निर्गमन 32

व्हान्ना अन पाड्डा

1 याग लॉकुर नोळदुर कि मूसा अक पहाळी मा टु ईळुली समय हतेत्याद, आग आंदुर हारून उन हात्ती जमा आगकु अनली हतदुर, "ईग नाम साटी देवता माळ, जो नाम मुंद मुंद नळुल; यतिकी आ मंळसा मूसा अक जो नामी मिस्त्र द्याश दा टु तेगुकु तंदान, नाव जान्सालेव कि येन आग्याद?" 2 हारून आंदुर से अंदुन, "नीम हिंग्सुर अदिक पार पोरगोळ्द किवगोळ दा व्हान्ना अन जो बालीगोळ आव अवरी ईळसी, अदिक नान हात्ती तरी." 3 आग सप्पा लॉकुर आंदुर किवगोळ दा टु व्हान्ना अन झुक्कागोळ ईळ्सदुर, अदिक हारून उन हात्ती तंदुर. 4 हारून झुमकागोळ आंदुर कय देल ताकोंडुन, अदिक अवरी पिघलुसकु ऊंद साचा दा व्हान्ना हाकदुन, अदिक व्हान्ना अन ऊंद पाड्डा बनुसदुन. आग लॉकुर अनली हतदुर, "हे इस्त्राएल, नीन ईश्वर जो नीनी मिस्त्र द्याश दा टु बिळ्सकु तंदान, आव ईवा हुन." 5 ईद नोळकु कि हारून अदुर मुंद ऊंद वेदी माळसुसदुन; अदिक ईद प्रचार माळदुन, "नाळ यहोवा अन साटी हाब्बा ईत्तीत." 6 अदिक दुसरा दिशी लॉकुर हुंजकुका येदकु होमबली येर्सुल, अदिक मेलबली तरूल; बाक कुर्तकु तिंदुर कुळदुर, अदिक येदकु गलत क्याल्सा माळली कुरतुर.

7 आग यहोवा मूसा से अंदुन, "ल्यालमा ईळदोग, यतिकी नीन प्रजा अन लॉकुर, यारी नी मिस्त्र द्याश दा टु तेगुकु तंद्या, आंदुर बिगळुसेग्यार; 8 अदिक याता हादी मा नळोद आग्या ना आंदरी कोटीदीन अदरी राटनेरी बिटकु आंदुर ऊंद पाड्डा घळुसकु माळ बुट्टुर, बाक अदरी दण्डवत माळदुर, अदिक अदुर साटी बलि भी येर्सदुर, अदिक ईद अंदार, ‘हे इस्त्राएलीगोळा, नीम ईश्वर जो नीमी मिस्त्र द्याश दा टु बिळ्सकु तंदान आव ईवा हुन.’" 9 बाक यहोवा मूसा से अंदुन, "ना ई लॉकुरी नोळदीन, अदिक केळ, आंदुर जिद्दी आर. 10 ईग नानी रोक्सबाळ, नान कोप आंदुर मा भळकुसकु येदाद यदुर देल ना आंदरी भस्म माळाईन; लेकीन नीन देल ऊंद धोळ्द वंश पैदा माळाईन."

11 आग मूसा तान परमेश्वर यहोवा अक ईद अंदकु मनुसली हतदुन, "हे यहोवा, नीन कोप तान प्रजा मा येती भळकुसकु येदाद यदुर देल नी धोळ्द सामर्थ्य अदिक बलवन्त कय इन द्वारा मिस्त्र द्याश दा टु तेगुकु तंद्या? 12 मिस्त्री लॉकुर ईद ईला अन पायजे, ‘आव आंदरी बेकार अभिप्राय देल मतलब पहाळगोळ दा घात माळकु धरती मा टु मिटुस बुळोद मनसा देल तेगुकु ओतुन?’ नी तान भळकुस्द कोप इक शांत माळ, अदिक तान प्रजा अक ईत्ता हानि माळबाळ. 13 तान दास अब्राहम, इसहाक, अदिक इस्त्राएल इक याद माळ यार देल नी तांदा किर्‍या तिनकु ईद अंदीद, ‘ना नीम वंश इक आकाश इन तारागोळ्द तुल्य हापाळ बनुसाईन, अदिक ईद पुरा द्याश यार्द ना चर्चा माळीन नीम वंश इक कोळाईन कि आंदुर अदुर अधिकारी हमेशा बन्सकु ईरूल.’" 14 आग यहोवा तान प्रजा अन हानि माळदुर देल जो आव अंदीदुन पछतासदुन.

15 आग मूसा तिर्गकु गवाही इन येढ्ढु पाटीगोळी कय दा हुडुकु पहाळी मा टु ईळ्दोदुन. आ पाटीगोळ्द येढ्ढु बाजु दी लिख्सकु ईरोद, 16 अदिक आ पाटीगोळ परमेश्वर उन बनुस्द ईरव, अदिक अऊर मा जो नळ्सकु लिख्सकु ईरोद अद परमेश्वर उन लिख्सद ईरोद.

