1 मूसा तान मॉव यित्रो हेसुर इनव मिद्यान उन याजक उन म्यांडा अदिक मर्रगोळी आळ्‍सतोगोन; अदिक आव अवरी आळी इन पश्चिम दी होरेब हेसुर इन परमेश्वर उन पर्वत इन हात्‍ती ओतुन. 2 अदिक परमेश्वर उन दूत ऊंद मुळ्‍ल इन झाळी इन न्‍याड्या बेक्‍की इन ज्‍वाला दा आऊक दर्शन कोट्‍टुन; अदिक आव कण्‍ण म्‍याकुच माळकु नोळदुन कि झाळी होतेत्‍याद, लेकीन भस्‍म आगाल. 3 आग मूसा बिचार माळदुन, "ना आत होगकु ई धोळ्‍द आश्चर्य अक नोळाईन कि अद झाळी येती होत कोमाल." 4 याग यहोवा नोळदुन कि मूसा नोळोर साटी तिर्गकु बरेत्‍यान, आग परमेश्वर आऊक झाळी इन बीच दा टु कारदुन, "हे मूसा, हे मूसा!" मूसा अंदुन, "येन आग्‍या." 5 आव अंदुन, "ईत हात्ती बरबाळ; अदिक तान कालगोळ दा टु जुतागोळ ईळ्‍सबुळ, यतिकी याता जागा मा नी निदुरकु आय अद पवित्र जागा हुन." 6 बाक आव अंदुन, "ना नीन आप्‍प उन परमेश्वर, अदिक अब्राहम उन परमेश्वर, इसहाक उन परमेश्वर, अदिक याकूब उन परमेश्वर हुईन." आग मूसा अन्द जो परमेश्वर उन दी नोळोद हिम्मत ईला ईरोद, तान मार्रा होच बुट्‍टुन.

7 बाक यहोवा अंदुन, "ना तान प्रजा अन लॉकुर जो मिस्त्र दा आर, आंदुर दुखगोळी निश्‍चय नोळीन; अदिक आंदुर जो किटरोद मयनत माळसुसावाळेर कारण आगतद अदरी भी ना केळीन, अदिक आंदुर तकलीफ मा ना चित्त हचीन; 8 इदुरसाटी ईग ना ईळुकु बंदीन कि आंदरी मिस्त्रीगोळ कय दा टु बिळसुसाईन, अदिक आ द्‍याश दा टु तेगुकु मात्‍त ऊंद वळ्‍लीद धोळ्‍द द्‍याश दा, यदुर दा हाल अदिक शयद इन धारागोळ वाहुसताव मतलब कनानी, हित्ती, एमोरी, परिज्जी, हिब्बी, अदिक यबूसी लॉकुर जागा दा पोहचुसाईन. 9 इदुरसाटी ईग केळ, इस्त्राएलीगोळ्‍द किटरोद नानी केळ सिक्‍याद, अदिक मिस्त्रीगोळ्द आंदुर मा अत्याचार माळोद भी नानी कांळस्‍याद. 10 इदुरसाटी बर, ना नीनी फिरौन उन हात्‍ती कळुतीन कि नी नान इस्त्राएली प्रजा अक मिस्त्र दा टु तेगुकु तंद्या." 11 लेकीन मूसा परमेश्वर से अंदुन, "ना याव हुईन जो फिरौन उन हात्‍ती होगाईन, अदिक इस्त्राएलीगोळी मिस्त्र दा टु तेगुकु तराईन?" 12 परमेश्वर अंदुन, "निश्‍चय ना नीन सांगुळ ईराईन; अदिक ई मात इन कि नीन कळावाळा ना हुईन, नीन साटी ईद चिन्ह ईत्‍तीत कि याग नी आ लॉकुरी मिस्त्र दा टु तेगु कोंड्‍या, आग नी ईदा पहाळी मा नान उपासना माळ्‍या."

