1 "आंदरी पवित्र माळली जो क्याल्सा नानी आंदुर सांगुळ माळोद आद कि आंदुर नान साटी याजक इन क्याल्सा माळुल, अद ईद हुन: ऊंद निर्दोष पाड्डा अदिक येढ्ढ निर्दोष म्यांडागोळ हुडेत, 2 अदिक अखमीरी रोट्टी, अदिक याण्णा देल मुळकुळ्सद मैदा नव अखमीरी फुलकागोळ, अदिक याण्णा देल चुपळुस्द अखमीरी पापळगोळ भी हुडेत. ईव सप्पा गोदी नव मैदा नव माळसुसेत. 3 ईवरी ऊंद फुट्टी दा ईटकु आ फुट्टी इक आ पाड्डा अदिक आ येढ्ढु म्यांडागोळ समेत हात्ती तरेत. 4 बाक हारून अदिक आऊन पारगोळी मिलाप इन तम्बु उन दरवाजा अन हात्ती तंदकु नीर देल मय तोळसुसेत. 5 आग आ फळक्यागोळी हुडुकु हारून उक अंगरखा अदिक एपोद इन बागा हाकसुसेत,अदिक एपोद अदिक चपरास कटेत, अदिक एपोद इन घळुस्द पट्टा भी कटेत; 6 अदिक आऊन ताल्ला मा पगळी इक ईटेत, अदिक पगळी मा पवित्र मुकुट इक ईटेत. 7 आग शुद्ध याण्णा हुडुकु आऊन ताल्ला मा हाक्कु आऊक निवळुसेतीर. 8 बाक आऊन पारगोळी हात्ती तनकु आंदरी अंगरखा हाकसुसेत, 9 अदिक आंदुर मतलब हारून अदिक आऊन पारगोळ्द नेळु कटेत अदिक आंदुर ताल्ला मा टोपीगोळ ईटेत; यदुर देल याजक इन पद मा हमेशा आंदुर हक्क ईरूल. ई प्रकार हारून अदिक आऊन पारगोळ्द संस्कार माळेत."

10 "आग पाड्डा अक मिलाप इन तम्बु उन मुंद तरेत. हारून अदिक आऊन पारगोळ पाड्डा अन ताल्ला मा तान तान कय ईटुल, 11 आग आ पाड्डा अक यहोवा अन हात्ती मिलाप इन तम्बु उन दरवाजा मा बलि येर्सेत, 12 अदिक पाड्डा अन रक्ता दा टु थ्वाळासा ताकोमकु तान बेळ्ल देल वेदी इन सींगगोळ मा हचेत, अदिक मिग्द सप्पा रक्ता अक वेदी इन पाया मा रीचुस बुळेत, 13 अदिक याता चरबी देल अतळीगोळ होचकु ईरताव, अदिक जो झिल्ली ईरग्या अन म्याकुच ईरतद, अवरी अदिक येढ्ढु गुर्दागोळी अऊर म्याकळोद चरबी समेत हुडुकु सप्पा अक वेदी मा होताकेत. 14 लेकीन पाड्डा अन मास, अदिक तोगुल, अदिक शेंगणी, छपर्या दा टु व्हार्या बेक्‍की दा होताक बुळेत; यतिकी ईद पापबली ईत्तीत."

15 "बाक ऊंद म्यांडा हुडेत, अदिक हारून अदिक आऊन पारगोळ अदुर्द ताल्ला मा तान तान कय ईटुल, 16 आग आ म्यांडा अक बलि येर्सेत, अदिक अदुर्द रक्ता हुडुकु वेदी मा नाकु दी सिप्सेत. 17 आग आ म्यांडा अक तुकळा तुकळा दा कडेत, अदिक अदुर्द पासळीगोळ अदिक कालगोळी तोळुकु अदुर्द तुकळा अदिक ताल्ला अन म्याकुच ईटेत, 18 अदिक आ पुरा म्यांडा अक वेदी मा होताकेत; अद रा यहोवा अन साटी होमबली आदीत; अद सुखदायक सुगन्ध अदिक यहोवा अन साटी हवन आदीत."

