निर्गमन 27

होमबलि इन वेदी

1 "बाक वेदी इक बबूल इन हुळ्ली इन, अईद कय ऊद्द अदिक अईद कय चौळा माळसुसेत; वेदी चौकोन ईरूल, अदिक अदुर्द ऊचाई मुर कय इन ईरूल. 2 अदिक अदुर्द नाकु क्वाना मा नाक सींग माळसुसेत; अव अदुर समेत ऊंदा तुकळा नव ईरूल, अदिक अदरी पीतळा देल मळसुसेत. 3 अदिक अदुर राखळ नेगोद पात्र, अदिक पावळागोळ, अदिक कटोरागोळ, अदिक काटागोळ, अदिक अंगीठीगोळ माळसुसेत; अदुर सप्पा सामान पीतळा अन माळसुसेत. 4 अदुर साटी पीतळा अन जाली इन ऊंद पेटी माळसुसेत; अदिक अदुर नाकु क्वाना दा पीतळा अन नाक कळागोळ हचुसेत. 5 अदिक आ पेटी इक वेदी इन नाकु दिकळोद कंगनी इन ल्यालमा हिंग हचुसेत कि अद वेदी इन ऊचाई इन मध्य ताका पोहचुसुल. 6 अदिक वेदी इन साटी बबूल इन हुळ्ली इन कोलगोळ माळसुसेत, अदिक अवरी पीतळ देल मळसुसेत. 7 अदिक कोलगोळ कळागोळ दा हाक्‍कु आगुल कि याग याग वेदी नेगुकु आगुल आग अव अदुर येढ्ढु किनारा मा ईरूल. 8 वेदी इक तखतगोळ से पोकर माळसुसेत; ह्यांग अव ई पहाळ मा नीनी तोर्सकु आग्याद हांगा माळकु आगुल."

निवासस्थान इन आंगुळ

9 "बाक निवास इन आंगुळ इक माळसुसेत. अदुर दक्षिण इन दिकळोद साटी महीन मलमल सूक्ष्म सनी इन कपळा अन पळदागोळ ईरूल, अदुर लंबाई सौ कय इन ईरूल; ऊंद किनारा मा ईटा ईरूल. 10 अदिक अऊर साटी ईप्पत खम्भागोळ बनसुल, अदिक ईऊर साटी पीतळा अन ईप्पत कुर्चीगोळ बनसुल, अदिक खम्बागोळ्द कुन्डागोळ अदिक अऊर्द पट्टीगोळ बेळ्ली नव ईरूल. 11 अदिक अदा प्रकार देल आंगुळ इन उत्तर दिकळोद लंबाई दा भी सौ कय ऊद्द पळदागोळ ईरूल, अदिक अऊर साटी भी ईप्पत खम्भागोळ अदिक ईऊर साटी भी पीतळा अन ईप्पत खानागोळ ईरूल; अदिक आ खम्बागोळ्द कुन्डागोळ अदिक पट्टीगोळ बेळ्ली नव ईरूल. 12 बाक आंगुळ इन चौळाई दा पश्चिम दी पचास कय इन पळदागोळ ईरूल, अऊर साटी खम्भागोळ हत्त अदिक खानागोळ भी हत्त ईरूल. 13 पूर्व दी आंगुळ इन चौळाई पचास कय इन ईरूल. 14 आंगुळ इन दरवाजा अन ऊंद दी पंदरा कय इन पळदागोळ ईरूल, अदिक अऊर साटी खम्भागोळ मुर अदिक खानागोळ मुर ईरूल; 15 अदिक दुसरा दी भी पंदरा कय इन पळदागोळ ईरूल, अऊर साटी भी खम्भागोळ मुर अदिक खानागोळ मुर ईरूल. 16 आंगुळ इन दरवाजा अन साटी ऊंद पळदा माळसुसेत, जो नीळा, जांभळा अदिक क्याचांद रंग इन कपळा अदिक महीन मलमल सूक्ष्म सनी इन कपळा अन कामदार बन्सकु ईप्पत कय इन ईरूल, अदुर साटी खम्भागोळ नाक अदिक खानागोळ भी नाक ईरूल. 17 आंगुळ इन नाकु दिकळव सप्पा खम्भागोळ बेळ्ली इन पट्टीगोळ देल जुळ्सकु ईरूल, अऊर कुन्डागोळ बेळ्ली नव अदिक खानागोळ पीतळा नव ईरूल. 18 आंगुळ इन लंबाई सौ कय इन, अदिक अदुर चौळाई पचास कय इन, अदिक अदुर पळदा अन ऊचाई अईद कय इन ईरूल, अदिक अद महीन मलमल सूक्ष्म सनी इन कपळा अन बनसुल, अदिक खम्बागोळ्द खानागोळ पीतळा नव ईरूल. 19 निवासस्थान इन अलग अलग प्रकार इन बर्तन अदिक सप्पा सामान अदिक अदुर सप्पा खुटागोळ अदिक आंगुळ इनव भी सप्पा खुटागोळ पीतळा नव अच ईरूल."

दिंग्या अन देख-रेख

20 बाक नी इस्त्राएलीगोळी आग्या कोळेत, कि नान हात्ती दीवट इन साटी कुट्सकु तेग्द जैतून इन निर्मल याण्णा तरेतीर, यदुर देल दिंग्या हमेशा होततेला ईरूल. 21 मिलाप इन तम्बु दा, आ न्याड्यावाळा पळदा देल व्हार्या जो गवाही इन चिट्टी इन मुंद आदीत, हारून अदिक आऊन पारगोळ दीवट द्यावमुळका टु व्हातुर ताका यहोवा अन मुंद सजुसकु ईटुल. ईद विधि इस्त्राएलीगोळ्द पीढ़ीगोळ साटी हमेशा बन्सकु ईत्तीत.