13 ✝ 3:13 निर्गमन 6:2,3 मूसा परमेश्वर से अंदुन, "याग ना इस्त्राएलीगोळ हात्‍ती होगकु आंदुर से अनाईन, ‘नीम पुर्वजगोळ परमेश्वर नानी नीम हात्‍ती कळ्‍यान,’ आग अगर आंदुर नान से केळुल, ‘आऊन येन हेसुर आद?’ आग ना आंदरी येन हेळाईन?" 14 ✝3:14 प्रकाशितवाक्य 1:4,8परमेश्वर मूसा से अंदुन, "ना जो आईन अद आईन." बाक आव अंदुन, "नी इस्त्राएलीगोळ से अनेत, ‘यार्द हेसुर ना*3:14 ना यहोवा हुईन हुईन अदिक आवा नानी नीम हात्‍ती कळ्‍यान.’" 15 अदिक परमेश्वर मूसा से ईद भी अंदुन, "नी इस्त्राएलीगोळ से ईद भी अनेत, ‘नीम पुर्वजगोळ परमेश्वर, अदिक अब्राहम उन परमेश्वर, इसहाक उन परमेश्वर, अदिक याकूब उन परमेश्वर, यहोवा, आवा नानी नीम हात्‍ती कळ्‍यान. नोळ, हमेशा ताका नान हेसुर ईदा ईत्‍तीत, अदिक पीढ़ोन पीढ़ी दा नान याद ईदुर देल अच आगतेला ईत्‍तीत.’ 16 इदुरसाटी ईग होगकु इस्त्राएली हाळाबाट्टुर इक जमा माळ, अदिक आंदुर से अन, ‘नीम आप्‍प अब्राहम, इसहाक, अदिक याकूब उन परमेश्वर, यहोवा नानी दर्शन कोटकु ईद अंदान कि ना नीम मा अदिक नीम से जो बर्ताव मिस्त्र दा माळकु आगतद अदुर मा भी चित्त हचीन; 17 अदिक ना ठान्‍स कोंडीन कि नीमी मिस्त्र अन दुखगोळ दा टु तेगुकु कनानी, हित्ती, एमोरी, परिज्जी, हिब्बी, अदिक यबूसी लॉकुर द्‍याश दा ओयाईन, जो हींग द्‍याश आद कि यदुर दा हाल अदिक शयद इन धारागोळ वाहुसताव.’"

18 आग आंदुर नीन मानस्‍यार; अदिक नी इस्त्राएली हाळाबाट्टगोळ सांगुळ हुडुकु मिस्त्र अन राजा अन हात्‍ती होगकु आऊन से ईद अनेत, "इब्रीगोळ्‍द परमेश्वर, यहोवा से नाम मुलाकात आग्‍याद; ‘इदुरसाटी ईग नामी मुर दिन इन हादी मा आळी दा होगगोळ कि तान परमेश्वर उक बलिदान येर्सेव.’ 19 ना जान्‍सतीन कि मिस्त्र अन राजा नीमी आगासताका होग गोळतीदील, यागासताका कि ऊंद ताकतवर कय आऊक मजबुर माळाल्द. 20 इदुरसाटी ना कय वाळुसकु आ सप्‍पा आश्‍चर्य कर्मगोळ से, जो मिस्त्र अन बीच दा माळाईन, आ द्‍याश इक बडाईन; अदिक अदुर बाद्‍दा आव नीमी होग गोट्‍टान."

21 ✝ 3:21 निर्गमन 12:35,36 "आग ना मिस्त्रीगोळ से तान ई प्रजा अन अनुग्रह माळसुसाईन; अदिक याग नीव होट्‍टीर आग खाली कय देल होळतीदील. 22 उलटा नीम ऊंद ऊंद आर्त तान तान मान्‍ना हातळोर, अदिक आंदुर्द मान्‍या ईरावाळेर से व्‍हान्‍ना- बेळ्ली इन ईसरावाळी, अदिक कपळा बेळ कोंडार, अदिक नीव अवरी तान पार अदिक पोरगोळी हाकसुसेतीर; ई प्रकार देल नीम मिस्त्रीगोळी लुट्‍सीर."