19 बाक दुसरा म्यांडा अक हुडेत; अदिक हारून अदिक आऊन पारगोळ अदुर्द ताल्ला मा तान तान कय ईटुल, 20 आग आ म्यांडा अक बलि येर्सेत, अदिक अदुर्द रक्ता दा टु थ्वाळासा हुडुकु हारून अदिक आऊन पारगोळ्द ऊजवा कीव इन म्याकुच, अदिक आंदुर्द ऊजवा कय अदिक ऊजवा काल इन धोळ्द बेळ्ल मा हचेत, अदिक रक्ता अक वेदी मा नाकु दी सिप्स बुळेत. 21 बाक वेदी माकळोद रक्ता अदिक अभिषेक इन याण्णा, ई येढ्ढु दा टु थ्वाळा थ्वाळा हुडुकु हारून अदिक आऊन पारगोळ, अदिक आंदुर्द कपळागोळ मा भी सिप्स बुळेत; आग आव अदिक आऊन पारगोळ भी, तान तान कपळागोळ समेत पवित्र आगेदार. 22 आग म्यांडा अक संस्कार इन जान्सकु अदुर दा टु चरबी अदिक मोटा पुछी इक, अदिक याता चरबी देल पासळीगोळ होचकु ईरताव अदरी, अदिक कलेजा माकळोद झिल्ली इक, अदिक चरबी समेत येढ्ढु गुर्दागोळी, अदिक ऊजवा जांघ इक हुडेत, 23 अदिक अखमीरी रोट्टी इन फुट्टी जो यहोवा अन मुंद ईटकु ईत्तीत अदुर दा टु भी ऊंद रोट्टी, अदिक याण्णा देल मुच्द मैदा अन ऊंद फुलका, अदिक ऊंद पापळ हुडुकु, 24 ई सप्पा अक हारून अदिक आऊन पारगोळ्द कयगोळ दा ईटकु आलगाळ्सकु आगोद भेंट ठहरूसकु यहोवा अन मुंद आलगाळ्सकु आगुल. 25 आग आ वस्तुगोळी आंदुर कयगोळ दा टु हुडुकु होमबली इन वेदी मा होताक बुळेत, यदुर देल अद यहोवा अन मुंद सुखदायक सुगन्ध ठहरूसुल; अद यहोवा अन साटी हवन आदीत.

26 बाक हारून इन संस्कार इन जो म्यांडा ईत्तीत अदुर्द याद्दा अक हुडुकु आलगाळ्सकु आगोद भेंट इन साटी यहोवा अन मुंद आलगाळ्सेत; अदिक अद नीन भाग ठहरूसीत. 27 अदिक हारून अदिक आऊन पारगोळ्द संस्कार इन जो म्यांडा ईत्तीत, अदुर दा टु आलगाळ्सकु आगोद भेंट इन याद्दा जो आलगाळ्सकु आदीत, अदिक नेगुकु आगोद भेंट इन जांघ जो नेगुकु आदीत, ई येढ्ढु उक पवित्र ठहरूसेत. 28 अदिक ईद हमेशा अन विधि इन रिति मा इस्त्राएलीगोळ्द दी टु आऊन अदिक आऊन पारगोळ्द भाग ठहरूसुल यतिकी ईव नेगुकु आगोद भेटगोळ ठहरूस्याव; अदिक ईद इस्त्राएलीगोळ्द दी टु आंदुर्द मेलबलीगोळ दा टु यहोवा अन साटी नेगुकु आगोद भेंट ईत्तीत.

29 "हारून नव जो पवित्र कपळा ईत्ताव अव आऊन बाद्दा आऊन पारगोळ नातुगोळी सिकतेला ईरूल, यदुर देल अवरी का हाकतेला आंदुर अभिषेक अदिक संस्कार माळकु आगुल. 30 आऊन पारगोळ दा टु जो आऊन जागा मा याजक आदान, आव याग पवित्रस्थान दा स्यावा टहल माळली मिलाप इन तम्बु दा पयले बरूल, आग आ कपळागोळी येळ दिन ताका हाक्कु ईरूल."

