंदुर दी टु पवित्रस्थान इन शेकेल इन अनुसार आर्धा शेकेल, जो ऊंद बेका लगभग आर ग्राम सिक्त. 27 अदिक अद सौ किक्कार बेळ्ली पवित्रस्थान अदिक बीच इन पळदा येढ्ढु कुर्चीगोळ्द ढाल्सदुर दा हत्तेत; सौ किक्कार देल सौ कुर्चीगोळ बनुसदव, ऊंद ऊंद कुर्ची ऊंद किक्कार इन बनुस्त. 28 अदिक सतरा सौ पच्यात्तर शेकेल जो ऊळदोत अऊर देल खम्बागोळ्द घुंडीगोळ बन्सकु आत, अदिक खम्बागोळ्द टोकगोळ मळुसकु आदव, अदिक अऊर छळीगोळ भी बन्सकु आदव. 29 अदिक भेंट इन पितळा सत्तर किक्कार अदिक येढ्ढ हजार नाक सौ शेकेल ईरोद; 30 इदुर देल मिलाप इन तम्बु उन दरवाजा अन कुर्चीगोळ, अदिक पितळा अन वेदी, पितळा अन झंझरी, अदिक वेदी इन सप्पा सामान; 31 अदिक आंगुळ इन नाकु दिकळव कुर्चीगोळ, अदिक अदुर दरवाजा अन कुर्चीगोळ, अदिक निवास, अदिक आंगुळ इन नाकु दिकळव खुटागोळ भी बन्सकु आदव.