1 ✝ 19:1 गिनती 33:15 इस्त्राएलीगोळी मिस्त्र द्याश दा टु होटकु याता दिशी मुर तिंगुळ आदव, आ दिशी आंदुर सीनै अन आळी दा बंदुर. 2 अदिक याग आंदुर रपीदीम टु कूच माळकु सीनै अन आळी दा बंदुर, आग आंदुर आळी दा ड्यारागोळ मंळ्सदुर; अदिक अल्या पहाळ इन मुंद इस्त्राएलीगोळ छावनी हाकदुर. 3 आग मूसा पहाळी मा परमेश्वर उन हात्ती येरेदुन, अदिक यहोवा पहाळी मा आऊक कारूकु अंदुन, "याकूब उन घराना से हिंग अन, अदिक इस्त्राएलीगोळी नान ईद वचन केळ्स: 4 ‘नीव नोळीर कि ना मिस्त्रीगोळ से येन येन माळीन; नीमी मान्सी गिधाळ✝19:4 यशायाह 63:9 पक्षी इन पंखगोळ मा येर्सकु तान हात्ती तंदीन. 5 ✝19:5 व्यवस्थाविवरण 10:14; 26:18; तीतुस 2:14इदुरसाटी ईग अगर नीव निश्चय नान नियम इक मान्सीर, अदिक नान वाचा अन पालन माळीर, रा सप्पा लॉकुर दा टु नीवा नान निज धन ठहरुसीर; समस्त पृथ्वी रा नांद अच हुन. 6 ✝19:6 १ पतरस 2:9; प्रकाशितवाक्य 1:6; 5:10अदिक नीव नान नजर दा याजकगोळ्द राज्य अदिक पवित्र राष्ट्र ठहरूसीर.’ जो मातगोळ नीनी इस्त्राएलीगोळ से अनव आव अव ईवा हुव."

7 आग मूसा बंदकु पुरनिए लॉकुर्द स्‍याणागोळी कार्सुसदुन, अदिक ई सप्पा मातगोळ, यऊर्द माताळोद आग्या यहोवा आऊक कोटीदुन, आंदरी समझुस बुट्टुन. 8 ✝19:8 यहोशू 19:14अदिक सप्पा लॉकुर मिलुसकु माताळ कुरतुर, "जो येनारा यहोवा अंदान अद सप्पा नाव जरूर माळेव." लॉकुर ई मातगोळ मूसा यहोवा अक केळ्सदुन. 9 आग यहोवा मूसा से अंदुन, "केळ, ना बादल इन अंधार दा आगकु नीन हात्ती बरतीन, इदुरसाटी कि याग ना नीन से मातगोळ हेळाईन आग आ लॉकुर केळुल, अदिक हमेशा नीन मा विश्वास माळुल." अदिक मूसा यहोवा से लॉकुर्द मातगोळ्द वर्णन माळदुन. 10 आग यहोवा मूसा से अंदुन, "लॉकुर हात्ती होग अदिक आंदरी ईंद अदिक नाळ पवित्र माळेत, अदिक आंदुर तान फळक्या वग्द कोमुल, 11 अदिक आंदुर तिसरा दिन ताका तयार आगेगुल; यतिकी तिसरा दिशी यहोवा सप्पा लॉकुर्द नोळ्त सीनै पहाळ मा ईळुकु बंदान. 12 ✝19:12 इब्रानिगोळ 12:20अदिक नी लॉकुर साटी नाकु दी वाळा कटकु कोळेत, अदिक आंदुर से अनेत: ‘नीव सचेत ईरेतीर कि पहाळी मा येरतीदील अदिक अदुर सीमा अक भी मुटतीदील; अदिक जो यावारा पहाळी इक मुट्यान आव जरूर कोंदकु आदान. 13 अदरी याऊ कय देल मुटबाळुल; जो मुट्यान आऊन मा कल्लगोळ भिटकु आगुल, या आऊक तीर देल कोंदकु आगुल; चाहे जनावर चाहे मंळसा, आव ऊळ्दकु ईरबाळुल.’ याग म्याळा अन्द मार्र इन नरसिंगा वाळा शब्द देर ताका केळ बरूल, आग लॉकुर पहाळ मा येर्‍यार."

14 आग मूसा पहाळ मा टु ईळुकु लॉकुर हात्ती बंदकु आंदरी पवित्र माळसुसदुन; अदिक आंदुर तान फळक्या वग्द बुट्टुर. 15 अदिक मूसा लॉकुर से अंदुन, "तिसरा दिशी ताका तयार आगेगी; आर्तेर हात्ती होगबाळेतीर."

16 याग तिसरा दिन बत्त आग व्हातुर आगतेला अच बादल गरजुसली अदिक बिजली चमकुसली हत्त, अदिक पहाळी मा करीद बादल छाऊसेत, बाक नरसिंगा अन धोळ्द भारी शब्द आत, अदिक छावनी दा यास लॉकुर ईरोर सप्पा नळ्गली हतदुर. 17 ✝19:17 व्यवस्थाविवरण 4:10आग मूसा लॉकुरी परमेश्वर उन से भेंट माळोर साटी छावनी दा टु तेगुकु तंदुन; अदिक आंदुर पहाळ इन ल्यालमा निदुरदुर. 18 ✝19:18 भजन संहिता 68:8अदिक यहोवा जो बेक्‍की दा टु आगकु सीनै पहाळ मा ईळदीदुन, ई कारण देल पुरा पहाळ धूंगा देल तुम्मेत, अदिक अदुर्द धुंगा भट्टी इन घाई होळोद, अदिक पुरा पहाळ हापाळ नळगोद. 19 बाक याग नरसिंगा अन शब्द तीव्रता देल वाळुस्त अदिक हापाळ भारी आगतेला होत, आग मूसा माताळदुन, अदिक परमेश्वर वाणी केळ्सकु आऊक उत्तर कोट्टुन. 20 अदिक यहोवा सीनै पहाळ इन चोटी टु ल्‍यालमा ईळदुन; अदिक मूसा अक पहाळ इन चोटी मा कारदुन, अदिक मूसा म्याकुच येरेदुन. 21 आग यहोवा मूसा से अंदुन, "ल्यालमा ईळुकु लॉकुरी चेतावनी कोळ, ईलारा हिंग आगबाळुल कि आंदुर वाळा मुर्दकु यहोवा अन हात्ती नोळली होकुल, अदिक आंदुर दा टु हापाळ सा नष्ट आगेगुल. 22 अदिक याजक जो यहोवा अन हात्ती बरतोगतार आंदुर भी तान इक पवित्र माळुल, ईलारा हिंग आगबाळुल कि यहोवा आंदरी दंड कोळुल." 23 मूसा यहोवा से अंदुन, "आ लॉकुर सीनै पहाळ मा येर सकालुर; नी रा खुद नामी ईद अंदकु चेतावनी कोट कि पहाळ इन नाकु दी वाळा कटकु अदरी पवित्र ईटी." 24 यहोवा आऊक उत्तर कोट्टुन, "ईळ्द रा होग, अदिक हारून समेत नी म्याकुच बर; लेकीन याजक अदिक साधारण लॉकुर यहोवा अन हात्ती वाळा मुर्दकु येर्त बरबाळुल, हिंग आगबाळुल कि यहोवा आंदरी दंड कोळुल." 25 इदुरसाटी ई मातगोळ मूसा लॉकुर हात्ती ईळ्दकु आंदरी केळ्सदुन.