31 "बाक याजक इन संस्कार इन जो म्यांडा ईत्तीत अदरी हुडुकु अदुर मास यातारा पवित्रस्थान दा बेईसेतीर; 32 आग हारून तान पारगोळ समेत आ म्यांडा अन मास अदिक फुट्टी इन रोट्टी, येढ्ढु उक मिलाप इन तम्बु उन दरवाजा मा तिनुल. 33 याता पदार्थ देल आंदुर संस्कार अदिक आंदरी पवित्र माळोर‍ साटी प्रायश्चित माळकु आदीत अवरी रा आंदुर तिनुल, लेकीन पराया कुल इन यावारा अवरी तिनबाळुल, यतिकी अव पवित्र ईत्ताव. 34 अगर संस्कार इन मास या रोट्टी दा टु थ्‍वाळासा व्हातुर ताका मिक्‍कु ईरूल, रा आ मिग्द मास या रोट्टी इक बेक्‍की दा होताकेतीर, अद तिनकु आगबाळुल; यतिकी अद पवित्र ईत्तीत."

35 "ना नीनी जो जो आग्या कोटीन; आ सप्पा अन अनुसार नी हारून अदिक आऊन पारगोळ से माळेत; अदिक येळ दिन ताका आंदुर संस्कार माळतेला ईरेत, 36 मतलब पापबली इन ऊंद पाड्डा प्रायश्चित इन साटी हर रोज येर्सेत. वेदी इक भी प्रायश्चित माळा घनी शुद्ध माळेत, अदिक अदरी पवित्र माळोर साटी आंदुर अभिषेक माळेत. 37 येळ दिन ताका वेदी इन साटी प्रायश्चित माळकु अदरी पवित्र माळेत, अदिक वेदी परमपवित्र ठहरूसीत; अदिक जो येनारा अदुर से मुटकु आदीत अद भी पवित्र आगेदीत."

38 "जो वेदी मा हमेशा येर्सव बिद्दाव अव ईव हुव: हर रोज ऊंद ऊंद साल इनव येढ्ढ भेड़ इन पाड्डागोळ. 39 ऊंद भेड़ इन पाड्डा अक रा हुंजकुका, अदिक दुसरा भेड़ इन पाड्डा अक द्यावमुळका होती येर्सेत; 40 अदिक पयला भेड़ इन पाड्डा अन सांगुळ हीन इन चौथाई कुटकागोळ होळ्द याण्णा देल मुच्द एपा अन दसवा भाग मैदा, अदिक अर्घ इन साटी हीन इन चौथाई अंगुर इन रास्सा कोळेत. 41 अदिक दुसरा भेड़ इन पाड्डा अक द्यावमुळका अन होती येर्सेत, अदिक अदुर सांगुळ हुंजकुका अन रिति इन अनुसार अन्नबलि अदिक अर्घ येढ्ढु कोळेत, यदुर देल अद सुखदायक सुगन्ध अदिक यहोवा अन साटी हवन ठहरूसुल. 42 नीम पीढ़ो अन पीढ़ी दा यहोवा अन मुंद मिलाप इन तम्बु उन दरवाजा मा नित्य हिंगा होमबली आग्त ईरूल; ईद अद जागा हुन यदुर दा ना नीम लॉकुर से इदुरसाटी सिकतोगाईन कि नीन से मातगोळ माळाईन. 43 ना इस्त्राएलीगोळ से अल्या सिकतोगाईन अदिक अद तम्बु नान तेज देल पवित्र माळकु आदीत; 44 अदिक ना मिलाप इन तम्बु अदिक वेदी इक पवित्र माळाईन, अदिक हारून अदिक आऊन पारगोळी भी पवित्र माळाईन कि आंदुर नान साटी याजक उन क्याल्सा माळुल. 45 अदिक ना इस्त्राएलीगोळ न्याड्या निवास माळाईन, अदिक आंदुर परमेश्वर ठहरूसाईन." 46 आग आंदुर अर्त कोंडार कि ना यहोवा आंदुर परमेश्वर हुईन, जो आंदरी मिस्त्र द्याश दा टु तेगुकु तंदीन कि आंदुर न्याड्या निवास माळाईन; ना अच आंदुर परमेश्वर यहोवा हुईन.