17 याग यहोशू अक लॉकुर्द कलकल इन शब्द केळ बत्त, आग आव मूसा से अंदुन, "छावनी दा टु लळाई इन घाई शब्द केळ बरेत्याद." 18 आव अंदुन, "ईद जो शब्द आद अद ना रा जीतुसावाळेर्द हुन, अदिक ना हारूसावाळेर्द हुन; नानी रा हाळ इन शब्द केळ बरेत्याद." 19 छावनी इन हात्ती बरतेला अच मूसा अक आ पाड्डा अदिक कुणोद कांळ्सकु बिळ्त, आग मूसा अन कोप भळकुसकु येळ्त, अदिक आव पाटीगोळी तान कय देल पहाळी इन ल्‍यालमा आपटुसकु मुर्द बुट्टुन. 20 आग आव आंदुर्द माळ्द पाड्डा अक हुडुकु बेक्‍की दा हाक्कु होताक बुट्टुन. अदिक आरूकु चकनाचुर माळदुन, अदिक नीर इन म्याकुच भिट्ट बुट्टुन, अदिक इस्त्राएलीगोळी अदरी कुळसुस बुट्टुन.

21 आग मूसा हारून से अनली हतदुन, "ई लॉकुर नीन सांगुळ येन माळदुर कि नी ईंदरी ईसतोळीद धोळ्द पाप दा फसुस्द?" 22 हारून उत्तर कोट्टुन, "नान स्वामी इन कोप भळकुस बाळुल; नी रा ई लॉकुरी जान्सत्या अच कि ईंदुर बुराई दा मन हचकु ईरतार. 23 अदिक आंदुर नान से अंदुर, ‘नाम साटी देवता माळ जो नाम मुंद मुंद नळुल; यतिकी आ मंळसा मूसा अक, जो नामी मिस्त्र द्याश दा टु बिळ्सकु तंदान, नाव अरालेव कि येन आत?’ 24 आग ना आंदुर से अंदीन, यार यार हात्ती व्हान्ना बेळ्ली आव, आंदुर अवरी ईळ्सकु तरूल; अदिक याग आंदुर नानी अवरी कोट्टुर, ना अवरी बेक्‍की दा हाक्क बुट्टीन, आग ईद पाड्डा होटकु बत्त."

25 हारून आ लॉकुरी हिंग खुला माळ बुटीदुन कि आंदुर तान विरोधीगोळ्द बीच दा उपास इन योग्य आगेदुर. 26 आंदरी खुला नोळकु मूसा छावनी इन निकास मा निदुरकु अंदुन, "जो यावारा यहोवा अन दीकळव आन आव नान हात्ती बरूल;" आग सप्पा लेवीगोळ आऊन हात्ती जमा आदुर. 27 आव आंदुर से अंदुन, "इस्त्राएल इन परमेश्वर यहोवा ईद अनतान कि तान तान नेळु मा तलवार हीलगुसकु छावनी इन ऊंद निकास टु दुसरा निकास ताका तिर्ग तिर्गकु तान तान वार्टुर, संगीगोळ, अदिक मान्ना अन हात्तीवाळेर्द घात माळी." 28 मूसा अन ई वचन इन अनुसार लेवीगोळ माळदुर; अदिक आ दिशी मुर हजार इन हात्ती पास लॉकुर कोन्सुसकु आदुर. 29 बाक मूसा अंदुन, "ईंद इन दिशी यहोवा अन साटी तान याजक पद इन संस्कार माळी, उलटा तान तान पारगोळ अदिक वार्टुर्द भी विरूद्‍ध आगकु हिंग माळी यदुर देल आव ईंद नीमी आशीष कोळुल."

30 दुसरा दिशी मूसा लॉकुर से अंदुन, "नीव हापाळ अच पाप माळीर. ईग ना यहोवा अन हात्ती येरेगाईन; सम्भव आद कि ना नीम पाप इन प्रायश्चित माळ सकाईन." 31 आग मूसा यहोवा अन हात्ती होगकु अनली हतदुन, "हाय हाय, आ लॉकुर व्हान्ना अन देवता माळसुसकु हापाळ अच पाप माळ्यार. 32 तरी भी ईग नी आंदुर पाप क्षमा माळ ईलारा तान लिख्सद किताब दा टु नान हेसुर कळ्द बुळ." 33 यहोवा मूसा से अंदुन, "याव नान खिलाप पाप माळ्यान आऊंदा हेसुर ना तान किताब दा टु कळ्द बुळाईन. 34 ईग नी होगकु आ लॉकुरी आ जागा दा ओय यदुर्द चर्चा ना नीन से माळीदिन; नोळ, नान स्वर्गदूत नीन मुंद मुंद नळदान. लेकीन याता दिशी ना दण्ड कोळली हताईन आ दिशी आंदरी ई पाप इन भी दण्ड कोळाईन."

35 इदुरसाटी यहोवा आ लॉकुर मा विपत्ति हाकदुन, यतिकी हारून उन बनुस्द पाड्डा अक आंदुरा माळसुसीदुर.